Read Alur 1 Samwil 12 Bible Online

1 Samwil 12 - Alur bible

1 Samwil 12

¹Man Samwil uwacu ni Israel ceke kumae, Nen, a winjo dwendwu i gin ceke ma wuwacu ira, man aketho ubimo i wiwu.

²Man kawono, nen, ubimo wotho i weng’wu; man an ati lwar ni i wia de; man, nen, wota gini karacelo kudu: man awotho i weng’wu ugambre i aradu para cil i ceng’ maeni.

³Anuti eni: wunyuth lembe i kuma i wang’ Yehova, man i wang’ ng’atu ma juwiro pare: koni dhiang’ pa ng’a m’amaku? kadi kana pa ng’a m’amaku? kadi ng’a m’avugo? ng’a m’asendo? kadi agamu jamblembe i cing’ ng’a kara uum wang’a? man abidwoke iwu.

⁴Man giwacu kumae, Ivugowa ngo, kadi isendowa de ngo, kadok gamu gin moko kud i cing’ dhanu de igamu ngo.

⁵Man ewacu igi kumae, Yehova en e jamulembe i kumwu, man ng’atu pare ma juwiro en e jamulembe i ceng’ maeni, nia wunwang’u gin moko ngo i cinga. Man giwacu kumae, En e jamulembe.

⁶Man Samwil uwacu ni dhanu kumae, en e Yehova m’ugoyo wi Musa ku Harun, man m’uwodho kwaruwu kud i ng’om Misiri.

⁷Ka kumeno wucung’ ling’, kara agony iwu i wang’ Yehova pi tic mi bedopwe ceke pa Yehova, m’etimo iwu man ni kwaruwu.

⁸Kinde ma Yakobo bino i Misiri, man kwaruwu ywak ba Yehova, Yehova lund uoro Musa giku Harun, m’uwodho kwaruwu woko kud i Misiri, man eketho gibedo i ka maeni.

⁹Ento wigi wil kum Yehova Mungu migi; man eng’iewogi i cing’ Sisera, jego mir udul pa Hazor, man i cing’ Jufilisti, man i cing’ ubimo mi Moab; man gikiedo kugi.

¹⁰Man gilwong’o Yehova, e giwacu kumae, Wadubo, kum waweko Yehova, man watimo ni Balim man Actaroth: ento kawono bodhwa kud i cing’ judegi mwa, man wabitimo iri.

¹¹Man Yehova oro Yerubal man Bedan, ku Yeftha, man Samwil, man ebodhowu kud i cing’ judegiwu kun ku kun; e wubedo museme.

¹²Ento ka wuneno nia Nahac m’ubimo mi nyithindho mir Amon ubino i kumwu, wuwacu ira kumae, Ungo, ento ubimo bicamu ker i wiwa; ma nwang’u Yehova Mungu mu en e ubimo mu.

¹³Ka kumeno kawono nen ubimo ma wugoyo wie, man ma wupenjo pire: man, nen, Yehova ketho ubimo i wiwu.

¹⁴Tek wubilworo Yehova, man wutim ire, wuwinj dwande de, man wujai ungo kum lembang’ola pa Yehova, man wun kud ubimo bende m’ucamu ker i wiwu wubed julub Yehova Mungu mu, e dre:

¹⁵ento tek wubiwinjo dwand Yehova ngo, ento wujai kum lembang’ola pa Yehova, e cing’ Yehova bibedo i wiwu, calu ebedo i wi kwaruwu.

¹⁶Ka kumeno kawono wucung ling’ man wunen gin ma dit maeni, ma Yehova bitimo i weng’wu.

¹⁷En e palacam mi nganu tin ungo? Abilwong’o Yehova, kara eor morpolo ku koth; e wubing’eyo wubineno de nia dubo mu e dit, ma wutimo i wang’ Yehova, i penji ma wupenjo ko ubimo iwu.

¹⁸Kum kumeno Samwil ulwong’o Yehova; man Yehova oro morpolo ku koth i ceng’ maeca: man lworo nego dhanu ceke dit kum Yehova man kum Samwil.

¹⁹Man dhanune ceke giwacu ni Samwil kumae, Rwo ni Yehova Mungu peri pi jutic peri, kara ku watho; kum wamedo kum dubo mwa ceke kier maeni, ma wapenjo ko iwa ubimo.

²⁰E Samwil uwacu ni dhanune kumae, Lworo kud unegwu: wutimo dubo maeni ceke andha; ento kud wulokru cen kum lubo Yehova, ento wutim ni Yehova kud adundewu ceke:

²¹man kud wulokru cen; kum tek kumeno nwang’u wucidho tok gin mananu ma kulokane mbe kadi both, kum gi mananu.

²²Kum Yehova biweko dhanu pare ngo kum nyinge ma dwong’, kum enyayu mutoro i Yehova ya edwokwu ni dhanu ire gire.

²³Mange ke pi an, dong’ ebed bor i kuma nia adub ni Yehova kuweko rwo piwu: ento abiponjowu i yo ma ber m’atira de.

²⁴Ndhu wulwor Yehova, man wutim ire andha kud adundewu ceke; kum wupoi pi gin ma dit m’etimo iwu.

²⁵Ento tek wubidubo asu, wubinyothru, wun kud ubimo mu de.