Read Alur 1 Samwil 2 Bible Online

1 Samwil 2 - Alur bible

1 Samwil 2

¹Man Hana rwo, ewacu kumae: Adundena ufoire i Yehova; Judodo tunga i Yehova; Dhoga medre wi judegi para; Kum anyong’a nega i both peri.

²Ng’atu moko mbe ma leng’ calu Yehova; Kum ng’atu moko mbe m’umedo in, Kadok cana moko de mbe ma calu Mungu mwa.

³Kud wuwec ku kuhaya m’apila kumeno kendo; Kud wuwek tingri wok woko kud i dhogwu; Kum Yehova en e Mungu mi ng’eyong’ec, Man tic pore ni kume.

⁴Atum mi jurukara tur; Man ju m’ukier jutwio piergi ku tego.

⁵Man ju ma naka giyeng’ gimondo gigi i tic kara ginwang’ cemo; Man ju ma naka kec unegogi enegogi kendo ngo: Eyo, mugumba nyol abiro; Man ng’atu ma nyithindhe dupa jujwigo tego pare.

⁶Yehova nego, man eketho jubed kwo: Etero piny ba liel, man eting’o malu,

⁷Yehova nyayu can, man elonyo: Ejwigo, man eting’o bende.

⁸Eting’o jucan malu kud i utur, Eting’o ju ma can piny unegogi ku wi udhuru mi weyo, Kara gibed karacelo ku judongomawijo, Man gicam pacu mi komker mi dwong’: Kum mbegi m’i ng’om en e pa Yehova, Man eketho ng’om i wie.

⁹Ebigwoko tiend ju ma leng’ pare; Ento jubiketho judubo bedo ling’ i mudho; Kum ng’atu moko mbe ma bisagu ku tego.

¹⁰Ju m’upiembri ku Yehova bitur nziki nziki; Ebiwodho morpolo kud i polo i kumgi: Yehova bipoko lembe wi gund ng’om; Man ebimio tego ni ubimo pare; Man ebiyungo tung ng’atu m’ewiro.

¹¹Man Elkana cidho Rama ba ot pare. E nyathin maeno timo ni Yehova i wang’ Eli ma jalam.

¹²Nie wot Eli gi dhanu ma rac; ging’eyo Yehova ngo.

¹³Man kura mi julam ku dhanu ubedo, nia, kinde ma ng’atu moko thiero lam, jatic pa jalam bino, kinde ma ring’o bewali, ku gol mi ring’o ma lake adek i cinge;

¹⁴e eluthe i agulu dek, kadi i aole, kadi i dak, kadi i ajiku; man ring’o ceke ma jutong’o ku gol jalam gamu ku maeno. E gitimo kumeca i Cilo ni Juisraeli ceke m’ubino keca.

¹⁵Eyo, ma fodi gikuwang’u mio ngo, jatic pa jalam bino, man ewacu ni ng’atu m’ulamu lam kumae, Mi ring’o juvul ni jalam; kum eyenyo ngo egam ring’o m’ateda i beng’i, ento ma numu.

¹⁶Man tek ng’atuno wacu ire kumae, Gibikolar wang’u mio andha, e kan ibilund gamu ma calu cwinyi yenyo; ebilund wacu kumae, Ungo, ento ibimie ira kawono: man tek ungo, abigame ku tego.

¹⁷E dubo mir awobi maeno ubedo dit hai i wang’ Yehova; kum dhanune gicayu lam pa Yehova.

¹⁸Ento Samwil utimo i wang’ Yehova, m’e nyathin, m’ekendo ugoke ma nwang’.

¹⁹Man ke min utimo ire nyathi kanzu, man ekele i bang’e ku ba rundi ku ba rundi, kinde ma giidho malu karacelo ku cware kara githier lam ma ku ba rundi ku ba rundi.

²⁰Man Eli mio mugisa ni Elkana ku dhaku pare, man ewacu kumae, Yehova mi iri kodhi ni kum dhaku maeni kum penji ma jukwayu ba Yehova. Man gicidho ba ot migi gigi.

²¹Man Yehova liewo Hana, man egamu ie, e enyolo nyithindho ma co adek ku nyir ario. Man nyathin Samwil udongo i wang’ Yehova.

²²Nwang’u Eli ti dit; man ewinjo gin ceke ma wote timo bang’ Israel ceke, man maram givuto ko ku mon m’utimo tic dhugola mi hema mi cokri.

²³E ewacu igi kumae, Nedi wutimo wagi gin ma kumeno? kum awinjo pi timorac mu ma ba dhanu maeni ceke.

²⁴Ungo, wota; kum en e rwonglembe ma ber ungo m’awinjo: wuketho dhanu pa Yehova kier.

²⁵Tek ng’atu acel udubo ni wadi, Mungu bipoko lembe i wie; ento tek ng’atu moko dubo ni Yehova, ng’a ma bikwayu pire? Ento, giwinjo dwand weggi ngo, kum Yehova yenyo eneggi.

²⁶E nyathi Samwil ucikudongo, man emedre i bero ku Yehova, man ku dhanu bende.

²⁷Man dhanu pa Mungu bino ba Eli, man ewacu ire kumae, Yehova wacu kumae, Anyuthra gira ngo ni ot pa wuru, kinde ma gini i Misiri i ng’eca ni ot pa Farao?

²⁸man agoyo wie ngo kud i suru pa Israel ceke kara ebed jalam para, kara eidh malu ba pemblam para, kara ewang’ udok ma ng’wice ng’ar, man kara ekend ugoke i wang’a? man dmio lam ceke ngo mi nyithindho mir Israel ma jutimo ku mac ni ot pa wuru?

²⁹Pirang’o wucwanyu lam para man girathiera para, m’ang’olo i kabedo para, man iyungo woti ma sagu ali, kara wucweru giwu ku girathiera ceke ma cu mi dhanu para Israeli?

³⁰Ka kumeno Yehova, Mungu mir Israel, uwacu kumae, Awacu andha nia ot peri, ku ot pa wuru, biwotho i wang’a mi nja: ento kawono Yehova wacu kumae, Dong’ ebed bor ira; kum ju m’uyunga abiyungogi, man ju m’ucaya jubikwanugi ni gin moko ngo.

³¹Nen, ceng’ ubino, m’abithumo ie boti woko, man bot ot pa wuru, man ng’atu moko m’uti kud ubed nuti i ot peri.

³²Man ibineno lem ma tek mi kabedo para, i lonyo ceke ma Mungu bimio ni Israel; man ng’atu m’uti bibedo i ot peri ngo mi nja.

³³Man ng’atu ma ni i beng’i, m’abikabu woko ngo ku ba pemblam para, bibedo mi camu weng’i, man mi nyayu can i adundeni; man medri ceke m’i ot peri bitho i kind rundi migi.

³⁴Man maeni bibedo ni giranyutha iri, ma bibino wi woti ario, wi Hofni giku Finehaz: i ceng’ acel gibitho gin ario.

³⁵Man abiting’o ira jalam mandha, ma bitimo calku maeno ma ni i adundena man i pidoia: man abigomo ire ot ma tek; man ebiwotho i wang’ ng’atu m’awiro mi nja.

³⁶Man ebitimbre, nia ku ba dhanu ceke m’udong’ i ot peri ebibino ebirum piny ire pi sente mi mola ma tar man pi lungu kwen, man ebiwacu kumae, Akwei, ketha i tic moko ma pa jalam, kara acam nyathi kwen moko.