Read Alur 1 Samwil 28 Bible Online

1 Samwil 28 - Alur bible

1 Samwil 28

¹Man etimbre i ceng’ maeca, nia Jufilisti gicoko udul migi karacelo mir ali, kara gikied kud Israel. Man Akic uwacu ni Daudi kumae, Dong’ ing’ei andha, nia wabicidho wakudi kind udul, in ku dhanu peri.

²E Daudi wacu ni Akic kumae, Ka kumeno ibing’eyo gin ma jatic peri bitimo. Man Akic uwacu ni Daudi kumae, Ka kumeno abikethi ni jakur wia mi nja.

³ Nwang’u Samwil utho, man Israel ceke giywage, man giyike i Rama, en e adhura pare ma dhe. Man Saul ukabu weg pajogi, ku weg ajoga, woko kud i ng’ombe.

⁴E Jufilisti gicokri gigi karacelo, man gibino gigonjo de i Cunem; e Saul ucoko Israel ceke karacelo, man gigonjo i Gilboa.

⁵Man kinde ma Saul uneno udul Jufilisti, lworo nege, man adundene miel dit.

⁶Man ka Saul upenjo ba Yehova, Yehova loko ire lembe ngo, kadok ku lek, kadi kud Urim, kadi ku jubila.

⁷Saul ulund uwacu ni jutic pare kumae, Wuyeny ira ka dhaku m’ajoga, kara acidh i bang’e, man apenj i bang’e. Man jutic pare giwacu ire kumae, Nen, dhaku ma won ajoga ni i En-dor.

⁸Man Saul uranjre, man eronyo kendi mange, ecidho de, giku dhanu ario gikude, man gibino ba dhakune ku diewor: man ewacu kumae, Cu ira, akwei, kud ajoga, man ikel malu i bang’a ng’atu m’abilwong’o nyinge iri.

⁹Man dhakune wacu ire kumae, Nen, ing’eyo gin ma Saul utimo, maram ekabu ko ju m’ajoga, ku jubila de, kud i ng’ombe: kum kumeno iketho uwic ni kwo para nedi, kara uketh atho?

¹⁰Man Saul ukwong’o ire ku Yehova, ewacu kumae, Calu Yehova bedo kwo, masendi moko mbe ma biwok i kumi kum gin maeni.

¹¹E dhakune lund uwacu kumae, Ng’a m’akel malu i beng’i? Man ewacu kumae, Kel Samwil malu i bang’a.

¹²Man kinde ma dhaku neno Samwil, ekok ku dwande ma tek; e dhakune wacu ni Saul, ewacu kumae, Ibomba nedi? kum in i Saul.

¹³Man ubimo wacu ire kumae, Lworo kud unegi: kum ineno ang’o? Man dhakune wacu ni Saul kumae, Aneno mungu moko beidho malu kud i ng’om.

¹⁴Man ewacu ire kumae, Ayine nenedi? Man ewacu kumae, Ng’atu m’uti uidho malu: man ebedo auma ku kanzu. E Saul ung’eyo nia en e Samwil, man erum arieba wang’e i ng’om, man erwo.

¹⁵E Samwil uwacu ni Saul kumae, Isenda nedi, m’iting’a ko malu e? E Saul uloko lembe kumae, Cwinya ng’abre dit; kum Jufilisti uting’o lwiny i kuma, man Mungu ai i bang’a, eloko lembe de ira kendo ngo, kadok ku jubila, kadok ku lek: ka kumeno alwong’i, kara iketh ang’ei gin m’abitimo.

¹⁶Man Samwil uwacu kumae, Kum kumeno ipenja nedi, kum Yehova ai i beng’i, man edoko ni jadegi peri?

¹⁷Man Yehova timo i beng’i, calu eyero kud i dhoga: man Yehova yeco ker kud i cingi, emie de ni jadhugola peri, en e ni Daudi.

¹⁸Kum iworo dwand Yehova ngo, man itimo kwinyo pare ma lake tek ungo wi Amelek, kum kumeno Yehova timo gin maeni i kumi ceng’ maeni.

¹⁹Mange ke Yehova bimio Israel bende karacelo kudi i cing’ Jufilisti; man urwo wuku woti wabibedo karacelo wakudu: Yehova bimio udul Israel bende i cing’ Jufilisti.

²⁰E Saul upodho ngada arieba wang’e ka dhoge nica, man lworo nege dit, kum lembe pa Samwil: man tego moko mbe i ie; kum ecamu kwen ungo ceng’ duu, kadi diewor soro.

²¹Man dhakune bino ba Saul, man eneno nia cwinye ng’abre dit, e ewacu ire kumae, Nen, bong’ peri winjo dwendi, man akuno kwo para, man awinjo dwendi m’iyero ira.

²²Ka kumeno kawono, akwei, winj dwand bong’ peri bende, man wek aketh kwen moko i weng’i; icam, kara ibed tek, kan icidh i yo peri.

²³Ento ekwero, man ewacu kumae, Abicamu ngo. Ento jutic pare, giku dhakunegi, gicuke; e ewinjo dwandgi. Kum kumeno eai kud i ng’om, man ebedo wi kavuto.

²⁴E dhakune bedo ku nyathi dhiang’ ma ful ful i ot; man etimo pio, enege de; man egamu mogo, emiene de, man etede ni kwen ma thobi mbe i ie:

²⁵man ekele i wang’ Saul, man i wang’ jutic pare; e gicamu. Gilund giai malu, man gicidho ku diewor nica.