Read Aramaic Peshita Matiyu 1 Bible Online

Matiyu 1 - Aramaic Peshita bible

Matiyu 1

¹Ni mo Isiso Kolaisoni aniyopatono iyalini siyolo siyolo na. Isiso, tota mo Toiwini nakosai. Toiwi mo Apolofamoni nakosai.

²Apolofamo mo Isakoni apitono. Isako mo Yokoponi apitono. Yokopo mo Yutoni apitono, tani auwatono iyaliwoi mani, apitono mo tomoso nali.

³Yuto mo Piliso noko tini apitono, Pilisowoi Silawoi. Totini atino mo Toima. Piliso mo Hisolunoni apitono. Hisoluno mo Lamoni apitono.

⁴Lamo mo Aminotaponi apitono. Aminotapo mo Nasononi apitono. Nasono mo Salomononi apitono.

⁵Salomono mo Puwasoni apitono. Atino mo Lihapo. Puwaso mo Opoitoni apitono. Atino mo Luto. Opoito mo Yasini apitono.

⁶Yasi mo samukuko nokota siyoli Toiwini apitono. Toiwi mo Solomononi apitono. Atino mo toku mo Uliyani noni.

⁷Solomono mo Lihapowani apitono. Lihapowa mo Apiyani apitono. Apiya mo Asani apitono.

⁸Asa mo Yohasofatoni apitono. Yohasofato mo Yolamoni apitono. Yolamo mo Usiyani apitono.

⁹Usiya mo Yotamoni apitono. Yotamo mo Ahasoni apitono. Ahaso mo Hisikaiyani apitono.

¹⁰Hisikaiya mo Manasani apitono. Manasa mo Amoni apitono. Amo mo Yosaiyani apitono.

¹¹Yosaiya mo Yokonaiya iyalini apitono, Nonani noko iyali simai Poipilono nokoyo uo monoi tiki, Isolilo noko tukuwoliya tumokino, siyai mo yau yau, siyai mo Poipilono asiso na kuloli ilomanokino, mi anoti monoi.

¹²Kuloli ilomanokino mo; Yokonaiya mo Siyalotiyaloni apitono. Siyalotiyalo mo Silapopiloni apitono.

¹³Silapopilo mo Apiyatoni apitono. Apiyato mo Iliyakimoni apitono. Iliyakimo mo Aisoloni apitono.

¹⁴Aisolo mo Satokoni apitono. Satoko mo Aikimoni apitono. Aikimo mo Iliyatoni apitono.

¹⁵Iliyato mo Iliyasani apitono. Iliyasa mo Motanoni apitono. Motano mo Yokoponi apitono.

¹⁶Yokopo mo Yusifoni apitono. Yusifo mo Moilini nokitono. Moiliyo Isiso mo na kiki. Kolaiso tokaluwai manokoni, noko no mo Kotoyo no muwokaiki no, Isolilo noko moi fasimoka tumo monoi.

¹⁷No monoi no mo, Apolofamoni nakosaitono iyali mo ainoso Toiwiwoi nali no, noko mo naino ti uwai toitati noko, 14 na. Toiwini nakosaitono iyali mo ainoso Yokonaiyawoi tomoso nali no, noko mo naino ti uwai toitati noko, 14 na. Nosai no Poipilono asiso monoi kuloli ilomanokino. Yokonaiyani nakosaitono iyali mo ainoso Kolaisowoi tomoso nali no, noko mo naino ti uwai toitati noko, 14 na. Atinoyo Isiso ki aino imo.

¹⁸Moiliyo Isiso Kolaiso ki aino imo mo noino. Moili mo Yusifoyo kauso monoi yasoi muwosokaikino. Ulai kalumanisowoi muwoi, muwoliwoisoso na kosokino. Kotoni Mulu Itouniyaimo Nokotani amiyo muwoliwoi na tolosoki.

¹⁹Muwosokai nokota, Yusifo, to mo mulu itouniyaimo nokota. Noko nokolaloni molo timai mo auwosi imo isowoi muwoi, na mulumolokoki, “Yo mo wosu woso na tafolikaiso.”

²⁰Mulumoloko manoki mo; na solitonomoki. Solitonosai Siyoli Nokotani kumoki nokotaso kiki, na imoki, “Yusifo, Toiwini nakosaitono, nono mo nonani noni, Moili, kauso monoi mo noiyo nisoi. Na pukwaimono. Kotoni Mulu Itouniyaimo Nokotani amiyo nali no, no monoi no muwoliwoi na toloso.

²¹Nokokai alu na kiyoimo, tani siyolo mo Isiso pako kaluwai. Ulai afonimaiso? To mo noko nokolaloni mulu kopokoiyau saloso uwokoimo, no monoi no samiyaikiyoinomo.”

²²Komaso no fiyamosokoki no, no mo afonimaiso fiyamosokowoi muwoi. Koto Siyolini imo motu fiyamosi monoi na fiyamosokoki, tani mulu lukasiko nokotayo no kumokaiki no, noino,

²³“Na pukwaimono, maputo nukonu, nokoyo kalumaniso somiso nukonu, to mo muwoliwoi na tolosoimo, alu nokokai na kiyoimo. Tani siyolo mo noino na kaluwaiyoinomo, Imanuwilo.” Toku aino na kumokaiki. Namolisai mo motu na fiyamosiki. Imanuwilo imo folosai mo noino, Koto mo moiwoi totolo fasikomomokomoi.

²⁴Nosai no mo; Yusifo mo solitono mo uwai; na auwoniyouki. Siyoli Nokotani kumoki nokota, tani imososo aluwainiyouki, no monoi no Moili mo na kausoki.

²⁵Ulai kalumanisowoi muwoi, ainoso hani alu kiki. Tani siyolo mo Isiso na kaluwaiki, Yusifoyo mo.