Read Alur 1 Samwil 5 Bible Online

1 Samwil 5 - Alur bible

1 Samwil 5

¹Nwang’u Jufilisti giyaku sanduk pa Mungu, man gitere ku i Eben-ezer ba Acdod.

²E Jufilisti gamu sanduk pa Mungu, man gitere i ot pa Dagon, man gikethe i ng’et Dagon.

³Man ka ju ma i Acdod giai pir kugweno urwone, nen, Dagon upodho arieba wang’e i ng’om i wang’ sanduk pa Yehova. Man giting’o Dagon, e gikethe i kakare kendo.

⁴Man ka giai pir kugweno urwone, nen, Dagon upodho arieba wang’e i ng’om i wang’ sanduk pa Yehova; man wi Dagon ku cinge ario de ung’ol uvuto wi riu mi dhugola; dund Dagon kende e m’udong’ ire.

⁵Ka kumeno kadok julam pa Dagon, kadi jumoko m’utimo i ot pa Dagon, giwotho ngo wi riu mi dhugola pa Dagon i Acdod, cil i ceng’ maeni.

⁶Ento cing’ Yehova bedo tek wi ju ma i Acdod, man enyothogi, man egoyogi ku thong’om ma vur, en e Acdod ku kieune de.

⁷Man ka dhanu m’i Acdod gineno nia ebedo kumeni, giwacu kumae, Sanduk pa Mungu mir Israel bibedo karacelo kudwa ngo; kum cinge bedo tek i wiwa, man wi Dagon ma mungu mwa.

⁸Ka kumeno gioro kwenda man gicoko judongo ceke mi Jufilisti i bang’gi, man giwacu kumae, Wabitimo ang’o ku sanduk pa Mungu mir Israeli? Man giloko lembe kumae, Wek juter sanduk pa Mungu mir Israel i Gath. Man gitero sanduk pa Mungu mir Israel kuca.

⁹Man ebedo kumeno, nia, yo ng’ei tere kuca, cing’ Yehova bedo kum adhurane kud ang’abacwiny ma dit apila: man egoyo dhanu mir adhurane, ma thindho ku ma dongo de; e vur ma thong’om uluro i kumgi.

¹⁰Kum kumeno gioro sanduk pa Mungu i Ekron. Man etimbre, kinde ma sanduk pa Mungu bino Ekron, nia Juekroni giywak, giwacu kumae, Gikelo sanduk pa Mungu mir Israel i bang’wa, kara unegwa ku dhanu mwa.

¹¹Ka kumeno gioro kwenda, man gicoko judongo ceke mi Jufilisti karacelo, man giwacu kumae, Wudwok sanduk pa Mungu mir Israel; man wek ecidh kendo i kakare ma dhe, kara kud enegwa, ku dhanu mwa. Kum ang’abacwiny mi tho nuti i adhura ceke mba mba; cing’ Mungu bedo pek dit keca.

¹²Man dhanu m’utho ngo jugoyogi ku thong’om ma vur; e ywak mir adhurane idho malu i polo.