Read Ang Biblia, 1978 Job 26 Bible Online

Job 26 - Ang Biblia, 1978 bible

Job 26

¹Nang magkagayo'y sumagot si Job, at nagsabi,

²Paano mong tinulungan siya na walang kapangyarihan! Paano mong iniligtas ang kamay na walang lakas!

³Paano mong pinayuhan siya na walang karunungan, At saganang ipinahayag mo ang mabuting kaalaman!

⁴Kanino mo binigkas ang mga salita? At kanino ang diwa na lumabas sa iyo?

⁵ Ang mga patay ay nanginginig Sa ilalim ng tubig, at ang mga nananahan doon.

⁶ Ang Sheol ay hubad sa harap ng Dios, At ang Abaddon ay walang takip.

⁷ Kaniyang iniuunat ang hilagaan sa pagitang walang laman, At ibinibitin ang lupa sa wala.

⁸ Kaniyang itinatali ang tubig sa kaniyang masinsing alapaap; At ang alapaap ay hindi nahahapak sa ilalim nila.

⁹Kaniyang tinatakpan ang ibabaw ng kaniyang luklukan, At iniladlad ang kaniyang mga alapaap sa ibabaw niyaon.

¹⁰ Siya'y gumuguhit ng isang hangganan sa ibabaw ng tubig, Hanggang sa pinagsasalikupan ng liwanag at kadiliman.

¹¹ Ang mga haligi ng langit ay nagsisipanginig. At nangatitigilan sa kaniyang saway.

¹²Kaniyang pinapag-iinalon ang dagat ng kaniyang kapangyarihan, At sa kaniyang kaalaman ay sinasaktan niya ang Rahab.

¹³ Sa pamamagitan ng kaniyang Espiritu ay ginayakan niya ang langit; Sinaksak ng kaniyang mga kamay ang maliksing ahas.

¹⁴Narito, ang mga ito ang mga gilid lamang ng kaniyang mga daan: At pagkarahan ng bulong na ating naririnig sa kaniya! Nguni't sinong makakaunawa ng kulog ng kaniyang kapangyarihan?