Read Alur 1 Samwil 13 Bible Online

1 Samwil 13 - Alur bible

1 Samwil 13

¹Saul rundi pare pier ang’wen kan emaku camu ker; man kan ecamu ker rundi ario wi Israel,

²Saul ugoyo wi dhanu mir Israel rubanga adek ire, kind dhanu maeno rubanga ario gini karacelo ku Saul i Mikmac man wi got Beth-el, man rubanga acel gini karacelo ku Yonathan i Gibeya pa Benyamin: man dong’ dhanu eorogi kubang’gi kubang’gi ng’atuman ba hema pare.

³Man Yonathan ugoyo ot ma tek mi Jufilisti ma ni i Geba; e Jufilisti giwinjo pire. Man Saul ukudho agwara i ng’ombe ceke mba mba, ewacu kumae, Wek Juebrania giwinji.

⁴Man Israel ceke giwinjo nia Saul ugoyo ka ma tek mi Jufilisti, man bende nia Israel gibedo ni cac ni Jufilisti. Man dhanune gicokri karacelo i tok Saul i Gilgal.

⁵Man Jufilisti gicokri gigi karacelo kara gikied kud Israel, magali rubanga pier adek, man weg riuni rubanga abusiel, man dhanu calu kwio ma dhu nam ni udulgi: e giidho malu, man gigonjo i Mikmac, yo nyangu ni Beth-aven.

⁶Kinde ma dhanu mir Israel gineno nia gini i lem ma tek (kum dhanune gini i ang’abacwiny), i kinde maeni dhanu gipondo i odng’om, man i luli, man i cana, man i vur, kud i longro.

⁷Nwang’u Juebrania moko gikadhu loka Yordan ba ng’om pa Gad ku mi Gilead; ento Saul re, fodi eni i Gilgal, man dhanu ceke gilubo toke ku mielkum.

⁸Man egalu ceng’ abiro, calu nindo ma jung’olo ma Samwil uketho: ento Samwil ubino ngo i Gilgal; man dhanune gilal kud i kume.

⁹Man Saul uwacu kumae, Wukel lam m’awang’a keni i bang’a, man lam mi kwiocwiny. E ethiero lam m’awang’a.

¹⁰Man etimbre nia, kinde m’edaru thiero lam m’awang’a, nen, Samwil uwok; man Saul ucirombo kude, kara emothe.

¹¹Man Samwil uwacu kumae, Itimo ang’o? Man Saul uwacu kumae, Kum aneno nia dhanu gilal i kuma, man nia ibino ngo i ceng’ ma jung’olo, man nia Jufilisti gicokri gigi karacelo i Mikmac;

¹²ka kumeno awacu kumae, Kawono Jufilisti gibicori piny i wia i Gilgal, man fodi akwayu bero ba Yehova ngo: ka kumeno adwokra gira tek, man athiero lam m’awang’a.

¹³Man Samwil uwacu ni Saul kumae, Itimo ma rieko mbe; iworo lembang’ola pa Yehova Mungu peri m’eng’olo iri ngo: kum nwang’u kuno di Yehova dwoko ker peri tek mi nja wi Israel.

¹⁴Ento kawono ker peri bicungo ngo: kum Yehova yenyo ng’atu ma nyayu mutoro i adundene, man Yehova uketho ebed jaditmawijo wi dhanu pare, kum iworo lembe ma Yehova ng’olo iri ngo.

¹⁵E Samwil uai malu, man eidho malu kud i Gilgal ba Gibeya pa Benyamin. Man Saul ukwanu dhanu ma ni karacelo kude, ma yenyo romo dhanu dak abusiel.

¹⁶Man Saul, ku Yonathan ma wode, ku dhanu ma ginuti karacelo kugi, gibedo i Geba pa Benyamin: ento Jufilisti gigonjo migi i Mikmac.

¹⁷Man junyothng’om giai kud i gonjo mi Jufilisti ni ungu adek: ungu acel ulokre i yo m’ucidho Ofra, ba ng’om mi Cual;

¹⁸man ungu mange lokre yo ba Beth-horon; man ungu mange lokre i yo mi kieu ma neno wi poga mi Zeboim yo ba langa.

¹⁹Nwang’u ng’atu acel de mbe ma jabodho mir umbu i ng’om Israel ngung’; kum Jufilisti wacu kumae, Juebrania maru thiedho igi palamularu ku tong’:

²⁰ento Juisraeli ceke giloro piny ba Jufilisti, dhanu ceke kubang’gi kubang’gi ng’atuman ketho juwai lak kwer pare man pala pare, ku lei pare, man koyo pare;

²¹ento gibedo ku pogi mi koyo, man mi pala, man mi rajwer mir umbu, man mi lei, man mi yiko dindo.

²²Kum kumeno etimbre i ceng’ mir ali, nia junwang’u kadok palamularu kadi tong’ de ngo i cing’ dhanu moko ma ni karacelo ku Saul ku Yonathan: ento junwang’u ba Saul ku Yonathan ma wode.

²³Man udul mi Jufilisti giwok woko cil kum kakadhu mi Mikmac.