Read Ang Biblia, 1978 Job 8 Bible Online

Job 8 - Ang Biblia, 1978 bible

Job 8

¹Nang magkagayo'y sumagot si Bildad na Suhita, at nagsabi,

²Hanggang kailan magsasalita ka ng mga bagay na ito? At hanggang kailan magiging gaya ng makapangyarihang hangin ang mga salita ng iyong bibig?

³ Nagliliko ba ng kahatulan ang Dios? O nagliliko ba ang Makapangyarihan sa lahat ng kaganapan?

⁴Kung ang iyong mga anak ay nangagkasala laban sa kaniya, At kaniyang ibinigay sila sa kamay ng kanilang pagkasalangsang:

⁵Kung hanapin mong mainam ang Dios, At iyong pamanhikan ang Makapangyarihan sa lahat;

⁶Kung ikaw ay malinis at matuwid; Walang pagsalang ngayo'y gigising siya dahil sa iyo. At pasasaganain ang tahanan ng iyong katuwiran.

⁷At bagaman ang iyong pasimula ay maliit, Gayon ma'y ang iyong huling wakas ay lalaking mainam.

⁸ Sapagka't ikaw ay magsisiyasat, isinasamo ko sa iyo, sa unang panahon, At pasiyahan mo ang sinaliksik ng kanilang mga magulang:

⁹ (Sapagka't tayo'y kahapon lamang, at walang nalalaman, Sapagka't ang ating mga kaarawan sa lupa ay anino:)

¹⁰Hindi ka ba nila tuturuan, at sasaysayin sa iyo, At mangagsasalita ng mga salita mula sa kanilang puso?

¹¹Makatataas ba ang yantok ng walang putik? Tutubo ba ang tambo ng walang tubig?

¹² Samantalang nasa kasariwaan, at hindi pinuputol, Natutuyong una kay sa alin mang damo.

¹³Gayon ang mga landas ng lahat na nagsisilimot sa Dios; At ang pagasa ng di banal ay mawawala:

¹⁴Na ang kaniyang pagtitiwala ay mapaparam, At ang kaniyang tiwala ay isang bahay gagamba.

¹⁵Siya'y sasandal sa kaniyang bahay, nguni't hindi tatayo; Siya'y pipigil na mahigpit dito, nguni't hindi makapagmamatigas.

¹⁶Siya'y sariwa sa harap ng araw, At ang kaniyang mga suwi ay sumisibol sa kaniyang halamanan.

¹⁷Ang kaniyang mga ugat ay nagkakapitan sa palibot ng bunton, Kaniyang minamasdan ang dako ng mga bato.

¹⁸Kung siya'y magiba sa kaniyang dako, Kung magkagayo'y itatakuwil niya siya, na sinasabi: Hindi kita nakita.

¹⁹Narito, ito ang kagalakan ng kaniyang lakad, At mula sa lupa ay sisibol ang mga iba.

²⁰Narito, hindi itatakuwil ng Dios ang sakdal na tao, Ni aalalayan man niya ang mga manggagawa ng kasamaan.

²¹Kaniya namang pupunuin ang iyong bibig ng pagtawa, At ang iyong mga labi ng paghiyaw.

²²Silang nangapopoot sa iyo ay mabibihisan ng pagkahiya; At ang tolda ng masama ay mawawala.