Read Ang Biblia, 1978 Job 19 Bible Online

Job 19 - Ang Biblia, 1978 bible

Job 19

¹Nang magkagayo'y sumagot si Job, at nagsabi,

²Hanggang kailan pahihirapan ninyo ang aking kaluluwa, At babagabagin ako ng mga salita?

³Ng makasangpung ito ay pinulaan ninyo ako: Kayo'y hindi nangapapahiya na nangagpapahirap sa akin.

⁴At kahima't ako'y magkamali, Ang aking kamalian ay maiwan sa aking sarili.

⁵Kung tunay na kayo'y magpapakalaki laban sa akin, At ipakikipagtalo laban sa akin ang kakutyaan ko:

⁶Talastasin ninyo ngayon na inilugmok ako ng Dios, At inikid ako ng kaniyang silo.

⁷Narito, ako'y humihiyaw dahil sa kamalian, nguni't hindi ako dinidinig; Ako'y humihiyaw ng tulong, nguni't walang kahatulan.

⁸Kaniyang pinadiran ang aking daan upang huwag akong makaraan, At naglagay ng kadiliman sa aking mga landas.

⁹ Hinubaran niya ako ng aking kaluwalhatian, At inalis ang putong sa aking ulo.

¹⁰Kaniyang inilugmok ako sa bawa't dako, at ako'y nananaw: At ang aking pagasa ay binunot niyang parang punong kahoy.

¹¹Kaniya rin namang pinapagalab ang kaniyang pagiinit laban sa akin, At ibinilang niya ako sa kaniya na gaya ng isa sa kaniyang mga kaaway,

¹²Ang kaniyang mga hukbo ay dumarating na magkakasama, At ipinagpatuloy ang kanilang lakad laban sa akin, At kinubkob ang palibot ng aking tolda.

¹³ Inilayo niya ang aking mga kapatid sa akin, At ang aking mga kakilala ay pawang nangiba sa akin.

¹⁴Ang aking mga kamaganak ay nangagsilayo, At nilimot ako ng aking mga kasamasamang kaibigan.

¹⁵Silang nagsisitahan sa aking bahay, at ang aking mga lingkod na babae, ay ibinibilang akong manunuluyan; Ako'y naging kaiba sa kanilang paningin.

¹⁶Aking tinatawag ang aking lingkod, at hindi ako sinasagot, Bagaman sinasamo ko siya ng aking bibig.

¹⁷Ang aking hininga ay iba sa aking asawa, At ang aking pamanhik sa mga anak ng tunay kong ina.

¹⁸Pati ng mga bata ay humahamak sa akin; Kung ako'y bumangon, sila'y nangagsasalita ng laban sa akin:

¹⁹Lahat ng aking mahal na kaibigan ay nangayayamot sa akin: At ang aking minamahal ay nagsipihit ng laban sa akin,

²⁰Ang aking buto ay dumidikit sa aking balat at sa aking laman, At ako'y nakatanan ng sukat sa balat ng aking mga ngipin.

²¹Mahabag kayo sa akin, mahabag kayo sa akin, Oh kayong mga kaibigan ko; Sapagka't kinilos ako ng kamay ng Dios,

²²Bakit ninyo ako inuusig na gaya ng Dios. At hindi pa kayo nasisiyahan sa akin laman?

²³Oh mangasulat nawa ngayon ang aking mga salita! Oh mangalagda nawa sa isang aklat!

²⁴Ng isa nawang panulat na bakal at tingga, Na mangaukit nawa sa bato magpakailan man!

²⁵Nguni't talastas ko na manunubos sa akin ay buháy, At siya'y tatayo sa lupa sa kahulihulihan:

²⁶At pagkatapos na magibang ganito ang aking balat, Gayon ma'y makikita ko ang Dios sa aking laman:

²⁷Siyang makikita ko ng sarili, At mamamasdan ng aking mga mata, at hindi ng iba. Ang aking puso ay natutunaw sa loob ko.

²⁸Kung inyong sabihin: Paanong aming pag-uusigin siya? Dangang ang kadahilanan ay nasusumpungan sa akin;

²⁹Mangatakot kayo sa tabak: Sapagka't ang kapootan ang nagdadala ng mga parusa ng tabak, Upang inyong malaman na may kahatulan.