Read Ang Biblia, 1978 Job 27 Bible Online

Job 27 - Ang Biblia, 1978 bible

Job 27

¹At muling sinambit ni Job ang kaniyang talinhaga, at nagsabi,

²Buhay ang Dios, na siyang nagalis ng aking katuwiran, At ang Makapangyarihan sa lahat na siyang nagpapanglaw ng aking kaluluwa;

³(Sapagka't ang aking buhay ay buo pa sa akin, At ang espiritu ng Dios ay nasa mga butas ng aking ilong);

⁴Tunay na ang aking mga labi ay hindi magsasalita ng kalikuan, Ni ang aking dila man ay magsasaysay ng karayaan.

⁵Malayo nawa sa aking kayo'y ariin kong ganap: Hanggang sa ako'y mamatay ay hindi ko aalisin sa akin ang aking pagtatapat.

⁶Ang aking katuwiran ay aking pinanghahawakan at hindi ko bibitiwan: Hindi ako aalipustain ng aking puso habang ako'y buhay.

⁷Ang aking kaaway ay maging gaya nawa ng masama, At ang bumangon laban sa akin ay maging gaya nawa ng liko.

⁸ Sapagka't ano ang pagasa ng di banal, bagaman siya'y makikinabang sa kaniya, Pagka kinuha ng Dios ang kaniyang kaluluwa?

⁹ Didinggin ba ng Dios ang kaniyang iyak. Pagka ang kabagabagan ay dumating sa kaniya?

¹⁰Makapagsasaya ba siya sa Makapangyarihan sa lahat, At tatawag sa Dios sa lahat ng mga panahon?

¹¹Aking tuturuan kayo ng tungkol sa kamay ng Dios; Ang nasa Makapangyarihan sa lahat ay hindi ko ililihim.

¹²Narito, kayong lahat ay nangakakita; Bakit nga kayo ay lubos na nawalan ng kabuluhan?

¹³ Ito ang bahagi ng masamang tao sa Dios, At ang mana ng mga mamimighati, na kanilang tinatanggap sa Makapangyarihan sa lahat.

¹⁴ Kung ang kaniyang mga anak ay dumami, ay para sa tabak, At ang kaniyang lahi ay hindi mabubusog ng tinapay.

¹⁵Yaong nangaiwan sa kaniya ay mangalilibing sa kamatayan, At ang kaniyang mga bao ay hindi magsisipanaghoy.

¹⁶Bagaman siya'y magbunton ng pilak na parang alabok, At maghahanda ng bihisan na parang putik;

¹⁷Maihahanda niya, nguni't ang ganap ang magsusuot niyaon. At babahagihin ng walang sala ang pilak.

¹⁸Siya'y nagtatayo ng kaniyang bahay na gaya ng tanga, At gaya ng isang bantayan na ginagawa ng bantay.

¹⁹Siya'y nahihigang mayaman, nguni't hindi siya pupulutin; Kaniyang ididilat ang kaniyang mga mata, nguni't wala na siya.

²⁰ Mga kakilabutan ang tumatabon sa kaniya na gaya ng tubig; Bagyo ang umaagaw sa kaniya sa kinagabihan,

²¹Tinangay siya ng hanging silanganan, at siya'y nananaw; At pinapalis siya sa kaniyang kinaroroonang dako.

²²Sapagka't hahalibasin siya ng Dios, at hindi magpapatawad; Siya'y magpupumilit na tumakas sa kaniyang kamay.

²³ Ipapakpak ng mga tao ang kanilang mga kamay sa kaniya. At hihiyawan siya mula sa kaniyang kinaroroonang dako.