Read Alur 1 Samwil 15 Bible Online

1 Samwil 15 - Alur bible

1 Samwil 15

¹Man Samwil uwacu ni Saul kumae, Yehova ora kara awiri ibed ubimo wi dhanu pare, wi Israel: ka kumeno kawono winj dwand lembe pa Yehova.

²Yehova mir udul uwacu kumae, Aneno gin ma Amalek utimo kum Israel, maram ekethre ko gire i kume i yo, kinde m’eai ku i Misiri.

³Kawono icidh igoi Amalek, man inyoth gin ceke ma gibedo ko kot, man kud iwekgi; ento wuneg co ku mon bende, nyithindho ku mukere, koni dhiang’ man rombo, ngamia ku kana.

⁴E Saul ulwong’o dhanu, man ekwanugi i Telaim, dhanu ma ku tielo rubanga dak ario, man dhanu mi Yuda rubanga apar.

⁵Man Saul ubino bang’ adhura pa Amalek, man ekanu adhi i poga.

⁶Man Saul uwacu ni Jukeni kumae, Wucidhi, wuai, wulor piny ku kind Juamaleki, amaru nyothowu karacelo kugi; kum wunyutho bero ni nyithindho mir Israel ceke, kinde ma giai woko kud i Misiri. Kum kumeno Jukeni giai ku kind Juamaleki.

⁷Man Saul ugoyo Juamaleki, ugambre Havila kan iidho malu ba Cur, ma ni i wang’ Misiri.

⁸Man emaku Agag m’ubimo mi Juamaleki, ma kwo, man enyotho dhanu ceke kot ku lak palamularu.

⁹Ento Saul ku dhanu giweko Agag, man rombe ma beco, man mi koni dhiang’, man mi lim m’ucwe, man mi nyithi rombe, man gin ceke m’ubedo ber, man eyenyo ngo enyothgi ceke: ento gin ceke ma rac man ma jubayu, e maeno ginyotho pet.

¹⁰Lembe pa Yehova ulund ubino ba Samwil, uwacu kumae,

¹¹Alokra kum ating’o Saul ni ubimo; kum elokre cen kum luba, man etimo lembang’ola para ngo. Man kwinyo nego Samwil; man eywak ba Yehova diewor soro.

¹²Man Samwil uai malu pir kugweno kara eromb ku Saul kugweno; man juyero ni Samwil, juwacu kumae, Saul ubino Karmel, man, nen eketho ire jampoi ucungo, man elokre, e ekadhu, man eloro piny i Gilgal.

¹³Man Samwil ubino ba Saul; e Saul uwacu ire kumae, Mugisa pa Yehova bed kudi: atimo lembang’ola pa Yehova.

¹⁴Man Samwil uwacu kumae, Tek kumeno ywak mi rombe i itha, man ywak mi koni dhiang’ m’a winjo thelembene ang’o?

¹⁵Man Saul uwacu kumae, Gikelogi giai kugi ba Juamaleki: kum dhanu giweko rombe ma beco, man koni dhiang’ ma beco kara gilam ni Yehova Mungu peri; man donge wanyotho kot.

¹⁶Samwil ulund uwacu ni Saul kumae, Kur man abiyero iri gin ma Yehova wacu ira i diewcr maeni. Man ewacu ire kumae, Yer asu.

¹⁷Man Samwil uwacu kumae, Kafok i nok i weng’i giri, juketho ibed wi suru mir Israel ungo? Man Yehova wiri ni ubimo wi Israel;

¹⁸man Yehova ori i woth, man ewacu kumae, Cidhi, man inyoth judubo ma Juamaleki kot, man ikied kugi maram githum ko.

¹⁹Ka kumeno nedi iworo dwand Yehova ngo, ento icori wi ayeki, man itimo gin m’ubedo rac i wang’ Yehova?

²⁰Saul uwacu ni Samwil kumae, Eyo, aworo dwand Yehova, man acidho i yo ma Yehova ora i ie, man adwogo kud Agag m’ubimo mir Amalek, man anyotho Juamaleki kot.

²¹Ento dhanu gimaku kum ayeki, rombe ku koni dhiang’, ma beco mi gin ma jukwong’o, kara julam ni Yehova Mungu peri i Gilgal.

²²Man Samwil uwacu kumae, Lam m’awang’a man lam nyayu mutoro ma dit i Yehova, ma calu woro dwand Yehova? Nen, woro e ber ma sagu lam, man winjo e ber ma sagu mio mi nyogi rombe.

²³Kum camuco en e calu dubo mir ajoga, man udhing’ en e calu rwo ma ni mungu m’araga kud ayi gin m’acwiya. Kum ikwero lembe pa Yehova, en bende ekwerl kud ibed ubimo.

²⁴Man Saul uwacu ni Samwil kumae, Adubo; kum akadhu ku wi lembang’ola pa Yehova, man lembe peri, kum alworo dhanu, man aworo dwandgi.

²⁵Ka kumeno kawono, akwei, wek dubo para woko, man ilokri kendo i bang’a, kara arwo ni Yehova.

²⁶Man Samwil uwacu ni Saul kumae, Abidwogo karacelo kudi ngo; kum ikwero lembe pa Yehova, man Yehova kweri kud ibed ubimo wi Israel.

²⁷Man ka Samwil ulokre kara ecidhi, Saul umaku dhu kanzu pare, man eyec.

²⁸Man Samwil uwacu ire kumae, Yehova yeco ker mir Israel kud i beng’i tinuni, man emie ni jadhugola peri, m’e ber ma segi.

²⁹Man bende Jatego mir Israel bicwayu ndra kadi lokre de ngo; kum en e dhanu ngo, ma nia elokre.

³⁰Elund ewacu kumae, Adubo: ento mi ira yung kawono, akwei, iwang’ judongo mi dhanu para, man i wang’ Israel, man ilokri kendo i bang’a, kara arwo ni Yehova Mungu peri.

³¹Kum kumeno Samwil ulokre kendo ng’ei Saul; e Saul urwo ni Yehova.

³²Samwil ulund uwacu kumae, Wukel Agag m’ubimo mi Juamaleki keni i bang’a. Man Agag ubino i bang’e ku mutoro. E Agag uwacu kumae, Andha lak tho kadhu.

³³E Samwil uwacu kumae, Calu palamularu peri ketho mon ubedo umbe nyithindho, e meru bibedo umbe nyithindho kumeca i kind mon. Man Samwil utong’o Agag i wath i wath i wang’ Yehova i Gilgal.

³⁴Samwil ulund ucidho Rama; man Saul uidho malu ba ot pare i Gibeya pa Saul.

³⁵Man Samwil ubino kendo ngo nineno Saul cil i ceng’ mi tho pare; kum Samwil uywak pi Saul: man Yehova lokre kum eketho Saul ni ubimo wi Israel.