Read Amuzgoan Apocalipsis 19 Bible Online

Apocalipsis 19 - Amuzgoan bible

Apocalipsis 19

¹Jndë na tenon nanꞌminꞌ, jndyi na jndei ticꞌuaa quiñoonꞌndue chaꞌvijon jndyee ncüii tmaanꞌ tꞌman nnꞌan. Jnduehan:Cüitꞌmaanꞌ Tyoꞌtsꞌon,conduihin na itsinꞌman jon ñuan njanhan.Nquii jon tsixuan jon na conanꞌvë xueeꞌ jon.Xiaꞌntyi nquii jon taquintyja najndei conduihin.

²Icoꞌxen jon nnꞌan ntyja ꞌnaanꞌ na conanꞌtjahan chaꞌxjen na chuhanꞌ ndoꞌ yo jñꞌoon na mayuuꞌ.Nanein jndë tꞌuiityen jon juu tsanscuntjaaꞌñeen na tꞌman vaa na totsitjahin.Nquii juu na jndë totsiꞌndaaꞌ juu nnꞌan tsonnangue yo tsꞌian ꞌnaanꞌ juu natyia jndyihanꞌ.Ndoꞌ nanein itsꞌaa Tyoꞌtsꞌon yohin chaꞌxjen na totscüje juu joo nnꞌan na totyeꞌntjonhan nnon jon, manndaꞌ vaa quitꞌuiihanꞌhin na quityion juuhanꞌ.

³Ndoꞌ ncüiichen jon jnduehan:Cüitꞌmaanꞌ nquii ta Tyoꞌtsꞌon.Tyiꞌcaminntyjeeꞌ na cotsava neon na coco juu tsjoonꞌñeen.

⁴Ndoꞌ joo ntcyu nchoꞌ nenque nnꞌan na conintque yo ninꞌjoo nenque na cotaꞌndoꞌñeen, tyetangiohan tonnon nquii jon na vequityen jon silla na maninꞌ tsꞌiaanꞌñeen. Jnanꞌtꞌmaanꞌhan jon, jnduehan: —Quindui na nndaꞌ. Cüitꞌmaanꞌ nquii ta Tyoꞌtsꞌon.

⁵Ndoꞌ tonnon juu sillaꞌñeen ticꞌuaa jndyeeꞌ ncüii na itso:Tsoñꞌenhoꞌ na cotyentjonhoꞌ nnon Tyoꞌtsꞌon, quinanꞌtꞌmaanꞌhoꞌhin.Tsoñꞌenhoꞌ na njon jndyihin ngiohoꞌ,ꞌoꞌ na tyiꞌtquehoꞌ,ndoꞌ ꞌoꞌ na tquehoꞌ,quinanꞌtꞌmaanꞌhoꞌ nquii jon. Nguee na ngoco nquii Quitsman Chjo

⁶Ndoꞌ jndyi ncüii na itsijonhanꞌ chaꞌna conanꞌnein ncüii tmaanꞌ nnꞌan, chaꞌvijon na cꞌuaa yuu na coquioo ndaa jndaa tꞌman ndoꞌ chaꞌvijon na jndei coꞌman ntsuee. Jnduehan:Cüitꞌmaanꞌ nquii ta Tyoꞌtsꞌon. Ee juu jon conduihin Tyoꞌtsꞌon ntyja njanhan, ndoꞌ nquii jon taquintyja najndei na conduihin. Jndë tyeꞌ na icoꞌxen jon.

⁷Cüa, cꞌön na nën, tyiꞌncꞌön na chjooꞌ nnꞌön. Quinanꞌtꞌmaanꞌ jaa nquii jon, ee jndë tentyja xjen na ngoco nquii jon na conduihin Quitsman Chjo.Ee nquii juu na conduihin scuuꞌ jon jndë sijndaꞌ juu.

⁸Cüe juu ndiaa lino na ya jndyihanꞌ na quixueehanꞌ ndoꞌ ntjuꞌ jndyihanꞌ. Juu ndiaa linoꞌñeen tsiꞌmanhanꞌ joo tsꞌian na contꞌa nnꞌan na conduihan cüentaaꞌ Tyoꞌtsꞌon na totsamꞌanhan chaꞌxjen na chuhanꞌ.

⁹Ndoꞌ itso ángelꞌñeen nnön: —Joo jñꞌoon na matsjö nnonꞌ, cüjiꞌhanꞌ: “Nque nnꞌan na iqueenꞌ Tyoꞌtsꞌon na quinanꞌjonhan na ngoco nquii Quitsman Chjo, nein jndyihan.” Ndoꞌ mantyi tsontyichen ángelꞌñeen nnön: —Jñꞌoonminꞌ conduihanꞌ jñꞌoon na mayuuꞌ na itsinin nquii Tyoꞌtsꞌon.”

¹⁰Ndoꞌ tëcoꞌxtyë tongꞌee juu ángelꞌñeen na ntsitꞌmanꞌhin. Majoꞌ tso jon nnön: —Tyiꞌntsaꞌ na nndaꞌ, ee mantyi nnon nquii Tyoꞌtsꞌon matyeꞌntjön chaꞌxjen ncuꞌ, ꞌuꞌ ndoꞌ mantyi nque ntyꞌiuꞌ na contjotyenhan yo jñꞌoon na toninncyaa Jesús. Xiaꞌntyi nquii Tyoꞌtsꞌon quitsitꞌmanꞌ. Ee juu jñꞌoon ntyja ꞌnaanꞌ Jesús conduihanꞌ jñꞌoon na totsijndaꞌhanꞌ nquen joo nnꞌan na toninncyahin jñꞌoon ntyja ꞌnaanꞌ nchu vaa na nguaa. Tsꞌan na ntjo quiso quichiꞌ

¹¹Ndoꞌ jntyꞌia na vanaan quiñoonꞌndue ndoꞌ tityincyooꞌ ncüii quiso quichiꞌ. Ndoꞌ nquii jon na ntjo oꞌ, itsiquijndyuhanꞌhin nquii jon na ivangueeꞌ jon ndoꞌ mantyi na conduihin jñꞌoon na mayuuꞌ. Nque nnꞌan na conanꞌtjahan na tonnon Tyoꞌtsꞌon, icoꞌxen jonhan chaꞌxjen na chuhanꞌ, ndoꞌ mantyi itsꞌaa jon tyiaꞌ yo nque nnꞌan na conanꞌvehan nacjooꞌ jon.

¹²Xuee tënnon jon chaꞌxjen tsachon ndoꞌ jndye corona na ñjon xquen jon. Vaa ncüii xueeꞌ jon na jnduihanꞌ na xiaꞌntyi nquii jon ntyjii nchu vaa tsiꞌmanhanꞌ.

¹³Cüe jon ncüii ndiaa tco na tcooꞌ neonꞌhanꞌ. Ndoꞌ xueeꞌ jon na cotajnꞌaan nnꞌan jon, joꞌ jñꞌoonꞌ Tyoꞌtsꞌon.

¹⁴Ndoꞌ nque na conduihan sondaro quiñoonꞌndue tentyjahan toxenꞌ jon, tantjohan quitso quichiꞌ. Cüehan ndiaa lino ya, na quichiꞌhanꞌ ndoꞌ na ntjuꞌhanꞌ.

¹⁵Quiiꞌ ꞌndyo jon conduiꞌ ncüii xjo na të jndyihanꞌ, yo juuhanꞌ itsꞌaaviꞌ jon nnꞌan tsonnangue. Ntcoꞌxen jonhan yo naijndeiꞌhanꞌ. Chaꞌxjen na condyue nnꞌan tëndöndyooꞌ tsjan chaꞌ cüjiꞌhanꞌ ndaaꞌhanꞌ, manndaꞌ ro itsijonhanꞌ na ntsꞌaa jon yo nnꞌan na tyiꞌninꞌquitjueꞌcjehan ntyja ꞌnaanꞌ jon. Ee nquii Tyoꞌtsꞌon na taquintyja najndei conduihin, ntyjantyi xjen na itsivꞌii jndyi jon nnꞌan, manndaꞌ vaa itsijonhanꞌ na ntsꞌaa jon na quitꞌuiiviꞌhanꞌ joo nanꞌñeen.

¹⁶Ndoꞌ cjooꞌ ndiaaꞌ jon yo cjooꞌ tcüiꞌ jon, joꞌ jndë jndui xueeꞌ jon na itsohanꞌ: “Ncö condui tsan na taquintyja na coxen tsoñꞌen nnꞌan na cotoxen. Tëquintyja na tꞌman condui ja ndëë tsoñꞌen nnꞌan na tꞌman condui.”

¹⁷Jndë joꞌ, jntyꞌia ncüii ángel na minntyjeeꞌ jon nnon ndoꞌcüjioonꞌ. Jndei itsixuaa jon ndëë quintsa na maꞌntyja oꞌ tsjöꞌndue. Itso jon: —Ncyohoꞌ, cancüihoꞌ na ntquiihoꞌ jndye nnon siꞌ na itsijndaꞌ Tyoꞌtsꞌon cüentahoꞌ.

¹⁸Ncyohoꞌ na ntquiihoꞌ siꞌtsꞌo ꞌnaan nnꞌan na taquintyja na tꞌman conduihan na cotoxenhan, yo siꞌtsꞌo ꞌnaan nnꞌan na tꞌman condui na cotquenhan xjen sondaro, yo siꞌtsꞌo ꞌnaan nnꞌan na taxjen vaa mꞌaan jndyi na jndëhan. Ndoꞌ yo siꞌtsꞌo ꞌnaan quitso yo nque nnꞌan na tantjohan joo oꞌ, siꞌtsꞌo ꞌnaan nnꞌan na cotyeꞌntjontyen ndoꞌ mantyi yo nnꞌan na mꞌanhan xjen ꞌnaan nquehan. Nnꞌan na quijndë ndoꞌ mantyi nnꞌan na jndë tque.

¹⁹Ndoꞌ jntyꞌia juu quiooꞌjndyi tqueꞌñeen yo joo nnꞌan na taquintyja na cotoxenhan nnꞌan tsonnangue ndoꞌ yo ninꞌsondaro ꞌnaanhan. Tëncüihan na nntꞌahan tyiaꞌ yo nquii jon na ntjo juu quiso quichiꞌñeen ndoꞌ yo sondaro ꞌnaanꞌ jon.

²⁰Ndoꞌ tꞌuehan juu quiooꞌjndyi tqueꞌñeen yo juu tsanꞌñeen na toninncyaa jñꞌoon quintu na tonnon nquii jon. Totsꞌaa tsanꞌñeen jnꞌaan tꞌman yo najndei nquii quiooꞌ jndyi tqueꞌñeen. Ntyja ꞌnaan joo jnꞌaan tꞌmanꞌñeen, totsiviꞌnnꞌan juu joo nanꞌñeen na tyincyahan na tëquiñoon jnꞌaan ꞌnaanꞌ quiooꞌñeen ndöꞌquitahan oo ndueehan, ndoꞌ na tonanꞌtꞌmaanꞌhan ꞌndyonnon juu choꞌñeen. Yajoꞌ nquii jon na ntjo jon quiso quichiꞌñeen, joo ve nanꞌñeen, ninvaa vandoꞌhan, tjuꞌ jonhan quityquiiꞌ ndaandue chon na coco sufre.

²¹Ndoꞌ nquii jon na ntjo quiso quichiꞌñeen, iscüje jon tsoñꞌen sondaro ꞌnaan nanꞌñeen yo xjo të na jnduiꞌhanꞌ ꞌndyo jon. Ndoꞌ tsoñꞌen quintsa tcüaꞌ quintcu oꞌ siꞌtsꞌo ꞌnaan joo nanꞌñeen.