Read Alur 1 Samwil 11 Bible Online

1 Samwil 11 - Alur bible

1 Samwil 11

¹Nahac ma Jaamoni ulund uidho malu, man egonjo kum Yabec-gilead: man dhanu ceke m’i Yabec uwacu ni Nahac kumae, Waribo lembe wakudu, man wabitimo iri.

²Man Nahac ma Jaamoni uwacu igi kumae, Wabiribo lembe kudu ni kum lembe maeni, nia juwodh nying’ weng’wu ceke ma yor acwic woko; man abikethe ni cac wi Israel ceke.

³Man judongo m’i Yabec uwacu ire kumae, Tur iwa nindo abiro, kara waor jukwenda i kieu mir Israel ceke; e yo ku ng’eye, tek ng’atu moko mbe m’ubodhowa, e wabiwok woko i beng’i.

⁴Jukwenda gilund gibino i Gibeya pa Saul, man giyero lembe maeni i ith dhanu: man dhanune ceke giting’o dwandgi malu, e giywak.

⁵Man, nen, Saul ubino m’ebelubo tok koni dhiang’ kud i podho; man Saul uwacu kumae, Ang’o timo dhanu ketho gibeywaki? E giyero ire lembe mi dhanu ma Yabec.

⁶Man Tipo pa Mungu bino wi Saul ku tego kan ewinjo lembe maeni, man ng’ecwiny pare opo dit.

⁷Man egamu koni dhiang’ ma ku mberembere, man ethumogi ni wath ni wath, man eorogi i kieu ceke mir Israel mba mba ku cing’ jukwenda, ewacu kumae, Ng’atu ma tek uwok ulubo tok Saul man tok Samwil de ngo, ebitimbre kumeca kum koni dhiang’ pare. Man ndiri pa Yehova podho wi dhanune, man giwok woko calu ng’atu acel.

⁸Man ekwanugi i Bezek; e nyithindho mir Israel gi rubanga dak adek, man dhanu pa Yuda gi rubanga pier adek.

⁹Man giwacu ni jukwenda m’ubino kumae, Wubiwacu kumae, ni dhanu m’i Yabec-gilead, Urwo, kinde ma ceng’ udoko lieth, wubinwang’u both. E jukwenda gibino giyero ni dhanu m’i Yabec; man anyong’a negogi.

¹⁰Ka kumeno dhanu m’i Yabec giwacu kumae, Urwo wabiwok woko i beng’wu, e wubitimo i kumwa gin ceke m’ubedo ber iwu.

¹¹Man etimbre urwone nia Saul uketho dhanu ni ungu adek; man gibino i kind gonjo i kur mi kugweno, man gigoyo Juamoni cil ma ceng’ udoko ko lieth: man etimbre, nia ju m’udong’ julalugi, ketho nia kindgi moko mbe m’ubedo ario karacelo.

¹²Man dhanu giwacu ni Samwil kumae, En e ng’a m’uwacu kumae, Saul bibimo wiwa? kel dhanune, kara waneggi.

¹³Man Saul uwacu kumae, Jubinego ng’atu moko ngo i ceng’ maeni; kum tinuni Yehova timo both i Israel.

¹⁴Samwil ulund uwacu ni dhanu kumae, Wubin, man dong’ wacidhu Gilgal, man wadwoku ker nyen keca.

¹⁵E dhanune ceke gicidho i Gilgal; man giketho Saul ni ubimo keca i wang’ Yehova i Gilgal; man githiero lam mi girathiera mi kwiocwiny keca i wang’ Yehova; e Saul ku dhanu mir Israel ceke anyong’a negogi dit keca.