Read Ang Biblia, 1978 Mga Kawikaan 21 Bible Online

Mga Kawikaan 21 - Ang Biblia, 1978 bible

Mga Kawikaan 21

¹Ang puso ng hari ay nasa kamay ng Panginoon na parang mga batis: Kumikiling saan man niya ibigin.

² Bawa't lakad ng tao ay matuwid sa kaniyang sariling mga mata: Nguni't tinitimbang ng Panginoon ang mga puso.

³ Gumawa ng kaganapan at kahatulan Ay lalong kalugodlugod sa Panginoon kay sa hain.

⁴ Ang mapagmataas na tingin, at ang palalong puso, Siyang ilaw ng masama, ay kasalanan.

⁵Ang mga pagiisip ng masipag ay patungo sa kasaganaan lamang: Nguni't bawa't nagmamadali ay sa pangangailangan lamang.

⁶ Ang pagtatamo ng mga kayamanan sa pamamagitan ng sinungaling na dila Ay singaw na tinatangay na paroo't parito noong nagsisihanap ng kamatayan.

⁷Ang pangdadahas ng masama ay siya ring papalis sa kanila; Sapagka't sila'y nagsitangging magsigawa ng kahatulan.

⁸Ang lakad ng nagpapasan ng sala ay lubhang liko; Nguni't tungkol sa malinis, ang kaniyang gawa ay matuwid.

⁹ Lalong maigi ang tumahan sa sulok ng bubungan, Kay sa palatalong babae sa maluwang na bahay.

¹⁰ Ang kaluluwa ng masama ay nagnanasa ng kasamaan: Ang kaniyang kapuwa ay hindi nakakasumpong ng lingap sa kaniyang mga mata.

¹¹ Pagka ang mangduduwahagi ay pinarusahan, ang musmos ay nagiging pantas: At pagka ang pantas ay tinuturuan, siya'y tumatanggap ng kaalaman.

¹²Pinagninilay ng matuwid ang bahay ng masama, Kung paanong napapahamak ang masama sa kanilang pagkapariwara.

¹³ Ang nagtatakip ng kaniyang mga pakinig sa daing ng dukha, Siya naman ay dadaing, nguni't hindi didinggin.

¹⁴Ang kaloob na lihim ay nagpapatahimik ng galit, At ang alay sa sinapupunan, ay ng malaking poot.

¹⁵Kagalakan sa matuwid ang gumawa ng kahatulan; Nguni't kapahamakan sa mga manggagawa ng kasamaan.

¹⁶Ang tao na gumagala sa labas ng daan ng kaunawaan, Magpapahinga sa kapisanan ng patay.

¹⁷Ang umiibig ng kalayawan ay magiging dukha: Ang umiibig sa alak at langis ay hindi yayaman.

¹⁸ Ang masama ay isang katubusan para sa matuwid, At ang taksil ay sa lugar ng matuwid.

¹⁹ Lalong maigi ang tumahan sa ilang na lupain, Kay sa makisama sa palatalo at magagaliting babae.

²⁰May mahalagang kayamanan at langis sa tahanan ng pantas; Nguni't ito'y sinasakmal ng mangmang.

²¹ Ang sumusunod sa katuwiran at kagandahang-loob Nakakasumpong ng buhay, katuwiran, at karangalan.

²²Sinasampa ng pantas ang bayan ng makapangyarihan, At ibinabagsak ang lakas ng pagkakatiwala niyaon.

²³ Sinomang nagiingat ng kaniyang bibig at kaniyang dila Nagiingat ng kaniyang kaluluwa mula sa mga kabagabagan.

²⁴Ang palalo at mapagmataas na tao, manglilibak ang kaniyang pangalan, Siya'y gumagawa sa kahambugan ng kapalaluan.

²⁵ Ang nasa ng tamad ay pumapatay sa kaniya; Sapagka't tumatanggi ang kaniyang mga kamay sa paggawa.

²⁶May nagiimbot sa kasakiman buong araw: Nguni't ang matuwid ay nagbibigay at hindi nagkakait.

²⁷Ang hain ng masama ay karumaldumal: Gaano pa nga, pagka kaniyang dinadala na may masamang isip!

²⁸Ang sinungaling na saksi ay mamamatay: Nguni't ang taong nakikinig ay magsasalita upang mamalagi.

²⁹Ang masamang tao ay nagmamatigas ng kaniyang mukha; Nguni't tungkol sa taong matuwid, nagaayos ng kaniyang mga lakad.

³⁰ Walang karunungan, o kaunawaan man, O payo man laban sa Panginoon.

³¹ Ang kabayo ay handa laban sa kaarawan ng pagbabaka: Nguni't ang pagtatagumpay ay sa Panginoon.