Read Ang Biblia, 1978 Mga Awit 106 Bible Online

Mga Awit 106 - Ang Biblia, 1978 bible

Mga Awit 106

¹ Purihin ninyo ang Panginoon. Oh mangagpasalamat kayo sa Panginoon; sapagka't siya'y mabuti; Sapagka't ang kaniyang kagandahang-loob ay magpakailan man.

² Sinong makapagbabadya ng mga makapangyarihang gawa ng Panginoon, O makapagpapakilala ng buo niyang kapurihan?

³Mapalad silang nangagiingat ng kahatulan, At siyang gumagawa ng katuwiran sa buong panahon.

⁴ Alalahanin mo ako, Oh Panginoon, ng lingap na iyong ipinagkaloob sa iyong bayan; Oh dalawin mo ako ng iyong pagliligtas:

⁵Upang makita ko ang kaginhawahan ng iyong hirang, Upang ako'y magalak sa kasayahan ng iyong bansa, Upang ako'y lumuwalhati na kasama ng iyong mana.

⁶ Kami ay nangagkasala na kasama ng aming mga magulang, Kami ay nangakagawa ng kasamaan, kami ay nagsigawa ng masama.

⁷Hindi naunawa ng aming mga magulang ang iyong mga kababalaghan sa Egipto; Hindi nila inalaala ang karamihan ng iyong mga kagandahang-loob, Kundi naging mapanghimagsik sa dagat, sa makatuwid baga'y sa Dagat na Mapula.

⁸Gayon ma'y iniligtas niya sila dahil sa kaniyang pangalan, Upang kaniyang maipabatid ang kaniyang matibay na kapangyarihan.

⁹Kaniyang sinaway naman ang Dagat na Mapula, at natuyo: Sa gayo'y pinatnubayan niya sila sa mga kalaliman, na parang ilang.

¹⁰At iniligtas niya sila sa kamay ng nangagtatanim sa kanila, At tinubos niya sila sa kamay ng kaaway.

¹¹ At tinabunan ng tubig ang kanilang mga kaaway: Walang nalabi sa kanila kahit isa.

¹²Nang magkagayo'y sinampalatayanan nila ang kaniyang mga salita; Inawit nila ang kaniyang kapurihan.

¹³ Nilimot nilang madali ang kaniyang mga gawa; Hindi sila naghintay sa kaniyang payo:

¹⁴ Kundi nagnais ng di kawasa sa ilang, At tinukso ang Dios sa ilang.

¹⁵ At binigyan niya sila ng kanilang hiling; Nguni't pinangayayat ang kanilang kaluluwa.

¹⁶ Kanilang pinanaghilian naman si Moises sa kampamento, At si Aaron na banal ng Panginoon.

¹⁷ Ang lupa ay bumuka, at nilamon si Dathan, At tinakpan ang pulutong ni Abiram.

¹⁸ At apoy ay nagningas sa kanilang pulutong; Sinunog ng liyab ang mga masama,

¹⁹ Sila'y nagsigawa ng guya sa Horeb, At nagsisamba sa larawang binubo.

²⁰Ganito nila pinapagbago ang kanilang kaluwalhatian Sa wangis ng baka na kumakain ng damo.

²¹Nilimot nila ang Dios na kanilang tagapagligtas, Na gumawa ng mga dakilang bagay sa Egipto;

²²Kagilagilalas na mga gawa sa lupain ng Cham, At kakilakilabot na mga bagay sa Dagat na Mapula.

²³ Kaya't sinabi niya, na kaniyang lilipulin sila, Kung si Moises na kaniyang hirang ay hindi humarap sa kaniya sa bitak, Upang pawiin ang kaniyang poot, upang huwag niyang lipulin sila.

²⁴ Oo, kanilang hinamak ang maligayang lupain, Hindi nila sinampalatayanan ang kaniyang salita;

²⁵Kundi nangagsiungol sa kanilang mga tolda, At hindi nangakinig sa tinig ng Panginoon.

²⁶Kaya't kaniyang isinumpa sa kanila, Na kaniyang ibubulid sila sa ilang:

²⁷At kaniyang ibubulid ang kanilang binhi sa mga bansa, At pangalatin sila sa mga lupain.

²⁸ Sila'y nangakilakip naman sa diosdiosang Baal-peor, At nagsikain ng mga hain sa mga patay.

²⁹Ganito minungkahi nila siya sa galit ng kanilang mga gawa; At ang salot ay lumitaw sa kanila.

³⁰ Nang magkagayo'y tumayo si Phinees, at gumawa ng kahatulan: At sa gayo'y tumigil ang salot.

³¹At nabilang sa kaniya na katuwiran, Sa lahat ng sali't saling lahi magpakailan man.

³² Kanilang ginalit din siya sa tubig ng Meriba, Na anopa't naging masama kay Moises dahil sa kanila:

³³ Sapagka't sila'y mapanghimagsik laban sa kaniyang diwa, At siya'y nagsalita ng walang pakundangan ng kaniyang mga labi.

³⁴Hindi nila nilipol ang mga bayan, Gaya ng iniutos ng Panginoon sa kanila;

³⁵ Kundi nangakihalo sa mga bansa, At nangatuto ng kanilang mga gawa:

³⁶ At sila'y nangaglingkod sa kanilang mga diosdiosan; Na naging silo sa kanila:

³⁷ Oo, kanilang inihain ang kanilang mga anak na lalake at babae sa mga demonio,

³⁸At nagbubo ng walang salang dugo, Sa makatuwid baga'y ng dugo ng kanilang mga anak na lalake at babae, Na kanilang inihain sa diosdiosan ng Canaan; At ang lupain ay nadumhan ng dugo.

³⁹Ganito sila nagpakahawa sa kanilang mga gawa, At nagsiyaong nagpakarumi sa kanilang mga gawa.

⁴⁰Kaya't nagalab ang pagiinit ng Panginoon laban sa kaniyang bayan, At kinayamutan niya ang kaniyang pamana.

⁴¹At ibinigay niya sila sa kamay ng mga bansa; At silang nangagtatanim sa kanila ay nangagpuno sa kanila.

⁴²Pinighati naman sila ng kanilang mga kaaway, At sila'y nagsisuko sa kanilang kamay.

⁴³ Madalas na iligtas niya sila; Nguni't sila'y mapanghimagsik sa kanilang payo, At nangababa sila sa kanilang kasamaan.

⁴⁴Gayon ma'y nilingap niya ang kanilang kahirapan, Nang kaniyang marinig ang kanilang daing:

⁴⁵ At kaniyang inalaala sa kanila ang kaniyang tipan, At nagsisi ayon sa karamihan ng kaniyang mga kagandahang-loob.

⁴⁶ Ginawa naman niyang sila'y kaawaan Niyaong lahat na nangagdalang bihag sa kanila.

⁴⁷ Iligtas mo kami, Oh Panginoon naming Dios, At pisanin mo kami na mula sa mga bansa, Upang mangagpasalamat sa iyong banal na pangalan, At mangagtagumpay sa iyong kapurihan.

⁴⁸ Purihin ang Panginoon, ang Dios ng Israel, Mula sa walang pasimula hanggang sa walang hanggan. At sabihin ng buong bayan, Siya nawa. Purihin ninyo ang Panginoon.