Read Alur 1 Samwil 24 Bible Online

1 Samwil 24 - Alur bible

1 Samwil 24

¹Man etimbre, kinde ma Saul ulokre ku ba lubo Jufilisti, nia juyero ire, juwacu kumae, Nen, Daudi ni i langa mir En-gedi.

²Saul ulund ugamu dhanu rubanga adek ma jugoyo wigi kud i Israel ceke, man giyenyo Daudi ku dhanu pare wi cana mi diegi m’i thim.

³Man ewok ba kakwac mi rombe dhu yo, ka ma odng’om ni ie; e Saul umondo kara eum tiende. Nwang’u Daudi ku dhanu pare gibedo yor i odng’ombe.

⁴E dhanu pa Daudi giwacu ire kumae, Nen, ceng’ ma Yehova yero iri pire kumae, Nen, abimio jadegi peri i cingi, man ibitimo i kume calu ebedo ber iri. Daudi lund uai malu, man ethumo dhu kanzu pa Saul moth moth.

⁵Man etimbre yo ku ng’eye, nia cwiny Daudi pido, kum ethumo dhu kendi pa Saul.

⁶Man ewacu ni dhanu pare kumae, Yehova kwer nia kud atim gin maeni kum rwoth para, ma ng’atu ma Yehova wiro, ya aketh cinga i kume, kum en e ng’atu ma Yehova wiro.

⁷Kum kumeno Daudi cero dhanu pare ku lembe maeni, man eyio igi ngo nia gitim ali kum Saul. E Saul uai malu kud i odng’ombe, man ecidho i yo pare.

⁸Daudi bende ai malu yo ku ng’eye, man eai kud i odng’ombe, e elwong’o tok Saul, ewacu kumae, Rwoth para m’ubimo. Man ka Saul uneno yor i ng’eye, Daudi riebre piny i ng’om, man ejwigre.

⁹Man Daudi wacu ni Saul kumae, Nedi iwinjo lembe mi dhanu, ma giwacu kumae, Nen, Daudi yenyo etimi raci?

¹⁰Nen, tin weng’i neno maram Yehova ting’i ko tin i cinga i odng’om: man jumoko wacu ira nia anegi; ento aweki; man awacu kumae, Abirieyo cinga ngo kum rwoth para: kum en e ng’atu ma Yehova wiro.

¹¹Mange ke, vwa, nen, eyo, nen dhu kanzu peri ni i cinga; kum athumo dhu kanzu peri, man anegi ngo, e dong’ ing’ei inen de nia kadok dubo kadi kier de mbe i cinga, man adubo iri ngo, kadok ibeyenyo kwo para kara imake.

¹²Yehova pok lembe i kindwa wakudi, man Yehova cul kwoja i kumi; ento cinga bibedo i kumi ngo.

¹³Calu lembayera mi ju ma con uwacu kumae, Dubo wok woko ku i judubo; ento cinga bibedo i kumi ngo.

¹⁴Ubimo mir Israel ulubo tok ng’a? iberiemo tok ng’a? tok gwok m’utho, tok kukun.

¹⁵Ka kumeno Yehova bed japoklembe, man eng’ol lembe i kindwa wakudi, man enen, ecung i kuma de, man ebodha kud i cingi.

¹⁶Man etimbre, kinde ma Daudi daru weco lembe maeni ni Saul, nia Saul uwacu kumae, Maeni dwendi, woda ma Daudi? Man Saul uting’o dwande malu, e eywak.

¹⁷Man ewacu ni Daudi kumae, In i pwe ma sagu an; kum iculo ira ber, ma an ke aculo iri rac.

¹⁸Man inyutho tin maram itimo ko ber i kuma, kum nwang’u Yehova ting’a i cingi, ere inega ngo.

¹⁹Kum tek ng’atu moko nwang’u jadegine, ebiweko ecidho museme? kum kumeno dong’ Yehova utimi ber kum maeni m’itimo i kuma tin.

²⁰Man kawono, nen, ang’eyo nia ibibedo ubimo andha, man nia ker mir Israel bicungo i cingi.

²¹Ka kumeno kawono kwong’ ira ku Yehova, nia ibikabu kodhina woko ngo yo ng’eya, man nia ibinyotho nyinga ngo kud i ot pa vwa.

²²E Daudi kwong’o ni Saul. E Saul udok i pacu pare; ento Daudi ku dhanu pare giidho malu i ka ma tek.