Read Alur Ruth 1 Bible Online

Ruth 1 - Alur bible

Ruth 1

¹Man etimbre i nindo ma jupoklembe gipoko ie lembe, nia ndru ni i ng’om. Man ng’atu moko m’i Beth-lehem-yuda ecibedo i ng’om Moab, en, ku cege, ku wote de ario.

²Man nying’ ng’atuni Elimelek, man nying’ dhaku pare de Naomi, man nying’ wote ario ke Malon ku Kilion, gi Juefrathi m’i Beth-lehem-yuda. Man giwok i ng’om Moab, e gibedo keca.

³Man Elimelek, ma cwar Naomi, tho; en de edong’, ku wote ario.

⁴E gigamu mon igi i kind mon mi Moab; nying’ ng’atu acel Orpa, man nying’ mucelo ke Ruth: e gibedo keca yenyo romo rundi apar.

⁵Man Malon ku Kilion gin ario de githo; e dhakune dong’ ma wote ario de weke ku cware de.

⁶Elund eai ku mon wote, kara edwog kud i ng’om Moab: kum ewinjo kud i ng’om Moab maram Yehova liewo ko dhanu pare ku mio igi kwen.

⁷E eai ku ka m’ebedo i ie, ku mon wote ario de gikugi; e gikwanyu yo gidok ko i ng’om Yuda.

⁸Man Naomi wacu ni mon wote ario kumae, Wucidhi, wudoki ng’atuman i ot pa min man i ot pa min: Yehova tim ber i beng’wu, calu wutimo ba ju m’utho, i bang’a de.

⁹Yehova yi iwu nia wunwang’ yom, ng’atuman i ot pa cware man i ot pa cware. Elund ecwio limbgi, e giting’o dwandgi, man giywak.

¹⁰E giwacu ire kumae, Ungo, ento wabidok wakudu ba juthu.

¹¹Man Naomi wacu kumae, Wulokru kendo, nyiga: wacidhu wakudu nedi? fodi Vota ni i ia kendo, ma gicopo bedo cogwu?

¹²Wulokru kendo, nyiga, wucidh i yo mu; kum ati acopo bedo ku nico ngo. Tek awacu kumae, Abedo ku genogen, tek abedo ku nico diewor maeni, man anyolo nyithindho ma co bende;

¹³kuno di wukurogi cil ma gidongo ko? kuno di wukwero bedo ku cogwu? ungo, nyiga; kum aywak dit piwu, kum cing’ Yehova bino i wia.

¹⁴E giting’o dwandgi malu, man giywak kendo: e Orpa cwio limb wang’u mire; ento Ruth umoko i kume.

¹⁵Man ewacu kumae, Nen, dhaku wedu bedok ba juthugi, man ba mungu pare: in de dok tok dhaku wedu.

¹⁶E Ruth uwacu kumae, Kud ikwai nia aweki, man adok kud alub toki; kum ka m’icidho i ie, an de abicidho keca; man ka m’igonjo i ie, an de abigonjo keca; juthu gibibedo juthuwa, man Mungu peri bibedo Mungu para;

¹⁷ka m’itho i ie, an de abitho keca, keca de jubiyika: Yehova tim kumeni i bang’a, ma sagu bende, tek lembe moko nuti ma en e tho ngo ma bipokowa wakudi.

¹⁸E kan eneno nia eketho cwinye kum cidho kude, eweko weco i bang’e.

¹⁹Kum kumeno gin ario gicidho cil ma giwok ko Beth-lehem. Man etimbre, ka giwok Beth-lehem, nia adhura ceke igi wang’ lii i kumgi, mon de wacu kumae, Maeni en e Naomi?

²⁰Man ewacu igi kumae, Kud wulwong’a Naomi, wulwong’a Mara; kum Ng’atu ma Jategokpo timo rac dit i bang’a.

²¹Acidho m’apong’, man Yehova dwoka thuwa kendo mananu; wulwong’a Naomi nedi, kum Yehova tuco wia, man Ng’atu ma Jategokpo mio ira cani?

²²Ka kumeno Naomi dwogo, ku Ruth, ma Nyamoabi, ma ci wode, gikude, m’edwogo kud i ng’om Moab: e giwok Beth-lehem i landu mwoka mi nganu.