Read Alur 1 Samwil 22 Bible Online

1 Samwil 22 - Alur bible

1 Samwil 22

¹Ka kumeno Daudi ai kukeca man eringo ba odng’om mir Adulam: man kinde ma utumin mire ku ot pa won ceke giwinjo maeni, giloro piny kuca i bang’e.

²Man ku ba dhanu ceke ma lembe ni i wigi, man ku ba dhanu ceke ma jurubanja, man ku ba dhanu ceke ma lembe dieng’o ewinygi, gicokri gigi i bang’e; man edoko ni jego i wigi: man dhanu ma ni bang’e giyenyo romo dak ang’wen.

³Man Daudi ai kukeca ecidho Mizpa mi Moab: man ewacu ni ubimo mi Moab kumae, Akwei, wek vwa ku ma gibin gibed i beng’i, maram ang’ei ko gin ma Mungu bitimo ira.

⁴Man ekelogi i wang’ ubimo mi Moab: man gibedo i bang’e cil i nindo ceke ma Daudi ni ie i ka ma tek.

⁵Man jabila ma Gad uwacu ni Daudi kumae, Kud ibed i ka ma tek; ai, man icidh i ng’om Yuda. Daudi lund uai, man ebino i luli mi Hereth.

⁶Man Saul uwinjo nia junwang’u Daudi, ku dhanu ma ni bang’e: nwang’u Saul ubedo i Gibeya, the yen ma ni i Rama, ku tong’ pare i cinge, man jutic pare ceke gicungo i kume.

⁷Man Saul uwacu ni jutic pare m’ucungo i kume kumae, Wuwinj kawono, wu Jubenyamini; wod Yese bimio iwu pothi ku pothi mir ulok kubeng’wu kubeng’wu, ebiketho wun ceke ni jego mi rubanga man jego mi daki,

⁸ma nia wun ceke wupid lembe i kuma, man ng’atu moko mbe m’utuco ira kinde ma woda timo lembariba ku wod Yese, man ng’atu moko mbe i kindwu ma can unege i kuma, kadi m’utuco ira nia woda upiko lembe i jatic para i kuma, kara ekan adhi, calu ma tini?

⁹E Doeg ma Jaedomi, m’ucungo vut jutic pa Saul, ulund uloko lembe man ewacu kumae, Aneno wod Yese ubino i Nob, bang’ Ahimelek ma wod Ahitub.

¹⁰Man epenjo Yehova pire, emio ire cemo de, man emio ire palamularu pa Goliath ma Jafilisti.

¹¹Ubimo lund uoro kwenda kara ulwong’ Ahimelek ma jalam, ma wod Ahitub, ku ot pa won ceke, gi julam ma gini i Nob: e gin ceke gibino bang’ ubimo.

¹²Man Saul uwacu kumae, Winj kawono, in i wod Ahitub. Man eloko lembe kumae, rwoth para, Anuti.

¹³Man Saul uwacu ire kumae, Wupido lembe i kuma nedi, wuku wod Yese, m’imio ko ire kwen, ku palamularu, man ipenjo Mungu pire, kara ejai ira, ekan adhi, calu ma tini?

¹⁴Ahimelek ulund uloko lembe ni ubimo, man ewacu kumae, E ka ng’a m’i kind jutic peri ceke m’ubedo mandha kumeno calu Daudi, ma en e jalwod ubimo, ma jugame i lembapora peri, man en e mi yung i ot peri?

¹⁵Atheko penjo Mungu pire tini? dong’ ebed bor i kuma: ubimo kud uketh lembe moko i wi jatic pare, kadi wi ot pa vwa ceke; kum jatic peri ng’eyo gin moko ngo kum lembe maeni ceke, ma nok kadi ma dit.

¹⁶Man ubimo wacu kumae, Ibitho andha, Ahimelek, in, ku ot pa wuru ceke.

¹⁷Man ubimo wacu ni jukur m’ucungo i vute kumae, Wulokru, man wuneg julam pa Yehova; kum cinge bende ni karacelo ku Daudi, man kum ging’eyo nia eringo, man gituco ira ngo. Ento jutic p’ubimo giyenyo ngo giriei cing’gi ma gipodh ko wi julam pa Yehova.

¹⁸Man ubimo wacu ni Doeg kumae, Lokri, man ipodh wi julam. E Doeg ma Jaedomi lokre, man epodho wi julam, man enego dhanu pier abora wi abic i ceng’ maeca ma kendo ugoke mi bongu ma nwang’.

¹⁹Man Nob, m’adhura mi julam, egoyo ku lak palamularu, co ku mon, nyithindho ku mukere, man ku koni dhiang’ man kana ku rombe, ku lak palamularu.

²⁰Man ng’atu acel ma kind wot Ahimelek, ma wod Ahitub, ma julwong’o Abiathar, uboth, man eringo tok Daudi.

²¹Man Abiathar uyero ni Daudi nia Saul unego julam pa Yehova.

²²Man Daudi wacu ni Abiathar kumae, Ang’eyo i ceng’ maeca, kinde ma Doeg ma Jaedomi ni keca, nia ebiyero ni Saul andha: akelo tho an wi dhanu ceke m’i ot pa wuru.

²³Wabed wakudi, lworo kud unegi; kum ng’atu m’ubeyenyo kwo para ebeyenyo kwo peri: kum ibibedo museme karacelo kuda.