Read Amuzgoan San Juan 13 Bible Online

San Juan 13 - Amuzgoan bible

San Juan 13

¹Ntyjantyi xjen na tyeꞌ na tqueenꞌ Jesús já nnꞌan na quitsayꞌö́n yo jñꞌoon na toninncyaa jon, siꞌman jon na venchjii jndyi jon já. Ntyjii jon na jndë vaventyja xjen na nnduiꞌ jon nnon tsonnangue na ncja ntcüeꞌ jon na mꞌaan tye jon. Joꞌ xjen na vavindyo na ngityeꞌ nguee pascua ya na conanꞌcüjë́ quinman na conanꞌtꞌmánꞌ Tyoꞌtsꞌon, siꞌmanntyichen jon na tꞌman jndyi vaa na venchjii jon já.

²Tcüꞌá yo Jesús cüenta matman. Juu xjenꞌñeen jndë sꞌaa yutyia quiiꞌ tsꞌon juu ntyjë́ Judas Iscariote, jnda Simón, na ncyaa juu cüenta Jesús.

³Majndaꞌ ntyjii jon na nquii tye jon jndë tyincyaa jon na minꞌncüii ꞌnan tyiꞌngenon jon na chito jñꞌoonꞌ jon. Ntyjii Jesús na jnan jon na mꞌaan Tyoꞌtsꞌon ndoꞌ majoꞌ vja ntcüeꞌ jon.

⁴Juu tmanꞌñeen, viochen xjen na tcüꞌá, jnanquintyja Jesús, tjiꞌ jon ndiaatco na cüe jon. Sityen jon tsiaaꞌ jon yo ncüii ndiaa na cotꞌuë́ nduë́.

⁵Ndë joꞌ tyion jon ndaatioo quiiꞌ ꞌnan na cotmán nduë́. Taꞌ jon na iman jon ngꞌë́, ndë iveꞌ jon ngꞌë́ yo ndiaaꞌñeen.

⁶Majoꞌ ya na tueeꞌ jon nnon Simón Pedro, itso juu nnon jon: —Ta, ¿Aa ja mmanꞌ ngꞌë?

⁷Tꞌa Jesús, itso jon: —Ndicüaaꞌ tsonꞌ tsꞌian na matsꞌa naneinhin, majoꞌ ya ndëcya ncüaaꞌ tsonꞌhanꞌ.

⁸Majoꞌ itso Pedro: —Tyiꞌxeꞌncya na mmanꞌ ngꞌë. Tꞌa Jesús, itso jon: —Xe na aa tyiꞌman ꞌuꞌ, tyiꞌjeꞌquindëë ntsixuanꞌ ntyja njan.

⁹Itso Simón Pedro nnon Jesús: —Ta, xe na aa nndaꞌ, yajoꞌ chito veꞌ xiaꞌntyi ngꞌë, mantyi quimanꞌ ntꞌö yo xquën.

¹⁰Majoꞌ sinin Jesús ncüii jñꞌoon na tyiꞌquitso nquiiꞌhanꞌ nnon Pedro: —Minninchen tsꞌan na jndë jndëëꞌ, tyiꞌicanhanꞌ na mman na ninvaañꞌenhin ee jndë ntjuꞌhin, veꞌ xiaꞌntyi ngꞌee ro juu icanhanꞌ na mman. Ndoꞌ ꞌoꞌ conduihoꞌ na ntjuꞌ nꞌonhoꞌ, majoꞌ tyiꞌtsoñꞌenhoꞌ.

¹¹Nndaꞌ tso jon ee ntyjii ya jon nin juu na ninncyaa cüentahin nduee ntyee ꞌnaan nnꞌan judíos. Ngꞌe joꞌ na tso jon: —Majoꞌ tyiꞌtsoñꞌenhoꞌ na conduihoꞌ na ntjuꞌ nꞌonhoꞌ.

¹²Ndoꞌ vi na jndë jndë tman jon ngꞌë́, tcüe nndaꞌ jon ndiaatco ꞌnaanꞌ jon, ndë joꞌ tëcjo nndaꞌ jon mesa. Itso jon ndë́: —¿Aa covaaꞌ nꞌonhoꞌ nin ꞌnan itsiquindyihanꞌ na nndaꞌ sꞌa?

¹³ꞌOꞌ conanꞌquijndyuhoꞌ ja tsan na tsiꞌman jñꞌoon naya ndëëhoꞌ ndoꞌ mantyi na condui ja tsꞌan na icoꞌxeenhoꞌ. Ndoꞌ majoꞌ ro na conduehoꞌ ee mancüiixjen joꞌ condui ja.

¹⁴Ngꞌe ja na condui tsan na tsiꞌman ndëëhoꞌ ndoꞌ na matyeꞌntjönhoꞌ, jndë tman ngꞌehoꞌ, mantyi chuhanꞌ na ꞌoꞌ quitjueꞌcjehoꞌ na ntyentjonhoꞌ ndëë ntyjehoꞌ.

¹⁵Ee ja jndë sꞌa ncüii nnon na tsiꞌmanhanꞌ ndëëhoꞌ chaꞌ mantyi ꞌoꞌ quintꞌahoꞌ na nndaꞌ yo nnꞌan chaꞌxjen jndë sꞌa yohoꞌ.

¹⁶Jñꞌoon na mayuuꞌ matsjö ndëëhoꞌ, juu moso tyiꞌtꞌman conduihin chaꞌxjen tꞌman condui nquii tsꞌan na ityentjon juu nnon. Ndoꞌ mantyi nquii tsꞌan na conduihin tsꞌan na incyaa juu jñꞌoon, tyiꞌtsijonhanꞌhin yo nquii tsꞌan na tꞌua tsꞌianꞌñeen nnon juu.

¹⁷Xe covaaꞌ nꞌonhoꞌ jñꞌoonminꞌ ndoꞌ xe na aa ntꞌahoꞌhanꞌ, ndyio Tyoꞌtsꞌon jnꞌaanhoꞌ.

¹⁸“Majoꞌ chito matsjö jñꞌoonvaꞌ ntyja ꞌnaan tsoñꞌenhoꞌ. Ee mantyji nchu xjen nnꞌanhoꞌ, ꞌoꞌ na jndë tjihoꞌ na quinanꞌjonhoꞌ tsꞌian na matsꞌa. Ee mancüiixjen ijndeiꞌhanꞌ na quitsiquindëhanꞌ juu jñꞌoon na chu salmo na itsohanꞌ: “Manquii tsꞌan na icüaꞌ yo ja, itsuehin na cjö.” Nndaꞌ vaa itsiquindyi juu salmoꞌñeen.

¹⁹Matsjö jñꞌoonvaꞌ ndëëhoꞌ vitjachen na nndui na nndaꞌ, chaꞌ juu xjen na ntsiquindëhanꞌ juuhanꞌ, ngantyja nꞌonhoꞌ na condui ja manquiintyi jon na jndë totsjö ndëëhoꞌ.

²⁰Jñꞌoon na mayuuꞌ matsjö ndëëhoꞌ, minninchen tsꞌan na ncyꞌoon juu cüenta tsꞌan na maꞌua tsꞌian njan nnon juu, ja iyꞌoon tsanꞌñeen cüenta. Ndoꞌ minninchen tsꞌan na iyꞌoon juu cüenta ja, mantyi iyꞌoon tsanꞌñeen cüenta nquii jon na jñon ja quiiꞌ ntꞌanhoꞌ. Itsiquindyi Jesús na njndëë Judas jon

²¹Jndë na sinin Jesús jñꞌoonvaꞌ, tꞌman jndyi vaa na siꞌndaaꞌhanꞌ ntyjii jon, yajoꞌ tjiꞌ jndyoyu jon ndë́. Itso jon: —Jñꞌoon na mayuuꞌ matsjö ndëëhoꞌ, ncüii nquehoꞌ nninncyaa juu cüenta ja.

²²Xjenꞌñeen tojntyꞌia ndëë ntyjë́ ngꞌe ndicüaaꞌ nꞌö́n nin ncüii já na itso jon na ntsꞌaa na nndaꞌ.

²³Juu xjenꞌñeen ja Juan na vequityën ngiaaꞌ Jesús na cocüꞌá. Tꞌman vaa na venchjii jon ja.

²⁴Joꞌ juu Simón Pedro sꞌaa jon ntꞌö jon nnön na cüaxꞌë nnon Jesús nin ncüii já na nninncyaa juu cüentahin.

²⁵Joꞌ sindyooꞌntyichen ja ngiaaꞌ Jesús, taxꞌë nnon jon, tsjö: —Ta, ¿Nin ncüii já na ntsꞌaa na nndaꞌ?

²⁶Ndoꞌ tꞌa jon ꞌndyö, tso jon: —Majuu tsan na nninncya tanꞌ tyooꞌ nnon ya na jndë siquintꞌahanꞌ. Ndoꞌ vi na jndë siquindaaꞌ jon tyooꞌñeen, tyincyaa jonhanꞌ nnon Judas Iscariote, jnda ncüii tsꞌan na jndyu Simón.

²⁷Ndoꞌ xjenꞌñeen vi na jndë tyꞌoon juu cüenta tyooꞌñeen, tëqueeꞌ yutyia Satanás quiiꞌ tsꞌon juu. Yajoꞌ tso Jesús nnon juu: —Quitsicje ꞌuꞌ yo tsꞌian na ntsaꞌ.

²⁸Majoꞌ já na minndyuá mesa yohin, minꞌncüii já tyíꞌcüaaꞌ nꞌö́n ndu na nndaꞌ tso jon.

²⁹Ndoꞌ ngꞌe na mangiö́ na juu Judas na yꞌoon tjanche na ñjon xoquituꞌ, joꞌ vendye já jnanꞌtiú na tꞌua Jesús tsꞌian nnon juu na quitsijnda juu ꞌnan na icanhanꞌ na ninjntꞌue já juu ngueeꞌñeen, ndoꞌ aa quitsꞌaa juu naya naninñenꞌ.

³⁰Ndoꞌ vi na jndë tcüaꞌ Judas juu tanꞌ tyooꞌñeen, maninꞌñoonꞌ jnduiꞌ juu. Ndoꞌ juu xjenꞌñeen jndë tijaanhanꞌ. Jñꞌoon xco na icoꞌxenhanꞌ nnꞌan

³¹Vi na jndë jnduiꞌ Judas quiiꞌ ntꞌán, itso Jesús ndë́: —Neinhin ja na condui tsansꞌa na iꞌua Tyoꞌtsꞌon tsꞌian nnön na jndyö quiiꞌ ntꞌan nnꞌan, conditꞌmaanꞌ ja. Ndoꞌ juu ꞌnan na ngenön nditꞌmaanꞌ jon ntyja ꞌnaanꞌhanꞌ.

³²Ndoꞌ ngꞌe juu ꞌnan na ngenön, nditꞌmaanꞌ jon ntyja ꞌnaanꞌhanꞌ, yajoꞌ mantyi ja na condui tsansꞌa na jñon jon ja quiiꞌ ntꞌan nnꞌan, ntsitꞌmaanꞌ jon ja ntyja ꞌnaanꞌhanꞌ ndoꞌ cje ntsꞌaa jonhanꞌ.

³³ꞌOꞌ na conduihoꞌ ntsinda na venchjihoꞌ, matavivio vi mꞌan yo ꞌoꞌ. Njntꞌuehoꞌ ja, ndoꞌ chaꞌxjen jndë totsjö ndëë ntyjëëhë nnꞌan judíos, nein majuuntyihanꞌ matsjö ndëëhoꞌ: ꞌOꞌ jeꞌquindëë ntsquehoꞌ naijon na ncjö.

³⁴Ncüii jñꞌoon xco na mancya ndëëhoꞌ na icoꞌxenhanꞌ ꞌoꞌ, na quinanꞌvengiohoꞌ ntyjehoꞌ. Chaꞌxjen mꞌan ja na ventjihoꞌ, manndaꞌ vaa quinanꞌvengiohoꞌhin.

³⁵Ee na nntꞌahoꞌ na nndaꞌ, tsoñꞌen nnꞌan ncüaaꞌ nꞌonhan na conduihoꞌ nnꞌan na tcꞌën na quitsayꞌonhoꞌ yo jñꞌoon na mancya. Itsiquindyi Jesús na ncüji Pedro

³⁶Ndoꞌ taxeeꞌ Simón Pedro nnon Jesús: —Ta, ¿Yuu vijon vjaꞌ? Tꞌa Jesús, tso jon: —Ntyja na ngenön naneinhin, jeꞌquindëë ntsijon ꞌuꞌ ntyja ꞌnaanꞌhanꞌ, majoꞌ ngüentyja xjen na ngenoonꞌhanꞌ.

³⁷Joꞌ taxeeꞌ Pedro nnon jon: —Ta, ¿Ndu na jeꞌquindëë na ntsijon ja naneinhin yo ꞌnan na ngenoonꞌ? Tanin min xe na aa ncüꞌiö yo ntyja ꞌnanꞌ.

³⁸Ndoꞌ tꞌa Jesús, tso jon: —ꞌUꞌ matsitiuꞌ na nninncyaꞌ na nncüꞌioꞌ ntyja njan. Jñꞌoon na mayuuꞌ matsjö nnonꞌ, vitjachen na ntsixuaa quilꞌö na vanco ꞌio, majoꞌ juu xjenꞌñeen ꞌuꞌ jndë ndye jnda jndë tji ꞌuꞌ ntyja njan.