Read Alur 1 Samwil 16 Bible Online

1 Samwil 16 - Alur bible

1 Samwil 16

¹Man Yehova wacu ni Samwil kumae, Ibiywak pi Saul rokani, kum akwere kud ebed ubimo wi Israeli? pong’ tung peri ku mo, man icidhi: abiori ba Yese ma Jabeth-lehemi; kum anwang’u ira ubimo i kind wote.

²Man Samwil uwacu kumae, Acopo cidho nenedi? tek Saul uwinjo maeni, ebinega. Man Yehova wacu kumae, Cidh ku rwaya, man iwac kumae, Abino kara alam lam ni Yehova.

³Man ilwong’ Yese ba lamne, e abinyutho iri gin m’ibitimo: man ibiwiro ira ng’atu m’agoyo nyinge iri.

⁴E Samwil utimo gin maeno ma Yehova yero, man ebino Beth-lehem. Man judongo mir adhurane gibino rombo kude ma kumgi bemiel, man giwacu kumae: Ibino ku kwiocwinyi?

⁵Man ewacu kumae, Ku kwiocwiny; abino kara alam lam ni Yehova: wudwokru giwu leng’, man wubin wakudu ba lam. Man edwoko Yese ku wote leng’, e elwong’ogi ba lam.

⁶Man etimbre, kinde ma gibino, nia eneno wi Eliab, man ewacu kumae, Andha ng’atu ma Yehova wiro ni i wang’e.

⁷Ento Yehova wacu ni Samwil kumae, Kud inen wang’e, kadi kadongone; kum akwere: kum Yehova neno calu dhanu neno ngo; kum dhanu neno ayi ma yo woko, ento Yehova neno yo i adunde.

⁸Yese lund ulwong’o Abinadab, man eketho ekadhu i wang’ Samwil. Man ewacu kumae, Kadok maeni de Yehova goyo wie ngo.

⁹Yese ulund uketho Cama kadhu. Man ewacu kumae, Kadok maeni de Yehova goyo wie ngo.

¹⁰Man Yese ketho wote abiro gikadhu wang’ Samwil. Man Samwil uwacu ni Yese kumae, Yehova goyo wi maeni de ngo.

¹¹Man Samwil uwacu ni Yese kumae, Nyithindho peri ceke gi eni? Man ewacu kumae, Fodi edong’ ma cogo, man, nen, ebekwayu rombe. Man Samwil uwacu ni Yese kumae, Or jucijugame; kum wabibedo piny ungo ma foketundo keni ngo.

¹²Man eoro kwenda jugame, jukele juroye. Nwang’u enne e landu, man ayine ber hai, man e ber mir anena. Man Yehova wacu kumae, Ai malu, wire; kum en e en.

¹³Samwil ulund ugamu tung mi mo, man ewire i kind utumin mire: e Tipo Yehova bino wi Daudi ma tek ugambre i ceng’ maeca cil ku m’ulube. Kum kumeno Samwil uai malu, man edok I Rama.

¹⁴Nwang’u Tipo Yehova ai ku ba Saul, man tipo ma rac m’uai ba Yehova usende.

¹⁵Man jutic pa Saul uwacu ire kumae, Nen kawono, tipo ma rac m’uai ba Mungu besendi.

¹⁶Kawono rwoth mwa ng’ol ni jutic peri, ma gini i weng’i, kara giyeny jabodho ma cu mir adungu: man ebitimbre, kinde ma tipo ma rac m’uai ba Mungu ni i wii, nia ebigoyo ku cinge, man ibibedo ber.

¹⁷Man Saul uwacu ni jutic pare kumae, Kawono wunwang’ ira ng’atu m’ung’ei goyo ber, man wukele i bang’a.

¹⁸Ng’atu acel ma kind awobi ulund uloko lembe, man ewacu kumae, Nen, aneno wod Yese acel ma Jabeth-lehemi, ma en e jabodho mi goyo adungu, man en e ng’atu ma tek ma ratego, man en e dhanu mir ali, ma riek kum yero lembe de, man en e ng’atu ma ber; Yehova de ni kude.

¹⁹Kum kumeno Saul uoro jukwenda ba Yese, man ewacu kumae, Or Daudi ma wodi, ma bedo ku rombe, i bang’a.

²⁰Man Yese gamu kana ku mugati, man cupa mi pigulok, ku nyathi diel, man eorogi ba Saul i cing’ Daudi ma wode.

²¹Man Daudi bino ba Saul, e ecungo i wang’e: man emare dit; man edoko jayei jambali pare.

²²Man Saul uoro kwenda ba Yese, ewacu kumae, Akwei, wek Daudi cung i wang’a; kum enwang’u bero i wang’a.

²³Man etimbre kinde ma tipo ma rac m’uai ba Mungu uwok wi Saul, nia Daudi ting’o adungu, man egoyo ku cinge: kum kumeno cwiny Saul udwogo, man ebedo ber, man tipo ma rac uai kud i bang’e.