Read Alur 1 Samwil 25 Bible Online

1 Samwil 25 - Alur bible

1 Samwil 25

¹E Samwil utho; man Israel ceke gicokri karacelo, man giywage, e giyike i ot pare i Rama. Man Daudi ai, man eloro piny i langa mi Paran.

²E ng’atu moko nuti i Maon, ma piny pore ni i Karmel; e ng’atuno dwong’ dit, man rombe pare rubanga adek, diegi pare ke rubanga acel: man ebenyaru yuk rombe i Karmel.

³Nie nying’ ng’atuno Nabal; man nying’ dhaku pare Abigail; man dhakune ng’eyong’ec pare ber, man wang’e leng’: ento ng’atu ma nicone pire rac man timo pare en e gondri; en e nyakwar Kaleb.

⁴Man Daudi winjo kud i langa nia Nabal ubenyaru yuk rombe pare.

⁵Man Daudi oro awobi apar, man Daudi wacu ni awobinegi kumae, Wucidh wuidh ba Karmel, man wucidh ba Nabal, e wumothe ku nyinga:

⁶e wubiwacu kumae ni ng’atu ma bedo pare miero, Kwiocwiny ubed i beng’i, man kwiocwiny ubed ba ot peri, man kwiocwiny ubed ba gin ceke m’ibedo ko

⁷E kawono awinjo nia junyar yuk rombe nuti kudi: jukwac peri bedo karacelo kudwa, man watimogi rac ungo, kadoc gin moko de mbe m’urem igi i nindo ceke ma gini i Karmel.

⁸Penj awobi peri, e gibiyero iri: kum kumeno wek awobi maeni unwang’ bero i weng’i; kum wabino i ceng’ ma ber: akwei, mi gin ma tec uwok i cingi ni jutic peri, man ni wodi ma Daudi.

⁹E kinde ma awobi pa Daudi giwok, giyero ni Nabal calku lembe maeni ceke ku nying’ Daudi, e giling’.

¹⁰Man Nabal uloko lembe ni jutic pa Daudi, man ewacu kumae, Daudi en e ng’a? man wod Yese en e ng’a? jutic dupa nuti m’ujai i nindo maeni ng’atuman ni jadit pare man ni jadit pare.

¹¹Abilund gamu kwen para, ku pi para, man ring’o para m’anego ni junyar yuk rombe para, man abimie ni dhanu m’ang’eyo pi ka ma giai i ie ngo?

¹²Kum kumeno awobi pa Daudi gilokri i yo migi, e gidok, man gibino giyero ire calku lembe maeni ceke.

¹³E Daudi wacu ni dhanu pare kumae, Wutwi palamularu mu kubeng’wu kubeng’wu. E gitwio palamularu migi kubang’gi kubang’gi; man Daudi bende twio palamularu pare: man dhanu ma yenyo romo dak ang’wen giidho malu tok Daudi; man dak ario gibedo kum jamni.

¹⁴Ento ng’atu acel ma kind awobine uyero ni Abigail, ma dhaku pa Nabal, ewacu kumae, Nen, Daudi oro jukwenda kud i langa nimotho jadit mwa; e emor i wigi.

¹⁵Ento dhanune gitimo ber dit i bang’wa, man jutimowa rac ungo, kadok gin moko de urem iwa ngo, cil ma wawotho wakugi, kinde ma wani i thim:

¹⁶gibedo ni gang’kidi iwa diewor ku dieceng’, i nindo ceke ma wanuti wakugi ma wabekwayu rombe.

¹⁷Ka kumeno kawono ing’ei man ipid pi gin m’ibitimo kum jukeco lem ma rac kum jadit mwa, man kum ot pare ceke: kum en e ng’atu m’adhura ma kumeno, ma ng’atu moko mbe ma copo weco kude.

¹⁸E Abigail utimo pio, man egamu kwen m’ang’ina dak ario, man cupa mi pigulok ario, ku rombe abic m’ayang’a, man mukero abic mi cam m’acela, man njuru nyingulok m’uthwo dak acel, man kwend nyingubolo m’uthwo dak ario, man ekethogi wi kana.

¹⁹E ewacu ni awobi pare kumae, Cidh i wang’a; nen, alubo tokwu. Ento eyero ni cware ma Nabal ungo.

²⁰Man ebedo kumeno, kan ewotho ku wi kana pare, man eloro piny ba ng’et got, nia, nen, Daudi ku dhanu pare giloro piny i bang’e; e erombo kugi.

²¹Nwang’u Daudi wacu kumae, Andha agwoko gin ceke ma janduni bedo ko i langa mananu, ketho nia gin moko rem ungo i kind piny pare ceke: man edwoko lem ma rac ira kum lem ma ber.

²²Mungu tim kumeni kum judegi pa Daudi, man m’usagu bende, tek aweko i kind piny ceke ma pare nyathin ma nico acel i kinde mi kugweno.

²³E kinde ma Abigail uneno Daudi, etimo pio, man eloro ku wi kana pare, e epodho arieba wang’e i wang’ Daudi, man erum gire i ng’om.

²⁴E epodho piny the tiende, man ewacu kumae, Rwoth para, i wia, kier maeni bed i wia; man akwei, wek bong’ peri yer i ithi, man iwinj lembe pa bong’ peri.

²⁵Akwei, rwoth para kud wupid pi ng’atu maeni m’adhura, en e Nabal; kum calu nyinge bedo, ebedo kumeca; nyinge Nabal, man adhura ni karacelo kude: ento an m’a bong’ peri aneno awobi pa rowth para ngo, m’ioro.

²⁶Ka kumeno kawono, rwoth para, calu Yehova bedo kwo, man calu ng’eyong’ec peri bedo kwo, kum Yehova ceri ku ewiro rimo, man ku culo kwor peri giri ku cingi, ka kumeno kawono dong’ judegi peri, man ju m’uyenyo lem ma rac utimbre kum rwoth para, gibed calu Nabal.

²⁷Man kawono giramia maeni ma jatic peri kelo ba rwoth para, wek jumie ni awobi m’ulubo rwoth para.

²⁸Akwei, wek kier pa bong’ peri: kum Yehova bitimo ot ma tek ni rwoth para andha, kum rwoth para kiedo lwiny pa Yehova; man jubinwang’u dubo ngo i beng’i i ceng’ peri ceke.

²⁹Man kadok ng’atu moko wodhre kara eriemi, man eyeny ng’eyong’ec peri, ento ng’eyong’ec pa rwoth para bibedo atwia i lungu kwo karacelo ku Yehova Mungu peri; man ebicanyu ng’eyong’ec mi judegi peri woko, calu kud i thondh jungbe.

³⁰Man ebitimbre, kinde ma Yehova daru timo ni rwoth para calu gin ma ber ceke m’eyero pire, man edaru kethi ni jaditmawijo wi Israel,

³¹nia maeni bibedo ni can iri ngo, kadi kier mir adunde ni rwoth para, kadok nia icwiro rimo m’umbe lembe, kadi nia rwoth para culo kwoje gire. Man kinde ma Yehova daru timo ber kum rwoth para, ilund ipoi pi bong’ peri.

³²Man Daudi wacu ni Abigail kumae, Mugisa bed ni Yehova, Mungu mir Israel, m’uori tinuni kara waromb wakudi:

³³man mugisa bed kum rieko peri, mugisa bed i wii de, m’ucera tinuni kucwiro rimo, man kuculo kwoja gira ku cinga.

³⁴Kum andha, calu Yehova, Mungu mir Israel, bedo kwo, m’ucera kutimi rac, dok ibino pio irombo kuda ngo, nwang’u gin moko mbe m’udong’ ni Nabal andha urwo kugweno ma calu nyathin ma nico de ngo.

³⁵Kum kumeno Daudi jolo gin m’ekelo i bang’e: man ewacu ire kumae, Dok malu i ot peri ma cwinyi kwio; nen, a winjo dwendi, man ajoli.

³⁶E Abigail udwogo ba Nabal; man, nen, eketho agba i ot pare, calu agba mir ubimo; e anyong’a nego Nabal ku yor i adundene, kum emer dit ku kong’o: kum kumeno eyero ire gin moko ngo, ma nok kadi ma dit, maram piny uru ko.

³⁷Man etimbre kugweno, kinde ma pigulok uthum i kum Nabal, nia dhaku pare yero ire lembe maeni, e adundene tho yor i ie, man edoko calu kidi.

³⁸Man etimbre yo ng’ei nindo apar, nia Yehova goyo Nabal, ketho nia etho.

³⁹E kinde ma Daudi winjo nia Nabal utho, ewacu kumae, Mugisa bed ni Yehova, m’ecungo i kuma pi cac para m’i cing’ Nabal, man ecero jatic pare kudubo: e Yehova dwoko dubo pa Nabal i wie gire. Man Daudi oro kwenda man eyero pi Abigail, kara egame ire ni dhaku.

⁴⁰Man kinde ma jutic pa Daudi giwok bang’ Abigail i Karmel, giyero ire, giwacu kumae, Daudi orowa i beng’i, kara wagemi ire ni dhaku.

⁴¹Man eai malu, e erum arieba wang’e i ng’om, man ewacu kumae, Nen, bong’ peri en e jatic mi lwoko tiend jutic pa rwoth para.

⁴²E Abigail utimo pio, man eai, ewotho de ku wi kana, ku nyir pare abic m’ulube; e elubo tok jukwenda pa Daudi, man edoko dhaku pare.

⁴³Daudi gamu Ahinoam ma Yezrel bende; e gin ario gidoko mon pare.

⁴⁴Nwang’u Saul umio Mikal ma nyare, ma dhaku pa Daudi, ni Palti ma wod Laie, ma ni i Galim.