Read Alur Ruth 3 Bible Online

Ruth 3 - Alur bible

Ruth 3

¹Man Naomi ma wang’u mire wacu ire kumae, Nyara, abiyenyo yom iri ngo, kara ebed ber iri?

²Kawono Boaz en e wat mwa ngo, m’ibedo ku jutic ma nyir pare? Nen, ekworo nganu wi lelacam diewor maeni.

³Ka kumeno dong’ ijom, iwir mo de, man ikend kendi, e ilor piny wi lelacam; ento kud iketh ng’atuno ng’ei, ma fok edaru camu ku madhu de ngo.

⁴Man ebibedo, kinde m’evuto piny, nia ibineno ka m’evuto i ie, e ibimondo, man ibiyabu wi tiende, e ibivuto piny; e ebiyero iri gin m’ibitimo.

⁵E edwoko lembe ire kumae, Lembe ceke m’iwacu abitimo.

⁶Man eloro piny wi lelacam, man etimo ceke calu wang’u mire wacu ire.

⁷Man ka Boaz udaru camu ku madhu de, anyong’a de nego adundene, ecidho nivuto ng’et cam ma judhuro: e ebino yo yo, man eyabu wi tiende, e evuto piny.

⁸Etimbre diewor ma ling’, nia lworo nego ng’atuno, man elokre gire; man, nen, nyaku vuto the tiende.

⁹E ewacu kumae, In i ng’a? E eloko lembe kumae, An a Ruth ma jatic peri ma nyaku: ka kumeno pedh bongu peri wi jatic peri ma nyaku; kum in i wat ma ceng’ni.

¹⁰Man ewacu kumae, Mugisa m’uai ba Yehova ukwenyi, nyara: inyutho bero ma cen m’usagu ma kwong’a, kum ilubo tok awobi ngo, kadok jucan kadi julonyo.

¹¹Kawono, nyara, lworo kud unegi; abitimo iri gin ceke m’iwacu; kum adhura ceke mi dhanu para ging’eyo nia in i nyaku ma piri ber.

¹²Man en e andha nia an a wat ma ceng’ni; ento wat ma ceng’ni ma sagu an nuti.

¹³Koikur i diewor ma tin, man ebibedo kugweno, nia tek ebitimo iri maka pa wat, dre; wek etim maka pa wat: ento tek ebitimo maka pa wat iri ngo abilund timo maka pa wat iri, calu Yehova bedo kwo: vut cil kugweno.

¹⁴Man evuto the tiende cil kugweno: man eai malu ka fodi piny ulero ngo ma junendri kudo. Kum ewacu kumae, Ku jung’ei nia nyakune bino wi lelacam.

¹⁵Man ewacu kumae, Kel bongu m’abola ma ni i kumi, imake de; e emake; man eporo nganu mukero abusiel, ekethe de i wie: e ecidho i adhura.

¹⁶E kan ewok ba wang’u mire, epenje kumae, In i ng’a, nyara? E eyero ire gin ceke ma ng’atuno timo ire.

¹⁷Man ewacu kumae, Mukero nganu abusiel maeni emio ira; kum ewacu kumae, Kud ici mananu ba wang’u.

¹⁸Elund ewacu kumae, Bed asu, nyara, cil m’ing’eyo maram lembene bicungo ko; kum ng’atuno biyom ungo, cil m’edaru ko lembe maeni tinuni.