Read Alur 1 Samwil 14 Bible Online

1 Samwil 14 - Alur bible

1 Samwil 14

¹Nie etimbre i ceng’ acel, nia Yonathan ma wod Saul uwacu ni jalawobi ma yeyo ban pare kumae, Bin, dong’ wacidh lokaca ba ot ma tek mi Jufilisti, ma ni yo lokaca. Ento eyero ngo ni won.

²Man Saul ubedo i kajik mi Gibeya the yendulemo ma ni i Migron: man dhanu ma gini karacelo kude giyenyo romo dhanu dak abusiel;

³man Ahiya, ma wod Ahitub, m’umin Ikabod ma wod Finehaz, ma wod Eli, ma jalam pa Yehova i Cilo, m’ukendo ugoke. E dhanu ging’eyo ngo nia Yonathan ucidho.

⁴Man i kind kakadhu, ma Yonathan uyenyo ekadh ecidh ko kum ot ma tek mi Jufilisti, leb cana nuti i ng’ete acel, man leb cana ni i ng’ete mucelo: man nying’ acel en e Bozez, man nying’ mucelo Sene.

⁵Leb cana acel utingre yor ariwa ma malu i wang’ Mikmac, man mucelo ke yor ariwa ma piny i wang’ Geba.

⁶Man Yonathan uwacu ni jalawobi ma yeyo jambali pare kumae, Bin, man wek waci lokaca ba ot ma tek mi ju ma jutimo yaa ngo i kumgi: kuno nyo Yehova bitimo iwa; kum gin moko mbe ma cero Yehova kubodho ku dhanu dupa kadi ku ma nok.

⁷Man jayei jambali pare wacu ire kumae, Tim gin ceke ma ni i adundeni: lokri, nen, wanuti wakudi calkud adundeni.

⁸Yonathan ulund uwacu kumae, Nen, wabikadhu lokaca ba dhanune, man wabiwodhra giwa i wang’gi.

⁹Tek giwacu kumeni i bang’wa, Wubed maram wabibino ko i beng’wu; wabilund cungo ling’ i kakawa, e wabiidho malu i bang’gi ngo.

¹⁰Ento tek giwacu kumae, Wuidh malu i bang’wa; wabilund idho malu; kum Yehova miogi i cingwa: man maeni bibedo giranyutha iwa.

¹¹E gin ario ginyuthri gigi ni ju m’i ot ma tek mi Jufilisti: e Jufilisti giwacu kumae, Nen, Juebrania giwok woko kud i vur ma gipondo i ie.

¹²Man dhanu m’i ot ma tek giloko lembe ni Yonathan ku jayei jambali pare, man giwacu kumae, Wuidh malu i bang’wa, man wabinyutho iwu lembe moko. Man Yonathan uwacu ni jayei jambali pare, Idh malu i toka; kum Yehova miogi i cing’ Israel.

¹³Man Yonathan umulo amula ku cinge ku tiende de, man jayei jamb ali pare yor i ng’eye: e gipodho i wang’ Yonathan; man jayei jambali pare negogi yor i ng’eye.

¹⁴Man nek maeno ma kwong’a, ma Yonathan ku jayei jambali pare gitimo, yenyo romo dhanu pier ario, i ng’et lela ma romo ruvangu dak abic.

¹⁵Man mielkum ni i kagonjo, i thim, man i kind dhanu ceke; ju m’i ot ma tek, man junyothng’om bende, kumgi miel; ng’om de yengre: kum kumeno mielkum nuti dit apila.

¹⁶Man jukur pa Saul ma gini i Gibeya pa Benyamin gineno; man, nen, udul dhanu lui woko, e gicidho kun ku kun.

¹⁷Saul ulund uwacu ni dhanu ma gini karacelo kude kumae, Kawono wukwan, man wunen ng’a m’uai i bang’wa. Man ka gikwanu, Nen, Yonathan ku jayei jambali pare gimbe keca.

¹⁸Man Saul uwacu ni Ahiya kumae, Kel sanduk pa Mungu keni. Kum sanduk pa Mungu ni keca nindo maeca karacelo ku nyithindho mir Israel.

¹⁹Man etimbre, kinde ma Saul ubeweco ba jalam, nia yakni ma ni ka ma Jufilisti gonjo i ie bedo asu man ebedhetho adhetha: man Saul uwacu ni i jalam kumae, Kab cingi cen.

²⁰Man Saul ku dhanu ceke ma ni karacelo kude ucokri karacelo, man gibino ba lwiny: man, nen, palamularu mi dhanu ceke kubang’gi kubang’gi pa ng’atuman ni kum wadi, man ang’abacwiny nuti dit apila.

²¹Nie Juebrania ma nwang’u gini karacelo ku Jufilisti calu ma naka, man m’uidho malu karacelo kugi i kagonjo, kud i ng’om mi ng’ete gbur, gin bende gilokri kara gibed ku Juisraeli ma gini karacelo ku Saul ku Yonathan.

²²Kumeno dhanu ceke mir Israel ma gipondo i ng’om gudi pa Efraim, kinde ma giwinjo nia Jufilisti ringo, gin bende gilubo tokgi ma tek i lwiny.

²³Kum kumeno Yehova bodho Israel i ceng’ maeca: man lwiny ukadhu ba Beth-aven.

²⁴E dhanu mir Israel cwinygi dieng’ ceng’ maeca; kum Saul ukwong’o dhanu, ewacu kumae, Kwong’ ubed wi ng’atu m’ucamu cemo moko maram uthieno wok ko, man aculo kwor wi judegina. Kum kumeno dhanu moko mbe m’ubilo cemo.

²⁵Man dhanu ceke gibino i luli; man kic ni keca i ng’om.

²⁶Man kinde ma dhanu wok ba luli, nen, pedekic upodho: ento ng’atu moko mbe m’uketho cinge kum dhoge; kum dhanu gilworo kwonge.

²⁷Ento Yonathan uwinjo ngo ka won ung’olo ni dhanu ku kwong’: kum kumeno etieyo dhu uluth ma ni i cinge, man egwelo kudo mio kicne, e eketho cinge i dhoge; man wang’e lero.

²⁸Ng’atu acel m’i Idnd dhanu ulund uloko lembe, man ewacu kumae, Wuru ng’olo ni dhanu ngili ngili ku kwong’, ewacu kumae, Kwong’ ubed wi ng’atu m’ucamu cemo i ceng’ maeni. E dhanu givoc.

²⁹Yonathan ulund uwacu kumae, Vwa ng’abu cwiny ng’om: nen, akwayuwu, maram wang’a lero ko, kum abilo nyathi kic maeni.

³⁰Esagu dit ungo, tek dhanu gicamu giyeng’ tin kum ayeki mi judegi migi ma ginwang’u? kum kawono nek ma dit umbe i kind Jufilisti.

³¹Man gigoyo Jufilisti i ceng’ maeca ugambre Mikmac cil kum Aiyalon. E dhanune givoc dit;

³²man dhanune gicori wi ayeki, man gimaku rombe, ku koni dhiang’, man nyithi dhiang’, e ginegogi i ng’om; man dhanune gicamugi ku rimone.

³³Gilund giyero ni Saul, giwacu kumae, Nen, dhanu dubo ni Yehova, kum gicamu ku rimo. Man ewacu kumae, Wutimo kud awondi: wung’iel kidi ma dit i bang’a i ceng’ maeni.

³⁴Man Saul uwacu kumae, Wupokru i kind dhanune, man wuwac igi kumae, Wukel i bang’a keni ng’atuman koni dhiang’ pare, man ng’atuman rombo pare, man wuneggi keni, wucam; man kud wudub ni Yehova ku camu ku rimo. Man dhanu ceke kubang’gi kubang’gi gikelo ng’atuman koni dhiang’ pare i diewor maeca, man junegogi keca.

³⁵Man Saul uguro pemblam ni Yehova: man maeni en e pemblam ma kwong’ane m’eguro ni Yehova.

³⁶Man Saul uwacu kumae, Dong’ waloru piny tok Jufilisti ku diewor, man wamak ayeki i kindgi maram piny uler ko, man ku wawek ng’atu acel m’i kindgi. Man giwacu kumae, Tim gin ma tek ubedo ber iri. Jalam ulund uwacu kumae, Dong’ wacoru ceng’ni keni ba Mungu.

³⁷Man Saul upenjo lembapora ba Mungu kumae, Abiloro piny tok Jufilisti? ibimiogi i cing’ Israeli? Ento eloko ire lembe ngo i ceng’ maeca.

³⁸Man Saul uwacu kumae, Wucor ceng’ni keni, wu judongo ceke mi dhanu; man wung’ei wunen ka ma dubo ni i ie i ceng’ maeni.

³⁹Kum, calu Yehova bedo kwo, m’ubodho Israel, kadok ebedo i Yonathan ma woda, ebitho andha. Ento ng’atu moko mbe i kind dhanu ceke m’uloko ire lembe.

⁴⁰Elund ewacu ni Israel ceke kumae, Wubed yo kurucel, man waku Yonathan ma woda wabibedo yo kurucel. E dhanune giwacu ni Saul kumae, Tim m’ubedo ber iri.

⁴¹Ka kumeno Saul uwacu ni Yehova, Mungu mir Israel, kumae, Nyuth m’ubedo dre. Man gagi podho wi Yonathan ku Saul: ento dhanunegi giboth.

⁴²Man Saul uwacu kumae, Wugoi gagi i kindwa waku Yonathan ma woda. Man gagi podho wi Yonathan.

⁴³Saul ulund uwacu ni Yonathan kumae, Yer ira gin m’itimo. Man Yonathan uyero ire, ewacu kumae, Abilo nyathi kic andha ku dhu uluth ma ni i cinga; man, nen, ambe ngo ku tho be.

⁴⁴E Saul uwacu kumae, Mungu tim kumeni man mange bende; kum ibitho andha, Yonathan.

⁴⁵Man dhanune giwacu ni Saul kumae, Yonathan bitho, m’etimo both ma dit maeni i Israeli? Awene: calu Yehova bedo kwo, yukwie acel de mbe ma bipodho i ng’om; kum gitimo giku Mungu tinuni. Kum kumeno dhanune gibodho Yonathan kara kud etho.

⁴⁶Saul ulund uidho malu ku ba lubo Jufilisti; man Jufilisti gidok i kakagi.

⁴⁷Nie kinde ma Saul umaku ker wi Israel, ekiedo ku judegi pare ceke kun ku kun, kum Moab, man kum nyithindho mir Amon, man kum Edom, man kum ju m’ubimo mi Zoba, man kum Jufilisti: man ka ma tek elokre ie gire, evoyogi.

⁴⁸Man etimo ku kero, egoyo Juamaleki de, man ebodho Israel kud i cing’ ju m’uyakugi.

⁴⁹Nwang’u wot Saul gi Yonathan, man Icvi, ku Malkicua; man nying’ nyige ario gi eni: nying’ ma kayu Merab, man nying’ ma nok Mikal:

⁵⁰man nying’ dhaku pa Saul en e Ahinoam ma nyar Ahimaz. Man nying’ jego mir udul pare en e Abner ma wod Ner, ma neru Saul.

⁵¹Man Kic en e won Saul; man Ner ma won Abner en e wod Abiel.

⁵²Man ali ma tek nuti i kum Jufilisti i ceng’ pa Saul ceke: man tek Saul uneno ng’atu moko ma tek, kadi ng’atu moko ma ratego, egame i bang’e.