Read Ang Biblia, 1978 Job 11 Bible Online

Job 11 - Ang Biblia, 1978 bible

Job 11

¹Nang magkagayo'y sumagot si Sophar na Naamathita, at nagsabi,

²Hindi ba sasagutin ang karamihan ng mga salita? At ang lalaking masalita ay aariing ganap?

³Pamamayapain ba ang mga tao ng iyong mga paghahambog. At kung ikaw ay nanunuya, wala bang hihiya sa iyo?

⁴Sapagka't iyong sinasabi, Ang aking aral ay dalisay, At ako'y malinis sa iyong mga mata.

⁵Nguni't Oh ang Dios nawa'y magsalita, At bukhin ang kaniyang mga labi laban sa iyo;

⁶At ipakilala nawa sa iyo ang mga lihim ng karunungan, Pagka't siya ay masagana sa pagkaunawa. Talastasin mo nga na nilalapatan ka ng Dios ng kulang kay sa nauukol sa iyong kasamaan.

⁷ Masusumpungan mo ba ang Dios sa pagsaliksik? Masusumpungan mo ba sa kasakdalan ang Makapangyarihan sa lahat?

⁸Mataas na gaya ng langit; anong iyong magagawa? Malalim kay sa Sheol: anong iyong malalaman?

⁹Ang sukat niyao'y mahaba kay sa lupa. At maluwang kay sa dagat.

¹⁰Kung siya'y dumaan at magsara, At tumawag sa kahatulan, sino ngang makapipigil sa kaniya?

¹¹Sapagka't nakikilala niya ang mga walang kabuluhang tao: Nakikita rin naman niya ang kasamaan, bagaman hindi niya pinapansin.

¹²Nguni't ang walang kabuluhang tao ay walang unawa, Oo, ang tao ay ipinanganak na gaya ng anak ng mabangis na asno.

¹³Kung iyong ihahanda ang iyong puso, At iuunat mo ang iyong kamay sa kaniya;

¹⁴Kung ang kasamaan ay sumaiyong kamay, ilayo mo, At huwag manahan ang kalikuan sa iyong mga tolda;

¹⁵ Walang pagsala ngang iyong itataas ang iyong mukha na walang kapintasan; Oo, ikaw ay matatatag, at hindi matatakot:

¹⁶Sapagka't iyong malilimutan ang iyong karalitaan; Iyong aalalahaning parang tubig na umaagos:

¹⁷At ang iyong buhay ay magiging lalong maliwanag kay sa katanghaliang tapat; Bagaman magkaroon ng kadiliman, ay magiging gaya ng umaga.

¹⁸At ikaw ay matitiwasay sapagka't may pagasa; Oo, ikaw ay magsiyasat sa palibot mo, at magpapahinga kang tiwasay.

¹⁹ Ikaw nama'y hihiga at walang tatakot sa iyo; Oo, maraming liligaw sa iyo.

²⁰Nguni't ang mga mata ng masama ay mangangalumata, At mawawalan sila ng daang tatakasan, At ang kanilang pagasa ay pagkalagot ng hininga.