Read Ang Biblia, 1978 Mga Kawikaan 2 Bible Online

Mga Kawikaan 2 - Ang Biblia, 1978 bible

Mga Kawikaan 2

¹Anak ko, kung iyong tatanggapin ang aking mga salita, At tataglayin mo ang aking mga utos;

²Na anopa't iyong ikikiling ang iyong pakinig sa karunungan, At ihihilig mo ang iyong puso sa pagunawa;

³Oo, kung ikaw ay dadaing ng pagbubulay, At itataas mo ang iyong tinig sa pagunawa;

⁴ Kung iyong hahanapin siya na parang pilak, At sasaliksikin mo siyang parang kayamanang natatago.

⁵Kung magkagayo'y iyong mauunawa ang pagkatakot sa Panginoon, At masusumpungan mo ang kaalaman ng Dios.

⁶Sapagka't ang Panginoon ay nagbibigay ng karunungan, Sa kaniyang bibig nanggagaling ang kaalaman at kaunawaan:

⁷Kaniyang pinapagtataglay ang matuwid ng magaling na karunungan, Siya'y kalasag sa nagsisilakad sa pagtatapat;

⁸Upang kaniyang mabantayan ang mga landas ng kahatulan, At maingatan ang daan ng kaniyang mga banal.

⁹Kung magkagayo'y mauunawa mo ang katuwiran at ang kahatulan, At ang karampatan, oo, bawa't mabuting landas.

¹⁰Sapagka't karunungan ay papasok sa iyong puso, At kaalaman ay magiging ligaya sa iyong kaluluwa;

¹¹Kabaitan ay magbabantay sa iyo, Pagkaunawa ay magiingat sa iyo:

¹²Upang iligtas ka sa daan ng kasamaan, Sa mga taong nagsisipagsalita ng mga masamang bagay;

¹³Na nagpapabaya ng mga landas ng katuwiran, Upang magsilakad sa mga daan ng kadiliman;

¹⁴Na nangagagalak na magsigawa ng kasamaan, At nangaaaliw sa mga karayaan ng kasamaan,

¹⁵Na mga liko sa kanilang mga lakad, At mga suwail sa kanilang mga landas:

¹⁶ Upang iligtas ka sa masamang babae, Sa makatuwid baga'y sa di kilala na nanghahalina ng kaniyang mga salita;

¹⁷ Na nagpapabaya sa kaibigan ng kaniyang kabataan, At lumilimot ng tipan ng kaniyang Dios:

¹⁸Sapagka't ang kaniyang bahay ay kumikiling sa kamatayan, At ang kaniyang mga landas na sa patay:

¹⁹Walang naparoroon sa kaniya na bumabalik uli, Ni kanila mang tinatamo ang mga landas ng buhay:

²⁰Upang ikaw ay makalakad ng lakad ng mabubuting tao, At maingatan ang mga landas ng matuwid.

²¹ Sapagka't ang matuwid ay tatahan sa lupain, At ang sakdal ay mamamalagi roon.

²² Nguni't ang masama ay mahihiwalay sa lupain, At silang nagsisigawang may karayaan ay mangabubunot.