Read Alur Lembanyutha 3 Bible Online

Lembanyutha 3 - Alur bible

Lembanyutha 3

¹Ni malaika mi kanisa ma i Sardi kieu kumae: Ng’atu m’ubedo ku Tipo abiro pa Mungu, man cero de abiro, uwacu gin maeni: Ang’eyo tic peri, nia nyingi nuti ya ibedo kwo, enke in avu.

²Dong’ ibed ku weng’i, man iketh gin m’udong’ ucungi, ma gini ceng’ni tho: kum fokanwang’u tic peri moko ngo m’udoko ndhu cu i wang’ Mungu para.

³Ka kumeno dong’ ipoi maram yang’ ijolo man iwinjo de; man igwoke, ilok cwinyi de. Ka kumeno tek ikuro ngo, abibino calu jakwo, man saa m’abibino i ie i wi ibing’eyo ngo.

⁴Ento nyathi nyingi moko nuti i beng’i i Sardi m’ucido kendi migi ngo: man wabiwotho wakugi ku kendi ma tar; kum giromo.

⁵Ng’atu m’uloyo bironyo kendi ma tar kumeni; man abiruco nyinge woko kud i kitabu mi kwo ki ngo, man abituco nyinge i wang’ Vwa, kud i wang’ malaika pare.

⁶Ng’atu ma ithe nuti, dong’ ewinj gin ma Tipo wacu ni kanisa.

⁷Man ni malaika mi kanisa ma i Filadelfia kieu kumae: Ng’atu m’e leng’, ng’atu ma en e andha, ng’atu ma kifungula pa Daudi ni i bang’e, ng’atu ma yabu man ng’atu moko mbe ma ciko, ma ciko de man ng’atu moko mbe ma yabu, uwacu gin maeni:

⁸Ang’eyo tic peri (nen, aketho dhugola m’ubedo ayaba i weng’i, ma ng’atu moko mbe ma copo ciko), ya nyathi tego moko ni i beng’i, man igwoko lembe para, man ikwero nyinga de ngo.

⁹Nen, amio ng’et cokri pa Jok, mi ju m’uwacu nia gi Juyahudi, enke gi kumeno ngo, ento gicwayu ndra; nen, abiketho gibino girwo de nyim tiendi, ging’ei de nia ameri.

¹⁰Kum igwoko lembe mi twiocwiny para, an bende abigwoki ni saa mir abidhe, saa maeno ma bibino wi ng’om ngung’, nimulo i ju m’ubedo wi ng’om.

¹¹Abino pio: mak maeno m’ibedo ko ki, kara ng’atu moko kud umai jamkermiwic peri.

¹²Ng’atu m’uloyo, abikethe ni mbegi i hekalu pa Mungu para, man ebiwok woko ku keca kendo ngo: man abigoro nying’ Mungu para i wie, man nying adhura pa Mungu para, ma Yerusalem ma nyen, m’uai i polo ba Mungu para loro piny, ku nyinga ma nyen an gira.

¹³Ng’atu ma ithe nuti, dong’ ewinj gin ma Tipo wacu ni kanisa.

¹⁴Man ni malaika mi kanisa m’i Laodikia kieu kumae: Ng’atu ma Amen, m’e jamulembe mandha ma andha de, m’e thangambere mi giracwia pa Mungu, ewacu gin maeni:

¹⁵Ang’eyo tic peri, nia in i ng’ic kadok lieth de ngo: ayenyo ibed ng’ic kadi lieth.

¹⁶Kum kumeno kum i tang’, man i lieth kadi ng’ic de ngo, abing’uli woko kud i dhoga.

¹⁷Kum iwacu kumae, An a lony, man alimo lonyo, man can gin moko mbe m’unega; m’ing’eyo de ngo nia in i jacan m’umbe mutoro de man m’umbe piny man abinga, muneru de:

¹⁸amio iri rieko nia ing’ieu mola ma kwar i bang’a m’uwang’ i mac, kara idok m’i lony; ku kendi ma tar, kara ironjri, kara lewic mi muneru peri kud unen: man mo m’i wang’ de m’iwir ko weng’i, kara inen.

¹⁹Ku ba ju m’amaru ceke, ajukogi man aponjogi: ka kumeno bed k’amora, man ilok cwinyi.

²⁰Nen, acungo dhugola man adwong’o: tek ng’atu moko winjo dwanda man eyabu dhugola, abimondo i bang’e, man wabicamu wakude, en de kuda.

²¹Ng’atu m’uloyo, abimie ejany kuda i komker para, calu an bende aloyo, man ajany waku Vwa i komker pare.

²²Ng’atu ma ithe nuti, dong’ ewinj gin ma Tipo yero ni kanisa.