Read Alur 1 Samwil 19 Bible Online

1 Samwil 19 - Alur bible

1 Samwil 19

¹Man Saul uyero ni Yonathan ma wode, man ni jutic pare ceke, nia gineg Daudi. Ento Yonathan, ma wod Saul, anyong’a nege dit kum Daudi.

²E Yonathan uyero ni Daudi, ewacu kumae, Saul ma vwa yenyo enegi: ka kumeno kawono, akwei, bed ku weng’i i kumi giri kugweno, man ibed i ka m’apana, man ipondi:

³man abicidho woko abicungo de i ng’et vwa i thim ka m’ibedo i ie, man wabiweco waku vwa piri; man tek aneno gin moko, abiyero iri.

⁴Man Yonathan uyero pi Daudi ber ni Saul ma won, man ewacu ire kumae, Ubimo kud udub kum jatic pare, kum Daudi; kum edubo iri ngo, man kum tic pare bedo ber dit yor i beng’i:

⁵kum eketho kwo pare i cinge, man egoyo Jafilisti, e Yehova timo aloci ma dit pir Israel ceke: ineno maeni, man anyong’a negi; kum kumeno ibilund dubo kum rimo m’umbe dubo, ma nia ineg Daudi ma there mbe?

⁶Man Saul uwinjo dwand Yonathan: man Saul ukwong’o kumae, Calu Yehova bedo kwo, jubiketho etho ngo.

⁷E Yonathan ulwong’o Daudi, man Yonathan unyutho ire gin maeni ceke. Man Yonathan ukelo Daudi ha Saul, man ebedo i vu te, calu ma naka.

⁸Man ali moc kendo: e Daudi cidho woko, man ekiedo ku Jufilisti, e enegogi ku nek ma dit; man giringo i wang’e.

⁹Man tipo ma rac m’uai ba Yehova ni wi Saul, kinde m’ebedo i ot pare ku tong’ pare i cinge; e Daudi begoyo adungu ku cinge.

¹⁰Man Saul uyenyo egoi Daudi cil kum kor ot ku tong’; ento elui woko kud i vut Saul, man ecobo tong’ kor ot: e Daudi ringo, man eboth i diewor maeca.

¹¹Man Saul uoro jukwenda ba ot pa Daudi, kara gilibe, man kara ginege kugweno: e Mikal, ma dhaku pa Daudi, yero ire, ewacu kumae, Tek ibodho kwo peri i diewor maeni ngo, urwo jubinegi.

¹²Kum kumeno Mikal uluro Daudi piny ku wang’ot: man ecidho, eringo de, e eboth.

¹³Man Mikal ugamu mungu m’acwia, man ekethe wi kavuto, eketho usau de mi yuk diegi i wie, man eume ku kendi.

¹⁴Man kinde ma Saul uoro jukwenda kara gigam Daudi, ewacu kumae, Kume lith.

¹⁵Man Saul uoro jukwenda unen Daudi, ewacu kumae, Kele malu i bang’a ku wi kavuto, kara anege.

¹⁶Man kinde ma jukwenda gimondo, nen, mungu m’acwia ni wi kavuto, kud usau mi yuk diegi yor i wie.

¹⁷Man Saul uwacu ni Mikal kumae, Nedi ibomba kumeno, man iweko jadegi para cidho, ketho ebothi? E Mikal uloko lembe ni Saul kumae, Ewacu ira kumae, Wek acidhi; pirang’o anegi?

¹⁸Nie Daudi ringo, eboth de, man ebino ba Samwil i Rama, man eyero ire lembe ceke ma Saul utimo i kume. Man gicidho giku Samwil gibedo i Naioth.

¹⁹E juyero ni Saul, juwacu kumae, Nen, Daudi ni i Naioth i Rama.

²⁰E Saul uoro jukwenda kara gimak Daudi: man kinde ma gineno udul jubila ma gibegiewo lembe, man Samwil m’ucungo i kumgi ni jawigi, Tipo pa Mungu bino wi jukwenda pa Saul, man gin bende giewo.

²¹Man giyero pire ni Saul, eoro jukwenda mange, e gin bende giewo. E Saul uoro jukwenda kendo wang’ adege, e gin bende giewo.

²²Elund ecidho bende i Rama, man ewok ba pi m’atong’a ma dit ma ni i Seku: man epenjo ewacu kumae, Samwil ku Daudi gini kani? Man ng’atu acel uwacu kumae, Nen, gini i Naioth i Rama.

²³Man ecidho kuca i Naioth i Rama: e Tipo pa Mungu bino i wie bende, man ecikuwotho ku ewo lembe, maram ebino ko i Naioth i Rama.

²⁴Man en bende ewodho kendi pare, e en de eewo lembe i wang’ Samwil, man evuto piny muneru i ceng’ maeca duu ku dieworne soro. Kum kumeno giwacu kumae, Saul bende ni i kind jubila?