Read Alur Lembanyutha 22 Bible Online

Lembanyutha 22 - Alur bible

Lembanyutha 22

¹Man enyutho ira kulo mi pi mi kwo, ma rieny calu kidi ma ie pelele, m’eai kud i komker pa Mungu man pa Nyathi Rombo,

²i die gengine. Man ng’et kulo kun ku kun yen mi kwo nuti, m’ecego nyinge ma tung’ tung’ apar wi ario, m’ecego ko nyinge ku ba dwi: man ith yende en e mi cangu thek.

³Man kwong’o kwong’ bidong’ bedo umbe kendo: man komker pa Mungu ku pa Nyathi Rombo bibedo i ie: jumiru pare de gibitimo ire;

⁴man gibineno wang’e; nyinge de bibedo ternyimgi.

⁵Man diewor bidong’ bedo umbe kendo; man can der mi thala, kadok mi ceng’ de binegogi ngo; kum Rwoth Mungu bimio igi der: man gibibimo bim rondo ku rondo.

⁶Man ewacu ira kumae, Lembe maeni gi mandha gin andha de: man Rwoth, Mungu mi tipo mi jubila, eoro malaika pare unyuth ni jumiru pare gin ma fodi nyanok bikotimbre be.

⁷Man nen, abino pio. Mugisa ni ng’atu m’uworo lembe mi lembila mi kitabu maeni.

⁸An a Yohana a ng’atu m’uwinjo m’uneno de gin maeni. Man kan awinjo aneno de, apodho piny nirwo the tiend malaika m’unyutho gin maeni ira.

⁹Man ewacu ira kumae, Nen kud itim maeni: an de an a jatic wedu ku mi juwedu ma jubila, ku mi ju m’uworo lembe mi kitabu maeni: rwo ni Mungu.

¹⁰Man ewacu ira kumae, Kud imwon ayi kum lembe mi lembila mi kitabu maeni; kum nindo dhingo.

¹¹Wek ng’atu m’ugondre, utim gin m’ugondre asu: ng’atu m’ucido de, wek juketh ecid asu: man ng’atu ma pwe, wek etim bedopwe asu: man ng’atu maleng’, wek juketh ebed leng’ asu.

¹²Nen, abino pio; man sukulia para ni i bang’a, m’amio ni dhanu ceke kubang’gi nzu ng’atuman calku tic pare.

¹³An a Alfa kud Omega, ma kwong’a man ma cen, thangambere man kajik.

¹⁴Mugisa ni ju m’ulwoko kendi migi, kara gibed ku ng’ol ma gibin ko ba yen mi kwo, ma gimond ko ku i dhugola i adhura.

¹⁵Yo woko gwogi, man weg jogi, ku weg tarwang’, ku juneg nek, ku ju ma lamu ayi gin m’acwia, ku kwai dhanu ceke m’umaru ndra m’utimo de.

¹⁶An a Yesu aoro malaika para nituco iwu gin maeni ni kanisa. An a ulag man nyakwar Daudi, cero ma rieny, mi rupiny.

¹⁷Man Tipo ku mugole giwacu, Bin. Man ng’atu m’uwinjo, dong’ ewac, Bin. Man ng’atu ma rieupi nege, dong’ ebin: man ng’atu m’uyenyo, dong’ egam pi mi kwo k’abamba.

¹⁸Atuco ni dhanu nzu m’uwinjo lembila mi kitabu maeni kumae, Tek ng’atu moko bimedo wi lembe maeni, Mungu bimedo ire masendi m’ugore i kitabu maeni:

¹⁹man tek ng’atu moko bikabu kum lembe mi kitabu mi lembila maeni, Mungu de bikabu maka pare kud i yen mi kwo, man kud i adhura ma leng’, ma pire gore i kitabu maeni.

²⁰Ng’atu m’utuco gin maeni wacu kumae, Eyo, abino pio. Amen. Bin Rwoth Yesu.

²¹Bero pa Rwoth Yesu ubed ku jumaleng’. Amen.