Read Alur 1 Samwil 31 Bible Online

1 Samwil 31 - Alur bible

1 Samwil 31

¹Nie Jufilisti gikiedo kud Israel: man dhanu mir Israel giringo i wang’ Jufilisti, man gipodho piny ma junegogi wi got Gilboa.

²Man Jufilisti giriemo tok Saul areri ku wote de; man Jufilisti ginego Yonathan, kud Abinadab, man Malkicua, ma wot Saul.

³Man lwiny ubedo tek kum Saul, man weg athero girube; man cwinye ng’abre dit kum weg athero.

⁴E Saul ulund uwacu ni jayei jambali pare kumae, Wodh palamularu peri, man idhuya kudo, kara ju maeni ma yaa mbe i kumgi ku gibin gidhuya man gisenda. Ento jayei jambali pare yio ngo; kum lworo nege dit. Ka kumeno Saul ugamu palamularu pare, man epodho i wie.

⁵Man ka jayei jambali pare neno nia Saul utho, en bende epodho wi palamularu pare, man githo gikude.

⁶Kum kumeno Saul utho, ku wote adek, ku jayei jambali pare, man dhanu pare ceke, ceng’ nica karacelo.

⁷Man ka dhanu mir Israel ma gini loka poga, man ju ma gini loka Yordan, gineno nia dhanu mir Israel giringo, man nia Saul ku wote de githo, giweko adhura, man giringo; e Jufilisti gibino gibedo i igi.

⁸Man etimbre urwone, ka Jufilisti gibino wodho kendi mi ju m’utho, nia ginwang’u Saul ku wote adek gipodho wi got Gilboa.

⁹Man githumo wie woko, man giwodho jambali pare, e giore i ng’om mi Jufilisti gbur kara urwei lembe i udi mi mungu migi m’araga, man ba dhanu.

¹⁰Man giketho jambali pare i ot mi Actaroth; man ging’abu avuje kum gang’ mi Beth-can.

¹¹Man ka ju m’ubedo i Yabec-gilead giwinjo pire maram Jufilisti gitimo ko kum Saul,

¹²dhanu ceke ma jurukara giai, man gicidho ku diewor soro, e giting’o avuj Saul kud avuj wote ku kum gang’kidi mi Beth-can; man gibino Yabec, e giwang’ugi keca.

¹³Man giting’o cogo migi, man giyikogi the yen Habec, man gikwiro cam ceng’ abiro.