Read Alur 1 Samwil 23 Bible Online

1 Samwil 23 - Alur bible

1 Samwil 23

¹Man giyero ni Daudi, giwacu kumae, Nen, Jufilisti gibetimo ali kum Keila, man gibeyaku lelacam.

²Ka kumeno Daudi penjo ba Yehova, ewacu kumae, Abicigoyo Jufilisti maeni? Man Yehova wacu ni Daudi kumae, Cidhi, man igoi Jufilisti, man ilar Keila.

³E dhanu pa Daudi giwacu ire kumae, Nen, lworo negowa kakeni i Yuda: e ka tek wacidhu ba Keila kum njuru asikari mi Jufilisti ke lworo binegowa kani?

⁴Daudi lund upenjo Yehova kendo. E Yehova loko ire lembe, man ewacu kumae, Ai, lor piny ba Keila; kum abimio Jufilisti i cingi.

⁵Man Daudi ku dhanu pare gicidho Keila, man gikiedo ku Jufilisti, man giyaku lim migi, ginegogi de ku nek ma dit. Kum kumeno Daudi bodho ju m’ubedo i Keila.

⁶Man etimbre, kinde ma Abiathar ma wod Ahimelek uringo ba Daudi i Keila, nia eloro piny kud ugoke i cinge.

⁷Man juyero ni Saul nia Daudi bino Keila. Man Saul uwacu kumae, Mungu mie i cinga; kum juciko bang’e, kum emondo i adhura ma dhugange kud utwindine de nuti.

⁸Man Saul ulwong’o dhanu mir ali ceke, kara gilor piny ba Keila gitiek Daudi ku dhanu pare kud ali.

⁹E Daudi ng’eyo nia Saul ubepido lembe i kume; man ewacu ni Abiathar ma jalam kumae, Kel ugoke keni.

¹⁰Daudi lund uwacu kumae, E Yehova, Mungu mir Israel, jatic peri winjo andha nia Saul uyenyo ebin Keila, kara enyoth adhurane ni kuma.

¹¹Dhanu m’i Keila gibimia i cinge? Saul biloro piny, calu jatic peri winjo? E Yehova, Mungu mir Israel, akwei, wac ni jatic peri. Man Yehova wacu kumae, Ebiloro piny.

¹²Daudi lund uwacu kumae, Dhanu m’i Keila bimia ku dhanu para i cing’ Sauli? Man Yehova wacu kumae, Gibimii.

¹³E Daudi ku dhanu pare, ma yenyo romo dak abusiel, giai giweko Keila, man gicidho i ka ma gicopo cidho i ie. Man juyero ni Saul nia Daudi lui ku i Keila; e ekwero ku jucidhi.

¹⁴E Daudi bedo i langa i ka ma tek, man edong’ i ng’om gudi i langa mi Zif. E Saul uyenye ceng’ ceke, ento Mungu mie i cinge ngo.

¹⁵E Daudi neno nia Saul uwok woko kara eyeny kwo pare: man Daudi ni i langa mi Zif i luli.

¹⁶Man Yonathan ma wod Saul, eai, man ecidho ba Daudi i luli, e edwoko cinge tek ni kum Mungu.

¹⁷Man ewacu ire kumae, Lworo kud unegi; kum cing’ Saul ma vwa binweng’i ngo; man ibibedo ubimo wi Israel, e abilubi; e Saul ma vwa bende ng’eyo maeni.

¹⁸E gin ario gitimo lembariba i wang’ Yehova: man Daudi bedo i luli, man Yonathan udok i ot pare.

¹⁹Juzifi gilund giidho malu ba Saul i Gibeya, giwacu kumae, Daudi pondo i bang’wa i ka ma tek mi luli, i got Hakila, ma en e yor ariwa ma piny ni ng’om ngele ngo?

²⁰Ka kumeno kawono, E ubimo, lor piny, calku yeny mi ng’eyong’ec peri m’iyenyo ilor ko; e lem mwa en e wodhe ku kethe i cing ubimo.

²¹Man Saul uwacu kumae, Mugisa pa Yehova kwanywu; kum ngisi negowu i kuma.

²²Akwayuwu, wucidhi, wuketh lembe dok tek m’usagu, man wung’ei wunen kakare ka m’epondo i ie, man ng’a m’unene keca; kum juyero ira nia etimo ku rieko ma dit.

²³Ka kumeno wunen, man wung’ei kapondo ceke m’epondo i ie, man wubin kendo i bang’a andha, e wabicidho wakudu: man ebitimbre, tek ebedo i ng’om, nia abiyenye i kind rubanga ceke mi Yuda.

²⁴E giai, man gicidho i Zif i wang’ Saul: ento Daudi ku dhanu pare gini i langa mi Maon, i Araba yor ariwa ma piny ni ng’om ngele.

²⁵E Saul ku dhanu pare gicidho yenye. Man giyero ni Daudi: ka kumeno eloro piny ba cana, man ebedo i langa mi Maon. Man ka Saul uwinjo kumeno, elubo tok Daudi i langa mi Maon.

²⁶E Saul ucidho i ng’et got kurucel, e Daudi ke ku dhanu pare ng’et got mucelo: man Daudi bino pio kara evudhre ni lworo pa Saul; kum Saul ku dhanu pare gitieko Daudi ku dhanu pare gbur kara gimakgi.

²⁷Ento jakwenda bino ba Saul, ewacu kumae, Tim pio, man ibin; kum Jufilisti giting’o mony wi ng’om.

²⁸Kum kumeno Saul udok ku ba lubo tok Daudi, man ecidho kum Jufilisti: ka kumeno julwong’o kakeca Selahamalekoth.

²⁹E Daudi idho malu kukeca, man ebedo i ka ma tek mir En-gedi.