Read Ang Biblia, 1978 Job 39 Bible Online

Job 39 - Ang Biblia, 1978 bible

Job 39

¹Nalalaman mo ba ang panahong ipinanganganak ng mga kambing bundok? O matatandaan mo ba ang mga pagdaramdam ng mga usa?

²Mabibilang mo ba ang mga buwan ng kanilang kagampanan? O nalalaman mo ba ang panahong kanilang ipinanganak?

³Sila'y nagsisiyuko, kanilang inilalabas ang kanilang mga anak, Kaniyang iniwawaksi ang kanilang kapanglawan.

⁴Ang kanilang mga anak ay nagiging malakas, sila'y nagsisilaki sa kaparangan; Sila'y nagsisiyao at hindi na nagsisibalik.

⁵Sinong nagpakawala sa mabangis na asno? O sinong nagkalag ng mga tali ng mailap na asno?

⁶Na ginawa kong bahay niya ang ilang, At ang lupaing maasin na kaniyang tahanan.

⁷Kaniyang nililibak ang kaguluhan ng bayan. Ni hindi niya dinidinig ang sigaw ng nagpapatakbo ng hayop.

⁸Ang libot ng mga bundok ay kaniyang pastulan, At kaniyang sinasaliksik ang bawa't sariwang bagay.

⁹Matutuwa ba ang bakang gubat na maglingkod sa iyo? O matitira ba sa siping ng iyong pasabsaban?

¹⁰Matatalian mo ba ang bakang gubat ng iyong panali sa pangbukid? O magbubusagsag ba ng mga libis sa likuran mo?

¹¹Aasa ka ba sa kaniya, dahil sa siya'y totoong malakas? O iiwan mo ba ang iyong gawain sa kaniya?

¹²Ipagkakatiwala mo ba sa kaniya na iuuwi sa bahay ang iyong binhi, At pipisanin ang mga butil sa iyong giikan?

¹³Ang pakpak ng avestruz ay nagagalak; Nguni't may kagandahang loob ba ang kanilang mga pakpak at mga balahibo?

¹⁴Sapagka't nagiiwan ng kaniyang mga itlog sa lupa, At pinaiinit ang mga yaon sa alabok,

¹⁵At kinalilimutang mangapipisa ng paa, O mangayuyurakan ng mabangis na hayop.

¹⁶ Siya'y nagmamatigas laban sa kaniyang mga sisiw na tila hindi kaniya: Bagaman ang kaniyang gawa ay mawalang kabuluhan, hindi niya ikinatatakot;

¹⁷Sapagka't binawian siya ng Dios ng karunungan, Ni hindi siya binahaginan ng unawa.

¹⁸Anomang panahon na siya'y napaiitaas, Hinahamak niya ang kabayo at ang sakay nito.

¹⁹Nagbigay ka ba sa kabayo ng kalakasan? Binihisan mo ba ang kaniyang leeg ng buhok na gumagalaw?

²⁰Pinalulukso mo ba siya na parang balang? Ang kaluwalhatian ng kaniyang bahin ay kakilakilabot.

²¹Siya'y kumukutkot sa libis, at nagagalak sa kaniyang kalakasan, Siya'y sumasagupa sa mga taong may sandata.

²²Tinutuya niya ang takot at hindi nanglulupaypay: Ni hindi tinatalikuran ang tabak.

²³Ang suksukan ng pana ay tumutunog laban sa kaniya, Ang makintab na sibat at ang kalasag.

²⁴Kaniyang sinasakmal ang lupa na may kabangisan at poot; Ni hindi siya naniniwala na yao'y tunog ng pakakak.

²⁵Kaniyang sinasabi sa tuwing tutunog ang mga pakakak: Aha! At kaniyang naaamoy ang pagbabaka sa malayo, Ang sigaw ng mga kapitan at ang hiyaw.

²⁶Lumilipad ba ang uwak sa pamamagitan ng inyong karunungan, At iniuunat ba ang kaniyang mga pakpak sa dakong timugan?

²⁷Napaiilanglang ba ang agila sa iyong utos, At gumagawa ba ng kaniyang pugad sa itaas?

²⁸Sila'y nananahan sa malaking bato, at doon tumitira, Sa taluktok ng burol at sa katibayan,

²⁹Mula roo'y tumitingin siya ng madadagit; Ang kaniyang mga mata ay tumatanaw sa malayo.

³⁰Ang mga anak naman niya ay nagsisihitit ng dugo: At kung saan naroon ang pinatay ay naroon siya.