Read Ang Biblia, 1978 Job 10 Bible Online

Job 10 - Ang Biblia, 1978 bible

Job 10

¹Ang aking kaluluwa ay nalulunos sa aking buhay; Aking palalayain ang aking daing; Ako'y magsasalita sa kapaitan ng aking kaluluwa.

²Sasabihin ko sa Dios: Huwag mo akong hatulan; Ipakilala mo sa akin kung bakit nakikipagtalo ka sa akin.

³ Mabuti ba sa iyo na ikaw ay mamighati, Na iyong itakuwil ang gawa ng iyong mga kaaway, At iyong pasilangin ang payo ng masama?

⁴ Ikaw ba'y may mga matang laman, O nakakakita ka bang gaya ng pagkakita ng tao?

⁵Ang iyo bang mga kaarawan ay gaya ng mga kaarawan ng tao, O ang iyong mga taon ay gaya ng mga kaarawan ng tao,

⁶Upang ikaw ay magsiyasat ng aking kasamaan, At magusisa ng aking kasalanan,

⁷Bagaman iyong nalalaman na ako'y hindi masama; At walang makapagliligtas sa iyong kamay?

⁸ Ang iyong mga kamay ang siyang lumalang at nagbigay anyo sa akin Sa buong palibot; gayon ma'y pinahihirapan mo ako.

⁹Iyong alalahanin, isinasamo ko sa iyo, na ako'y iyong binigyang anyo na gaya ng putik; At iuuwi mo ba ako uli sa pagkaalabok?

¹⁰Hindi mo ba ako ibinuhos na parang gatas, At binuo mo akong parang keso?

¹¹Ako'y binihisan mo ng balat at laman, At sinugpong mo ako ng mga buto at mga litid.

¹²Ako'y pinagkalooban mo ng buhay at kagandahang-loob, At pinamalagi ang aking diwa ng iyong pagdalaw.

¹³Gayon ma'y ang mga bagay na ito ay iyong ikinubli sa iyong puso; Talastas ko na ito'y sa iyo:

¹⁴Kung ako'y magkasala, iyo nga akong tinatandaan, At hindi mo ako patatawarin sa aking kasamaan.

¹⁵Kung ako'y maging masama, sa aba ko; At kung ako'y maging matuwid, hindi ko man itataas ang aking ulo; Yamang puspos ng kakutyaan, At ng pagmamasid niring kadalamhatian.

¹⁶At kung ang aking ulo ay mataas, iyong hinuhuli akong parang leon: At napakikita ka uling kagilagilalas sa akin.

¹⁷Iyong binabago ang iyong mga pagsaksi laban sa akin, At dinaragdagan mo ang iyong galit sa akin; Paninibago at pakikipagbaka ang sumasaakin.

¹⁸ Bakit mo nga ako inilabas mula sa bahay-bata? Napatid sana ang aking hininga, at wala nang matang nakakita pa sa akin.

¹⁹Ako sana'y naging parang hindi nabuhay; Nadala sana ako mula sa bahay-bata hanggang sa libingan,

²⁰ Hindi ba kaunti ang aking mga araw? paglikatin mo nga, At ako'y iyong bayaan, upang ako'y maginhawahan ng kaunti,

²¹ Bago ako manaw doon na hindi ako babalik, Sa lupain ng kadiliman at ng lilim ng kamatayan;

²²Ang lupain na dilim, na gaya ng salimuot na kadiliman; Lupain ng lilim ng kamatayan, na walang anomang ayos, At doon sa ang liwanag ay gaya ng salimuot na kadiliman.