Read Aramaic Peshita Hipolu 1 Bible Online

Hipolu 1 - Aramaic Peshita bible

Hipolu 1

¹Toku inosai Koto mo totani mulu lukasiko nokoso posasoko wiyolukalo manoki, saiso saiso. Nosai no mo toiyo aniyopa iyaliso lukasiyoluwaiko manokino, nonani imo mo.

²Ulai lolai ni toi mo, asi fokumo mo aumoifaso, nimai no mo awitonoso na imo taikiyoki, imo lukasimoka kono monoi. Toku no yoki mo, awitonoyosu mo kumokiwoi asi asi komasowoi mulumolokoki, no monoi no auwonouluki. Na muwokaiki, samukuka tumo monoi, hani hani komaso mo.

³Koto mo saponi saso. Awitono mani, tomoso na, saponi komiyai na towimoi. Mulu mo apitononi mulu komiyai, toti mo folo folo muwoi, tomoso na. Imo mo amiwoi. Nonani imoyo noinomo kumokini sonosoniwoi asini sonosoniwoi na tamikomoi, na tosamukukomoi. Mulu kopokoiyau saloso uwomokoki. Saloso uwomoko uwai; nosai no mo totawoi samukukomomoko nokota siyolini nainasai na yousikaina yoki, kumokiso. Kotoni awitonoyo kumoki noko souwaikokai aino imo.

⁴Wiyou, awitono mo noko siyoli, Kotoni kumoki nokoni siyolo siyolo tosouwaikokai. No monoi no na tosouwaikalomoi.

⁵Kotoni puko imoyo ainonani monoi na tiyomuko, noino,“Nono mo asani alu na. Konoi mo na tokinoki.” Ulai ti monoi tiyomuko,“Tani apitono mo yo na. Yani alu nali no.” Nonani imo no moloi, tani kumoki nokoso na iko, woi? Yoi, kumoki nokoso pa ikokiso, awitonoso na imoki. No monoi no tosouwaikomoi.

⁶Awitona awitono asiso kiyo taikiyomai, nomai no mani, noino na yomuki, Koto mo, tani puko imoyo no tiyomuko no,“Asani kumoki noko iyali mo alokomu losinasi unuwumo, na molokimowumo.”

⁷Tani kumoki noko iyali monoi noino tiyomuko uku,“Ta noinomo kumoki noko iyali mo imonu komiyai toliyaiyalo manono. Mi anononi noko mo ta i komiyai tofufoimuwanalo manomoi.”

⁸Awitono monoisu noino na tiyomuko,“Koto, nono mo aniyopa poi poi nokota siyoli. Noko nokolalo samukuko itouniyaimo manoinimo.

⁹Molo koiyau monoi mo wiyou tiyomuni. Itouniyaimo moloso aluwai monoisu na tiyoni. No monoi no nani Kota, yo na, yo mo na muwokaikinoki, noko siyoli tolo monoi. Wiyou, ulukukumo siyoli. Siyokuno iyaliso na tosouwaiko manoni.”

¹⁰Ti monoi na yomuki, awitono monoi, Koto mo, noino,“Noko Siyoli, toku nono mo asi asi monoi mulumolokokini, na fiyamosokoki, amiso tosimoi. Kumoki mani, fonanikomokini, na fiyamosiki.

¹¹Kumokiwoi asiwoi mo uwokaikoimo. Nonosu mo amai na tolo manoinimo. Kumokiwoi asiwoi mo tokumi tuno komiyai tolikikoimo.

¹²Tokumi tuno kopokoiyau komiyai afolikoinimo. Ti monoi kwalomai monoi na fonanikomoinimo. Nonosu mo kalowoi nokota muwoi, aniyopa poi poi na tolo manoinimo.” Kotoni puko imoyo aino tiyomuko.

¹³Ti monoi mo noino tiyomuko,“Yani nainasai na piyousikaino. Yousikaino manakinimo, ainoso hani nono uo noko mo nani fiyo wosuwoimai na soimo, yani amiyo.” Nonani imo no moloi, tani kumoki nokoso na iko, woi? Yoi, kumoki nokoso pa ikokiso, awitonoso na imoki.

¹⁴Kotoni kumoki noko mo auwoi muwoi, mulu saso. Kotoni mi saso tano fasi manono. Na tiko taikiyalomoi, totayo muwokokai noko iyali fasikalo monoi, ta noinomo no samiyaikiyakino no.