Read Alur 1 Samwil 7 Bible Online

1 Samwil 7 - Alur bible

1 Samwil 7

¹E dhanu m’i Kiriath-yearim gibino, man gitero sanduk pa Yehova malu, man gitere i ot pa Abinadab wi ungulu got, man gidwoko Eleazar ma wode leng’ kara egwok sanduk pa Yehova.

²Man etimbre, ugambre i ceng’ ma sanduk ubedo i Kiriath-yearim, nia nindo ton; kum en e rundi pier ario: man ot mir Israel ceke giywagu Yehova.

³Man Samwil uyero ni ot mir Israel ceke, ewacu kumae, Tek wulokru ba Yehova kud adundewu ceke, e dong’ wukab mungu ma juwirok kud Actaroth cen kud i kindwu, man wudwok adundewu ba Yehova, man wutim ire kende; e ebibodhowu kud i cing’ Jufilisti.

⁴E nyithindho mir Israel gikabu Balim kud Actaroth cen, man gitimo ni Yehova kende.

⁵Man Samwil uwacu kumae, Wucok Israel ceke i Mizpa, e abirwo piwu ba Yehova.

⁶Man gicokri karacelo i Mizpa, e gitwomo pi, man gikonje woko i wang’ Yehova, e giweko cam i ceng’ maeca, man giwacu kumae keca, Wadubo ni Yehova. Man Samwil upoko lembe mi nyithindho mir Israel i Mizpa.

⁷Man kinde ma Jufilisti giwinjo nia nyithindho mir Israel gicokri karacelo i Mizpa, rwodhi mi Jufilisti giidho malu kum Israel. Man kinde ma nyithindho mir Israel giwinjo maeno, lworo negogi kum Jufilisti.

⁸Man nyithindho mir Israel giwacu ni Samwil kumae, Kud iwek lwong’o Yehova Mungu mwa piwa, kara ebodhwa kud i cing’ Jufilisti.

⁹E Samwil ugamu nyathi rombo ma dhoth, man ethiere ni lam m’awang’a ma bo ni Yehova: e Samwil ulwong’o Yehova pir Israel; man Yehova loko ire lembe.

¹⁰Man kinde ma Samwil ubethiero lam m’awang’ane, Jufilisti gicoro ceng’ni nikiedo kum Israel; ento Yehova rundo ku rund ma dit i ceng’ maeca wi Jufilisti, man eng’abu cwinygi; e jugoyogi piny i wang’ Israel.

¹¹Man dhanu mir Israel giai woko kud i Mizpa, e gilubo tok Jufilisti, man gigoyogi, cil ma gibino ko the Beth-kar.

¹²Samwil ulund uting’o kidi, man ekethe i kind Mizpa ku Cen, e elwong’o nyinge Eben-ezer, ewacu kumae, Cil kawono Yehova konyowa.

¹³Kum kumeno Jufilisti kwio, man gibino kendo ngo i kieu mir Israel: man cing’ Yehova bedo i kum Jufilisti i ceng’ ceke pa Samwil.

¹⁴Man adhura ma Jufilisti mwonyo bang’ Israel judwoko bang’ Israel, ugambre Ekron cil kum Gath; man kieune de Israel ubodho kud i cing’ Jufilisti. Man kwiocwiny ni kind Israel ku Juamori.

¹⁵Man Samwil upoko lembe mir Israel i ceng’ pare ceke m’ecamu ie ng’om.

¹⁶Man ecidho ku ba rundi ku ba rundi elworo ko Beth-el, man Gilgal, ku Mizpa, man epoko lembe mir Israel i ka maeno ceke.

¹⁷Man edwogo i Rama, kum ot pare ni keca; man epoko lembe mir Israel keca: eguro pemblam ni Yehova keca de.