Read Alur 1 Samwil 26 Bible Online

1 Samwil 26 - Alur bible

1 Samwil 26

¹Daudi Kwero Nego Saul i Zif Man Juzifi gibino ba Saul i Gibeya, giwacu kumae, Daudi pondo kind got mi Hakila, ma ni i wang’ ng’om ngele ngo?

²E Saul uai malu, man eloro piny i langa mi Zif, m’ebedo ku dhanu rubanga adek ma jugoyo wigi mir Israel karacelo kude, kara eyeny Daudi i langa mi Zif.

³Man Saul ugonjo kind got mi Hakila, ma ni i wang’ ng’om ngele, dhu yo. Ento Daudi bedo i langa, man eneno nia Saul ulubo toke i langa.

⁴Ka kumeno Daudi oro julib, man eng’eyo nia Saul ubino andha.

⁵E Daudi ai, man ebino i ka ma Saul ugonjo i ie; man Daudi neno ka ma Saul uvuto i ie, kud Abner ma wod Ner, ma jego mir udul pare: man Saul uvuto i kaka magali, man dhanune gigonjo i ng’ete gbur.

⁶Daudi lund uloko lembe man ewacu ni Ahimelek ma Jahiti, man ni Abicai ma wod Zeruia, m’umin Yoab, ewacu kumae, Ng’a ma wabiloro piny wakugi ba Saul i kagonjo? E Abicai uwacu kumae, Wabiloro wakudi.

⁷Kum kumeno Daudi gikud Abicai gibino ba dhanune ku diewor: man, nen, Saul uvuto unindo i kaka magali, ku tong’ pare agura the wie; man Abner ku dhanu givuto i ng’ete gbur.

⁸Abicai lund uwacu ni Daudi kumae, Mungu ting’o jadegi peri i cingi tin: ka kumeno kawono, akwei, wek acobe ku tong’ cik i ng’om wang’ acel, man abicobe wang’ ario ngo.

⁹Man Daudi wacu ni Abicai kumae, Kud inyothe; kum ng’a ma copo ketho cinge kum ng’atu ma Yehova wiro, ma dubo bedo umbe kude?

¹⁰Man Daudi wacu kumae, Calu Yehova bedo kwo, Yehova bigoye; Icadi ceng’ pare biwok mi tho; kadi ebiloro piny i lwiny, man ebirwinyo;

¹¹Yehova kwer nia aketh cinga kum ng’atu ma Yehova wiro: ento, akwei, gam tong’ ma ni the wie, ku cupa mi pi, man wek wacidhi.

¹²Kum kumeno Daudi gamu tong’ ku cupa mi pi ku the wi Saul; man gicidho: man ng’atu moko mbe m’uneno maeni, kadi m’ung’eyo, kadok ng’atu moko m’uceu de mbe; kum kagi ceke ginindo kum nindo ma pek m’uai ba Yehova podho i wigi.

¹³Daudi lund ukadhu lokaca, man ecungo wi got ku bor; ma kindgi ng’adu;

¹⁴man Daudi lwong’o ba dhanune, man bang’ Abner ma wod Ner, ewacu kumae, Idwoko lembe ngo, Abneri? Abner ulund uloko lembe man ewacu kumae, In i ng’a m’ilwong’o bang’ ubimo?

¹⁵E Daudi wacu ni Abner kumae, In i ng’atu ma jarukara ngo? man ng’a ma calu in i kind Israeli? ka kumeno igwoko rwoth peri m’ubimo ngo nedi? kum ng’atu moko ma kind dhanu mondo kara enyoth rwoth peri.

¹⁶Gin maeni m’itimo e ber ungo. Calu Yehova bedo kwo, wuromo ku tho, kum wukuro kum rwoth mu ngo, ma ng’atu ma Yehova wiro. Man kawono nen ka ma tong’ p’ubimo ni ie, ku cupa mi pi ma ni the wie.

¹⁷Man Saul ung’eyo dwand Daudi, man ewacu kumae, Maeni dwendi, woda, Daudi? Man Daudi wacu kumae, En e dwanda, rwoth para, E ubimo.

¹⁸Man ewacu kumae, Nedi rwoth para riemo tok jatic pare? kum atimo ang’o? kadi dubo ang’o ma ni i cinga?

¹⁹Ka kumeno kawono, akwei, wek rwoth para m’ubimo winj lembe pa jatic pare. Tek en e Yehova m’unyayu lembe ii i kuma, wek ejol girathiera: ento tek en e nyithindho mi dhanu, kwong’ ubed i wigi i wang’ Yehova; kum giriema woko i ceng’ maeni kara kud amok kum aba pa Yehova, giwacu kumae, Cidhi, tim ni mungu mange.

²⁰Ka kumeno kawono, rimba kud ucwir i ng’om bor ku ka ma Yehova ni i ie: kum ubimo mir Israel uwok niyenyo kukun, calu ng’atu m’ubeyenyo aywer kind gudi.

²¹Saul ulund uwacu kumae, Adubo: dwogi, woda Daudi; kum abitimi rac kendo ngo kum pi kwo para bedo tek i weng’i tin: nen, atimo calu adhura, e akier apila.

²²E Daudi loko lembe man ewacu kumae, Nen, tong’, E ubimo! dong’ jalawobi acel ukadh lokani ubin ugame.

²³Man Yehova biculo ni dhanu kubang’gi kubang’gi ng’atuman bedopwe pare, man mandha pare; kum nwang’u Yehova mii i cinga tinuni, man ayenyo ngo aketh cinga kum ng’atu ma Yehova wiro.

²⁴Man, nen, calu pi kwo peri bedo tek i wang’a tini, e kumeno dong’ kwo para de pire bed tek i wang’ Yehova, man dong’ ebodha kud i lem ma tek ceke.

²⁵Saul ulund uwacu ni Daudi kumae, Mugisa bed i wii, woda Daudi: ibitimo ku tego, man ibisagu andha. Kum kumeno Daudi cidho i yo pare, man Saul udok kakare.