Read Ang Biblia, 1978 Mga Kawikaan 9 Bible Online

Mga Kawikaan 9 - Ang Biblia, 1978 bible

Mga Kawikaan 9

¹ Itinayo ng karunungan ang kaniyang bahay, Kaniyang tinabas ang kaniyang pitong haligi:

² Pinatay niya ang kaniyang mga hayop: hinaluan niya ang kaniyang alak; Kaniya namang ginayakan ang kaniyang dulang.

³Kaniya namang sinugo ang kaniyang mga alilang babae; Siya'y sumisigaw sa mga pinakapantas na dako sa bayan:

⁴Kung sinoma'y musmos, pumasok dito: Tungkol sa kaniya na mapurol sa pagunawa, sinasabi niya sa kaniya:

⁵Kayo'y magsiparito, magsikain kayo ng aking tinapay, At magsiinom kayo ng alak na aking hinaluan.

⁶Iwan ninyo, ninyong mga musmos at kayo'y mabuhay; At kayo'y magsilakad sa daan ng kaunawaan.

⁷Siyang sumasaway sa manglilibak ay nagtataglay ng kahihiyan sa kaniyang sarili: At siyang sumasaway sa masama ay nagtataglay ng pula sa kaniyang sarili.

⁸ Huwag mong sawayin ang manglilibak, baka ipagtanim ka niya: Sawayin mo ang pantas, at kaniyang iibigin ka.

⁹Turuan mo ang pantas, at siya'y magiging lalong pantas pa: Iyong turuan ang matuwid, at siya'y lalago sa pagkatuto.

¹⁰ Ang pagkatakot sa Panginoon ay pasimula ng karunungan: At ang pagkakilala sa Banal ay kaunawaan.

¹¹Sapagka't sa pamamagitan ko ay dadami ang iyong mga kaarawan, At ang mga taon ng iyong buhay ay magsisidami.

¹² Kung ikaw ay pantas, ikaw ay pantas sa ganang iyong sarili: At kung ikaw ay manglilibak, ikaw na magisa ang magpapasan.

¹³ Ang hangal na babae ay madaldal; Siya'y musmos at walang nalalaman.

¹⁴At siya'y nauupo sa pintuan ng kaniyang bahay, Sa isang upuan sa mga mataas na dako sa bayan,

¹⁵Upang tawagin ang nangagdadaan, Na nagsisiyaong matuwid ng kanilang mga lakad:

¹⁶Sinomang musmos ay pumasok dito: At tungkol sa kaniya na mapurol sa pagunawa, sinasabi niya sa kaniya:

¹⁷ Ang mga nakaw na tubig ay matamis, At ang tinapay na kinakain sa lihim ay masarap.

¹⁸Nguni't hindi niya nalalaman na ang patay ay nandoon; Na ang mga panauhin niya ay nangasa mga kalaliman ng Sheol.