Read Ang Biblia, 1978 Job 41 Bible Online

Job 41 - Ang Biblia, 1978 bible

Job 41

¹Mahuhuli mo ba ang buwaya ng isang bingwit? O mailalabas mo ba ang kaniyang dila ng isang panali?

²Makapaglalagay ka ba ng tali sa kaniyang ilong? O makabubutas sa kaniyang panga ng isang taga ng bingwit?

³Mamamanhik ba siya ng marami sa iyo? O magsasalita ba siya ng mga malumanay na salita sa iyo?

⁴Makikipagtipan ba siya sa iyo, Upang ariin mo siyang alipin magpakailan man?

⁵Makikipaglaro ka ba sa kaniya na gaya sa isang ibon? O iyong tatalian ba siya para sa iyong mga dalaga?

⁶Makakalakal ba siya ng mga pulutong ng mangingisda? Mababahagi ba siya nila sa mga mangangalakal?

⁷Mahihiwa mo ba ang kaniyang balat ng sundang na bakal, O ang kaniyang ulo ng panaksak ng isda?

⁸Ipatong mo ang iyong kamay sa kaniya; Alalahanin mo ang pagbabaka at huwag mo nang gawin.

⁹Narito, ang pagasa riyan ay walang kabuluhan: Hindi ba malulugmok ang sinoman makita lamang yaon?

¹⁰Walang malakas na makapangahas kumilos niyaon: Sino ngang makatatayo sa harap ko?

¹¹ Sinong naunang nagbigay sa akin upang aking bayaran siya? Anomang nasa silong ng buong langit ay akin.

¹²Hindi ako tatahimik tungkol sa kaniyang mga sangkap ng katawan, Ni sa kaniya mang dakilang kapangyarihan, ni sa kaniya mang mainam na hugis.

¹³Sinong makapaglilitaw na karayagan ng kaniyang mga damit? Sinong makalalapit sa kaniyang magkasaping pangil?

¹⁴Sinong makapagbubukas ng mga pinto ng kaniyang mukha? Sa palibot ng kaniyang ngipin ay kakilabutan.

¹⁵Ang kaniyang mga matibay na palikpik ay kaniyang kapalaluan, Nangagkakadikit na maigi na gaya sa isang tatak na mahigpit.

¹⁶Nagkakadikit sa isa't isa, Na ang hangin ay hindi makaraan sa pagitan sa mga yaon.

¹⁷Sila'y nagkakasugpongan sa isa't isa; Nagkakalakip na magkasama, na hindi maihihiwalay.

¹⁸Ang kanilang mga bahin ay kumikislap ng apoy, At ang kanilang mga mata ay gaya ng mga bukang liwayway kung umaga.

¹⁹Mula sa kaniyang bibig ay lumalabas ang nagliliyab na sulo, At mga alipatong apoy ay nagsisilabas.

²⁰Mula sa kaniyang mga butas ng ilong ay lumalabas ang usok, Na gaya ng isang kumukulong talyasi at nagniningas na mga talahib.

²¹Ang kaniyang hinga ay nagpapaningas ng mga baga, At isang alab ay lumalabas sa kaniyang bibig.

²²Sa kaniyang leeg ay tumitira ang kalakasan, At ang kakilabutan ay sumasayaw sa harap niya.

²³Ang mga kaliskis ng kaniyang laman ay nangagkakadikitan; Nangagtutumibay sa kaniya; hindi magagalaw.

²⁴Ang kaniyang puso ay matatag na gaya ng isang bato; Oo, matatag na gaya ng batong pangibaba ng gilingan.

²⁵Pagka siya'y tumitindig ay natatakot ang makapangyarihan: Dahil sa pagkagulat ay nangalilito sila.

²⁶Kung siya'y tagain ninoman ng tabak ay hindi tumatalab; Ni ng sibat man, ng pana, ni ng matalas na tulis man.

²⁷Kaniyang ipinalalagay ang bakal na parang dayami, At ang tanso na parang lapok na kahoy.

²⁸Hindi niya mapatakas ng palaso: Ang mga batong panghilagpos ay nagiging sa kaniya'y parang pinagputulan ng trigo.

²⁹Ang mga panakbat ay nangapapalagay na parang pinagputulan ng trigo: Kaniyang tinatawanan ang galaw ng sibat.

³⁰Ang kaniyang mga sangkap sa ibaba ay gaya ng mga matulis na bibinga: Lumalaganap na tila saksak sa banlik.

³¹Kaniyang pinagpapakuluan ang kalaliman na parang palyok: Kaniyang ginagawa ang dagat na parang pamahid.

³²Kaniyang pinasisilang ang landas sa likuran niya; Aakalain ng sinoman na mauban ang kalaliman.

³³Sa ibabaw ng lupa ay walang gaya niya, Na likhang walang takot.

³⁴Kaniyang minamasdan ang bawa't mataas na bagay: Siya'y hari sa lahat ng mga anak na palalo.