Read Ang Biblia, 1978 Job 12 Bible Online

Job 12 - Ang Biblia, 1978 bible

Job 12

¹Nang magkagayo'y sumagot si Job; at nagsabi,

²Walang pagaalinlangan na kayo ang bayan, At ang karunungan ay mamamatay na kasama ninyo.

³Nguni't ako'y may pagkaunawang gaya ninyo: Hindi ako huli sa inyo: Oo, sinong hindi nakaalam ng mga bagay na gaya nito?

⁴ Ako'y gaya ng tinatawanan ng kaniyang kapuwa, Ako na tumawag sa Dios, at sinagot niya: Ang ganap, ang taong sakdal ay tinatawanan.

⁵Sa pagiisip niyaong nasa katiwasayan ay may pagkakutya sa ikasasawi; Nahahanda sa mga iyan yaong nangadudulas ang paa.

⁶Ang mga tolda ng mga tulisan ay gumiginhawa, At silang nangagmumungkahi sa Dios ay tiwasay; Na ang kamay ay pinadadalhan ng Dios ng sagana.

⁷Nguni't tanungin mo ngayon ang mga hayop, at tuturuan ka nila: At ang mga ibon sa himpapawid, at kanilang sasaysayin sa iyo:

⁸O magsalita ka sa lupa, at magtuturo sa iyo; At ang mga isda sa dagat ay magsasaysay sa iyo.

⁹Sinong hindi nakakaalam sa lahat ng mga ito, Na ang kamay ng Panginoon ang siyang gumawa nito?

¹⁰ Nasa kamay niya ang kaluluwa ng bawa't bagay na may buhay, At ang hininga ng lahat ng mga tao.

¹¹ Hindi ba lumilitis ng mga salita ang pakinig; Gaya ng ngalangala na lumalasa ng pagkain niya?

¹²Nasa mga matanda ang karunungan, At sa kagulangan ang unawa.

¹³Nasa Dios ang karunungan at kakayahan; Kaniya ang payo at pagkaunawa.

¹⁴Narito, siya'y nagbabagsak at hindi maitayo uli; Siya'y kumulong ng tao at hindi mapagbubuksan.

¹⁵Narito, kaniyang pinipigil ang tubig at nangatutuyo; Muli, kaniyang binibitawan sila at ginugulo nila ang lupa.

¹⁶Nasa kaniya ang kalakasan at ang karunungan, Ang nadadaya at ang magdaraya ay kaniya.

¹⁷Kaniyang pinalalakad ang mga kasangguni na hubad sa bait, At ginagawa niyang mga mangmang ang mga hukom.

¹⁸Kaniyang kinakalag ang panali ng mga hari, At binibigkisan ang kanilang mga baywang ng pamigkis.

¹⁹Kaniyang pinalalakad na hubad sa bait ang mga saserdote.

²⁰Kaniyang pinapagbabago ang pananalita ng napagtitiwalaan. At inaalis ang pagkaunawa ng mga matanda.

²¹ Siya'y nagbubuhos ng kutya sa mga pangulo, At kinakalag ang pamigkis ng malakas.

²²Siya'y naglilitaw ng mga malalim na bagay mula sa kadiliman, At inilalabas sa liwanag ang lihim ng kamatayan.

²³ Kaniyang pinararami ang mga bansa at mga nililipol niya: Kaniyang pinalaki ang mga bansa, at mga dinala sa pagkabihag.

²⁴Kaniyang inaalis ang pangunawa mula sa mga pinuno ng bayan sa lupa, At kaniyang pinagagala sila sa ilang na doo'y walang lansangan.

²⁵Sila'y nagsisikapa sa dilim na walang liwanag, At kaniyang pinagigiraygiray sila na gaya ng lango.