Read Amuzgoan Apocalipsis 22 Bible Online

Apocalipsis 22 - Amuzgoan bible

Apocalipsis 22

¹Ndoꞌ juu ángelꞌñeen siꞌman jon nnön juu ndaa jndaa na incyaahanꞌ na cotaꞌndoꞌ ñuaan nnꞌan. Quixuee jndyihanꞌ chaꞌvijon ndioo. Juuhanꞌ jnanhanꞌ naijon vaa silla na maninꞌ tsꞌiaanꞌ ꞌnaanꞌ Tyoꞌtsꞌon ndoꞌ mantyi yo nquii Quitsman Chjo.

²Juu jndaaꞌñeen vjahanꞌ xoncüe nata tꞌman quiiꞌ tsjoonꞌñeen. Ncüii cüii ntyjaaꞌ jndaaꞌñeen, joꞌ minntyjeeꞌ juu tsꞌoon na incyaahanꞌ na tyiꞌquintycüii na cotaꞌndoꞌ nnꞌan. Juu tsꞌoonꞌñeen tꞌuiiꞌ nchoꞌve nnon tëhanꞌ, ndoꞌ ncüii cüii nnon tëꞌñeen condëëhanꞌ ncüii cüii chiꞌ. Ndoꞌ tsco juu tsꞌoonꞌñeen conduihanꞌ nasi na itsinꞌmanhanꞌ nnꞌan tsonnangue.

³Nquii Tyoꞌtsꞌon tajeꞌquitsquioontyichen jon naviꞌ chaꞌxjen na sꞌaa jndyee jon. Ndoꞌ juu silla na maninꞌ tsꞌiaanꞌ ꞌnaanꞌ jon yo Quitsman Chjo, quiiꞌ tsjoonꞌñeen, joꞌ mꞌaanhanꞌ, ndoꞌ nque nnꞌan na cotyeꞌntjonhan nnon jon, nnanꞌtꞌmaanꞌhan jon joꞌ.

⁴Njntyꞌia ndëëhan jon ndoꞌ xueeꞌ jon, nñoonhanꞌ ndöꞌquitahan.

⁵Min tajeꞌcꞌoonntyichen natsjon, ndoꞌ nnꞌan na mꞌan joꞌ, tajeꞌcanhanꞌ chon lámpara min ndoꞌcüjioonꞌ, xe ngꞌe nquii ta Tyoꞌtsꞌon conduihin chon na tsixueehanꞌ ndëëhan. Min jeꞌquintycüii na conanꞌjonhan na cotoxenhan yo jon. Manndyo na nndyo nndaꞌ Jesucristo

⁶Ndoꞌ tsontyichen ángelꞌñeen nnön: —Jñꞌoonminꞌ conduihanꞌ jñꞌoon na ngatsiquindëhanꞌ joohanꞌ. Conduihanꞌ jñꞌoon na mayuuꞌ. Nquii ta Tyoꞌtsꞌon incyaa jon Espíritu na condui jon quiiꞌ nꞌon nnꞌan na coninncyahan jñꞌoon ntyja ꞌnaanꞌ nchu vaa nguaa na tonnonchen. Ngꞌe joꞌ, jndë tꞌua jon tsꞌian nnon ángel cüentaaꞌ jon na quitsiꞌman juu ndëë nnꞌan na cotyeꞌntjonhan nnon jon joo ꞌnan na mavaa xjen na ndui.

⁷Itso Jesucristo: —Quitquenhoꞌ cüenta, macje ncüjënön na mꞌanhoꞌ. Juu tsꞌan na itsue jñꞌoon na jndui nnon tsonvahin ntyja ꞌnaanꞌ nchu vaa ꞌnan na nguaa, neiinꞌ jndyi tsanꞌñeen.

⁸Maja Juan, tsoñꞌen nanꞌminꞌ tityincyooꞌhanꞌ nnön. Ndoꞌ vi na jndë jntyꞌia ndoꞌ jndyi, joꞌ tëcoꞌxtyë na tonnon ángelꞌñeen na ntsitꞌmanꞌ jahin ngꞌe na siꞌman jonhanꞌ nnön.

⁹Majoꞌ tso jon nnön: —Tyiꞌntsaꞌ na nndaꞌ ee mantyi condui ja na matyeꞌntjön nnon Tyoꞌtsꞌon chaꞌxjen ꞌuꞌ. ꞌUꞌ ndoꞌ mantyi nque ntyꞌiuꞌ na coninncyahan jñꞌoonꞌ jon ntyja ꞌnaanꞌ nchu vaa ꞌnan na nguaa, ndoꞌ yo ninꞌtsoñꞌen nnꞌan na conanꞌvehan joo jñꞌoon na chu tsonvahin. ꞌUꞌ xiaꞌntyi nquii Tyoꞌtsꞌon quitsitꞌmanꞌ.

¹⁰Mantyi itsontyichen jon nnön: —Joo jñꞌoon na chu juu tsonvahin ntyja ꞌnan na xejnda na nguaahanꞌ, ncyaꞌ na cꞌoon tyincyohanꞌ ndëë nnꞌan, ee ngꞌe jndë tichjo xjen na ntsiquindëñꞌehanꞌ joohanꞌ.

¹¹Juu tsꞌan na itsꞌaa natyia, quitsꞌaatochen juu ꞌnan natyia. Ndoꞌ juu tsꞌan na minꞌcyantyi vamꞌaan, quintjohin ntyja ꞌnaanꞌhanꞌ. Ndoꞌ juu tsꞌan na vamꞌaan juu ntyja ꞌnaanꞌ na ya, ninvito cꞌoon juu ntyja ꞌnaanꞌhan. Ndoꞌ mantyi juu tsꞌan na itsijiꞌua Tyoꞌtsꞌonhin, ninvito camꞌaan jon ntyja ꞌnaanꞌhanꞌ.

¹²Itso Jesucristo: —Quitquenhoꞌ cüenta macje ncüjënön. Ndoꞌ na ncjöyꞌön naya na ngacüjaꞌhanꞌ ncüii cüii tsꞌan xiꞌ ncüii yo ꞌnan na totsꞌaa juu.

¹³Ja mancüiixjen mꞌan vitjachen na nguaa tsoñꞌen, ndoꞌ ncꞌön xjen na jndë tenon tsoñꞌen. Ja mꞌan navejndyee ndoꞌ mantyi juu xjen na matsꞌia, ninvaa mꞌan. Condui ja xꞌee tsoñꞌen ndoꞌ mantyi ntyji nchu vaa contycüiihanꞌ.” Nndaꞌ jñꞌoon na tso jon nnön.

¹⁴“Nein jndyi joo nnꞌan na cotmanhan ndiaahan chaꞌ na nnincyaahanꞌ na vanaan na ngüenonhan jndyuentꞌaa na ngoqueꞌhan quiiꞌ juu tsjoon Jerusalén xco naijon na mꞌaan juu tsꞌoon na nninncyaahanꞌ na cotaꞌndoꞌhan, na ntquiihan tëëꞌhanꞌ.

¹⁵Majoꞌ na toxenꞌ teonntjöꞌ juu tsjoonꞌñeen, joꞌ mꞌan joo nnꞌan na ntjein contꞌahan yo ntyjehan yo joo nnꞌan na contꞌa tsꞌian quinduaꞌ, yo joo nnꞌan na veꞌ ndö ro mꞌanhan yo nnꞌan, ndoꞌ nnꞌan na conanꞌcüjehan ntyjehan, ndoꞌ mantyi yo nnꞌan na conanꞌtꞌmaanꞌhan ꞌnan na chito Tyoꞌtsꞌonhanꞌ, yo ninꞌtsoñꞌen nnꞌan na conanꞌviꞌnnꞌanhan ntyjehan ndoꞌ na conanꞌneinhan jñꞌoon quintu. Jñꞌoon na matsꞌia na icüjiꞌ jndyoyuhanꞌ

¹⁶—Ja Jesús jndë jñön juu ángel cüenta na mꞌanhoꞌ na quitsiꞌman jon tsoñꞌen jñꞌoonminꞌ ndëë ꞌoꞌ na conduihoꞌ tmaanꞌ nnꞌan na icüji Tyoꞌtsꞌon cüentaaꞌ nquii jon. Ja condui tsjan ꞌnaanꞌ David na jndyocahanꞌ. Ndoꞌ mantyi condui ja quixjuunco na quixuee jndyihanꞌ.

¹⁷Nquii Espíritu Santo yo joo nnꞌan na conduihan scuuꞌ Quitsman Chjo conduehan: —ꞌUꞌ ta Jesús, quindyoꞌ. Ndoꞌ minninchen tsꞌan na indyii juu jñꞌoonminꞌ, mantyi quitso juu: —Quindyoꞌ ta Jesús. Ndoꞌ minꞌcya ro tsꞌan na ninꞌcꞌu juu ndaa, quitsindyooꞌhin. Na veꞌ yu quindyocꞌu juu ndaa na incyaahanꞌ na cotaꞌndoꞌ nnꞌan.

¹⁸Tsonvahin chuhanꞌ jñꞌoon ntyja ꞌnaanꞌ nchu vaa ꞌnan na nguaa. Nnon ncüii cüii tsꞌan na indyiihanꞌ, macüjiꞌ jndyoyu ja jñꞌoon na toncuuꞌ. Xe na aa ntscüantjoꞌ juu jñꞌoon na itsiquindyi jñꞌoonminꞌ, yajoꞌ nacjooꞌ tsanꞌñeen ntscüantjoꞌ Tyoꞌtsꞌon ncüii cüii nnon naviꞌ na itsiquindyi tsonvahin.

¹⁹Ndoꞌ mantyi xe na aa ncüjiꞌ ndyaꞌ tsꞌan minndye jñꞌoon na chu tsonvahin ntyja nchu vaa ꞌnan na nguaa, taxeꞌncyaa Tyoꞌtsꞌon na vanaan na ntquii tsanꞌñeen tëëꞌ juu tsꞌoon na incyaahanꞌ na cotaꞌndoꞌ nnꞌan, min tyiꞌjeꞌncyaa jon na vanaan na ngaqueeꞌ tsanꞌñeen quiiꞌ tsjoon cüentaaꞌ jon. Juu tsonvahin itsiquindyihanꞌ ntyja ꞌnaan ve nnon jñꞌoonminꞌ.

²⁰Manquiintyi Jesús na icüjiꞌ jndyoyu jon jñꞌoonminꞌ, itso jon: —Jñꞌoon na mayuuꞌ, cje na ncüjënön na mꞌanhoꞌ. Quindui na nndaꞌ. Quindyoꞌ ꞌuꞌ ta Jesús.

²¹Juu naya na condui nquii ta Jesús, cꞌoonhanꞌ yo nque nnꞌan na conduihan cüentaaꞌ Tyoꞌtsꞌꞌon.