Read Ang Biblia, 1978 Job 13 Bible Online

Job 13 - Ang Biblia, 1978 bible

Job 13

¹Narito, nakita ang lahat na ito ng aking mata, Ang aking tainga ay nakarinig at nakaunawa.

²Kung ano ang iyong nalalaman, ay nalalaman ko rin naman: Hindi ako huli sa inyo.

³Walang pagsalang ako'y magsasalita sa Makapangyarihan sa lahat, At nagnanasa akong makipagmatuwiranan sa Dios.

⁴Nguni't kayo'y mapagkatha ng mga kabulaanan. Kayong lahat ay mga manggagamot na walang kabuluhan.

⁵Mano nawa ay magsitahimik kayong lahat! At magiging inyong karunungan.

⁶Dinggin ninyo ngayon ang aking pangangatuwiran, At inyong dinggin ang mga pagsasanggalang ng aking mga labi.

⁷Kayo ba'y mangagsasalita ng kalikuan dahil sa Dios, At mangungusap ng karayaan dahil sa kaniya?

⁸Inyo bang lilingapin ang kaniyang pagka Dios? Inyo bang ipakikipagtalo ang Dios?

⁹ Mabuti ba na kayo'y siyasatin niya? O kung paanong dinadaya ang isang tao ay inyo bang dadayain siya?

¹⁰Walang pagsalang sasawayin niya kayo, Kung lihim na kayo'y tatangi ng pagkatao.

¹¹Hindi ba kayo tatakutin ng kaniyang karilagan, At ang gulat sa kaniya ay sasa inyo?

¹²Ang inyong mga alaalang sabi ay kawikaang abo, Ang inyong mga pagsasanggalang ay mga pagsasanggalang na putik.

¹³Magsitahimik kayo, bayaan ninyo ako, na ako'y makapagsalita, At paratingin sa akin ang darating.

¹⁴Bakit kakagatin ng aking mga ngipin ang aking laman, At aking ilalagay ang aking buhay sa aking kamay?

¹⁵ Bagaman ako'y patayin niya, akin ding hihintayin siya: Gayon ma'y aking aalalayan ang aking mga lakad sa harap niya.

¹⁶Ito man ay magiging aking kaligtasan; Sapagka't ang isang di banal ay hindi makahaharap sa kaniya.

¹⁷Pakinggan ninyong masikap ang aking pananalita, At ang aking pahayag ay sumainyong mga pakinig.

¹⁸Narito, ngayon, aking inayos ang aking usap; Talastas ko na ako'y matuwid.

¹⁹ Sino ang makikipagtalo sa akin? Sapagka't ngayo'y tatahimik ako at malalagot ang aking hininga.

²⁰ Dalawang bagay lamang ang huwag mong gawin sa akin, Kung magkagayo'y hindi ako magkukubli sa iyong mukha:

²¹Iurong mo ng malayo ang iyong kamay sa akin; At huwag akong takutin ng pangingilabot sa iyo.

²²Kung magkagayo'y tumawag ka, at ako'y sasagot; O papagsalitain mo ako, at sumagot ka sa akin.

²³Ilan ang aking mga kasamaan at mga kasalanan? Ipakilala mo sa akin ang aking pagsalangsang at ang aking kasalanan.

²⁴ Bakit ikinukubli mo ang iyong mukha, At inaari mo akong iyong kaaway?

²⁵Iyo bang pangingilabutin ang isang dahong pinapaspas ng hangin? At iyo bang hahabulin ang dayaming tuyo?

²⁶ Sapagka't ikaw ay sumusulat ng mga mabigat na bagay laban sa akin, At ipinamamana mo sa akin ang mga kasamaan ng aking kabataan:

²⁷ Iyo ring inilalagay ang aking mga paa sa pangawan, At pinupuna mo ang lahat kong landas: Ikaw ay gumuguhit ng isang guhit sa palibot ng mga talampakan ng aking mga paa:

²⁸Bagaman ako'y parang bagay na bulok na natutunaw, Na parang damit na kinain ng tanga.