Read Alur 1 Samwil 8 Bible Online

1 Samwil 8 - Alur bible

1 Samwil 8

¹Man etimbre, kinde ma Samwil uti, nia eketho wote ni jupoklembe wi Israel.

²Nie nying’ kayu pare en e Yoel; man nying’ wode mir arionde, Abija: gi jupoklembe i Ber-ceba.

³E wote wotho i yo pare ngo, ento gilokri tok piny, man gigamu jamng’om, e ginyotho pokolembe.

⁴Judongo mir Israel ceke gilund gicokri gigi karacelo, man gibino ba Samwil i Rama;

⁵e giwacu ire kumae, Nen, iti, man woti giwotho i yo peri ngo: kawono keth iwa ubimo ubim wiwa calu thek ceke.

⁶Ento lembene bedo rac i wang’ Samwil, ka giwacu kumae, Mi iwa ubimo m’upok lembe i wiwa. E Samwil urwo ba Yehova.

⁷E Yehova wacu ni Samwil kumae, Winj dwand dhanu i gin ceke ma giwacu iri; kum gikweri ngo, ento gikwera, kara kud abed ni ubimo i wigi.

⁸Calku tic migi ceke ma gitimo ugambre i ceng’ m’akelogi malu kud i Misiri cil i ceng’ maeni, kum giweka, man gitimo ni mungu mange, e gitimo kumeca bende i beng’i.

⁹Ka kumeno kawono winj dwandgi: karacelo ku maeni ibiyero igi cu, man ibinyutho igi maram ubimo ma bibimo wigi bibedo ko.

¹⁰E Samwil uyero lembe pa Yehova ceke ni dhanu m’upenjo ubimo i bang’e.

¹¹Man ewacu kumae, Maeni en e maram ubimo ma bibimo wiwu bibedo ko: ebigamu wotwu, man ebigoyo wigi ire, mi magali pare, man ubed weg riuni pare; e gibiringo wang’ magali pare;

¹²man ebigoyo wigi ire ni jego mi rubanga, man jego mi pier abic; man ebiketho moko ufur ng’om pare ku dhiang’, man ukai cam pare, man utim jambali pare, man jambmagali pare.

¹³Man ebigamu nyigwu ubed ni jutim gin ma ng’wice ng’ar, man ubed jutedo, man ubed juted mugati.

¹⁴Man ebigamu pothi mu, ku podho mir ulok mu, man podho mir ulam mu, en e ma ber hai m’i kindgi, e ebimiogi ni jutic pare.

¹⁵Man ebigamu kodhi mu mir apaje, man mi podho mir ulok mu, man ebimie ni jego pare, man ni jutic pare.

¹⁶E ebigamu jutic mu ma co, man bong’ mu, man awobi mu ma sagu wagi, ku kana mu, e ebikethogi i tic pare.

¹⁷Ebigamu apaje mir udul rombe mu: e wubibedo jutic pare.

¹⁸Man wubiywak i ceng’ maeca kum ubimo mu ma wugoyo wie iwu; man Yehova biloko lembe iwu ngo i ceng’ maeca.

¹⁹Ento dhanune gikwero winjo dwand Samwil; e giwacu kumae, Ungo; ento wabibedo kud ubimo i wiwa,

²⁰kara wan bende wabed calu thek ceke man kara ubimo mwa upok lembe i wiwa, man ecidh woko i wang’wa, man ekied lwiny mwa.

²¹Man Samwil uwinjo lembe ceke mi dhanune, e egonyogi i ith Yehova.

²²E Yehova wacu ni Samwil kumae, Winj dwandgi, man iketh ubimo igi. Man Samwil uwacu ni dhanu mir Israel kumae, Wudok i adhura mu kubeng’wu kubeng’wu.