Read Alur Lembanyutha 6 Bible Online

Lembanyutha 6 - Alur bible

Lembanyutha 6

¹Man aneno ka Nyathi Rombo alu ayi acel mir abirone, e awinjo acel m’i kind yedi ma kwo ang’wen m’uwacu kumae, calku dwal mi morpolo, Bin inen.

²E aneno, man nen, riuni ma tar, man ng’atu m’ubedo i wie umaku atum; man jumio ire jamkermiwic: man ewok woko m’ebeloyo, man niloyo.

³Man kan ealu ayi mir arionde, awinjo yedi ma kwo mir arionde wacu kumae, Bin inen.

⁴E riuni mange ma kwar ngbo wok woko: man ni ng’atu m’ubedo i wie jumio ire ya ekab kwiocwiny kud i ng’om, man kara ginegri gigi: man jumio ire palamularu ma dit.

⁵Man kan ealu ayi mir adege, awinjo yedi ma kwo mir adege wacu kumae, Bin inen. E aneno, man nen, riuni ma col; man ng’atu m’ubedo i wie mukero ni i cinge.

⁶Man awinjo calu dwal uwacu kumae i kind yedi ma kwo ang’wen, Mukero mi nganu mi denarius, man nganu ma tung’ mukero adek mi denarius; man mo ku pigulok re kud wudubi.

⁷Man kan ealu ayi mir ang’wende, awinjo dwand yedi ma kwo mir ang’wende wacu kumae, Bin inen.

⁸E aneno, man nen, riuni ma foo: man ng’atu m’ubedo i wie, nyinge Tho; man Hadeya de lubo ng’eye. Man jumio igi ng’ol wi ng’et ng’om mir ang’wende, ya gineg ku palamularu, ku ndru de, man ku thong’om, man ku yedi ma kwiny m’i ng’om.

⁹Man kan ealu ayi mir abije, aneno the pemblam kwo mi ju ma junego pi lem pa Mungu, man pi lembatuca ma gibedo kudo:

¹⁰man gikok ku dwandgi ma dit, giwacu kumae, Rokani, E Rwoth, m’i leng’ andha de, ipoko lembe man iculo wang’ rimbwa wi ju m’ubedo wi ng’om ungo?

¹¹Man jumio igi kendi ma tar ma lot kubang’gi nzu; man juwacu igi, nia gikogiyom tundu nindo ma nyanok, cil m’ebitimbre kakare kum jutic wagi bende man kum wedigi, ma jubinegogi calu gin.

¹²Man aneno kan ealu ayi mir abusiende, e digidi ma dit uyengre; man ceng’ udoko col calu gonia mi yuk diel ma mujuga, man dwi ceke doko calu rimo;

¹³man cero mi polo podho wi ng’om, calu yen mir ulam oyo nyinge ma fokucek ungo ku yamu ma dit m’uyengre.

¹⁴Man polo kabre woko calu waraga m’ubedo adola; man gudi ku cula kubang’gi nzu ukabre ku kakagi.

¹⁵Man ju ma gin ubimo m’i ng’om, ku juker, ku jego ma dongo, ku julonyo, man jutego, ku ng’eca man paker kubang’gi nzu gipondo gigi i odcana man i kidi mi gudi;

¹⁶man giwacu ni gudi man ni cana kumae, Podh i wiwa, umwa de kud i wang’ ng’atu m’ubedo wi komker man ni kwinyo pa Nyathi Rombo:

¹⁷kum ceng’ ma dwong’ mi kwinyo migi wok; man ng’a ma copo cungo?