Read Alur 1 Samwil 29 Bible Online

1 Samwil 29 - Alur bible

1 Samwil 29

¹Nie Jufilisti gicoko dhu udulgi ceke karacelo i Afek: man Juisraeli gigonjo ng’et kulo ma ni i Yezrel.

²Man rwodhi mi Jufilisti gicikukadhu ni dak, man ni rubanga; man Daudi ku dhanu pare gidong’ gikadhu cen karacelo kud Akic.

³Judongomawijo mi Jufilisti gilund giwacu kumae, Juebrania maeni gitimo ang’o keni? Man Akic uwacu ni judongomawijo mi Jufilisti kumae, Maeni Daudi ngo, ma jatic pa Saul m’ubimo mir Israel, m’ubedo i bang’a i nindo maeni, kadi rundi maeni, man anwang’u kier moko mbe i ie ugambre i ceng’ m’etundo i bang’a cil i ceng’ maeni?

⁴Ento judongomawijo mi Jufilisti kwinyo negogi i kume; man judongomawijo mi Jufilisti giwacu ire kumae, Keth ng’atuno doki, kara edok i ka m’ikethe i ie, man kud iyi walor wakugi i lwiny, emaru doko jadegi mwa dhu lwiny: kum janduni kindgi bipoto ku rwodhe ni kum ang’o? ni kum wi dhanu maeni ngo?

⁵Maeni Daudi ngo, ma giwero pire man ni wadi man ni wadi ngo i mieli, giwacu kumae, Saul unego pare rubanga, Man Daudi pare rubanga apari?

⁶Akic ulund ulwong’o Daudi, man ewacu ire kumae, Calu Yehova bedo kwo, ibedo pwe, wok woko peri ku mondo peri karacelo kuda i udul e ber i wang’a; kum anwang’u dubo ngo ii ugambre i ceng’ m’iwok i ie i bang’a cil i ceng’ maeni: ento rwodhi gifoii ngo.

⁷Kum kumeno kawono doki, man icidh ma cwinyi kwio, kara kud inyai lembe i kindwu wuku rwodhi mi Jufilisti.

⁸Man Daudi wacu ni Akic kumae, Ento atimo ang’o? man inwang’u ang’o i jatic peri ma nwang’u abedo i weng’i hai cil i ceng’ maeni ngi e, ma nia kud acidh akied kum judegi pa rwoth para m’ubimo?

⁹Man Akic uloko lembe ewacu de kumae ni Daudi, Ang’eyo nia in i ber i wang’a, calu malaika pa Mungu: ento judongomawijo mi Jufilisti giwacu kumae, Wabiidho malu wakugi ngo i lwiny.

¹⁰Kum kumeno kawono ai malu pir kugweno ku jutic pa rwoth peri ma wubino karacelo wukugi; man kinde ma piny ulero i wiwu, wuai.

¹¹Kum kumeno Daudi ai malu pir kugweno, en ku dhanu pare, kara giai kugweno, gidok i ng’om mi Jufilisti. Man Jufilisti giidho malu ba Yezrel.