Read Ang Biblia, 2001 1 Cronica 16 Bible Online

1 Cronica 16 - Ang Biblia, 2001 bible

1 Cronica 16

¹Kanilang ipinasok ang kaban ng Diyos, at inilagay sa gitna ng tolda na itinayo ni David para rito, at sila'y naghandog ng mga handog na sinusunog, at mga handog pangkapayapaan sa harapan ng Diyos.

²Pagkatapos makapaghandog si David ng handog na sinusunog at ng mga handog pangkapayapaan, kanyang binasbasan ang bayan sa pangalan ng PANGINOON.

³Siya'y namahagi sa buong Israel, sa lalaki at gayundin sa babae, sa bawat isa ng isang tinapay at isang bahaging laman, at mga tinapay na pasas.

⁴Bukod dito'y hinirang niya ang ilan sa mga Levita upang maglingkod sa harapan ng kaban ng PANGINOON, at upang manalangin, magpasalamat, at magpuri sa PANGINOON, ang Diyos ng Israel.

⁵Si Asaf ang pinuno, at ang ikalawa'y sina Zacarias, Jeiel, Semiramot, Jehiel, Matithias, Eliab, Benaya, Obed-edom, at si Jeiel, na sila ang tutugtog sa mga alpa at mga lira. Si Asaf ang magpapatunog ng pompiyang,

⁶at sina Benaya at Jahaziel na mga pari ang patuloy na hihihip sa mga tambuli sa harapan ng kaban ng tipan ng Diyos.

⁷Nang araw na iyon ay unang iniutos ni David na ang pagpapasalamat ay awitin sa PANGINOON, sa pamamagitan ni Asaf at ng kanyang mga kapatid.

⁸O kayo'y magpasalamat sa PANGINOON, tumawag kayo sa kanyang pangalan; ipakilala ninyo sa mga bayan ang kanyang mga gawa.

⁹Umawit kayo sa kanya, magsiawit kayo ng mga papuri sa kanya; ipahayag ninyo ang lahat niyang mga kamanghamanghang gawa.

¹⁰Lumuwalhati kayo sa kanyang banal na pangalan; magalak ang puso ng mga nagsisihanap sa PANGINOON.

¹¹Hanapin ninyo ang PANGINOON at ang kanyang lakas; palagi ninyong hanapin ang kanyang pakikiharap.

¹²Alalahanin ninyo ang kanyang kamanghamanghang mga gawa na kanyang ginawa; ang kanyang mga kababalaghan, ang mga hatol na kanyang binigkas,

¹³O kayong binhi ni Israel na kanyang lingkod, kayong mga anak ni Jacob na kanyang pinili.

¹⁴Siya ang PANGINOON nating Diyos; ang kanyang mga hatol ay nasa buong lupa.

¹⁵Alalahanin ninyo ang kanyang tipan magpakailanman, ang salita na kanyang iniutos sa libu-libong salinlahi;

¹⁶ang tipan na kanyang ginawa kay Abraham, at ang kanyang pangakong isinumpa kay Isaac,

¹⁷na kanyang pinagtibay bilang isang tuntunin kay Jacob, bilang isang walang hanggang tipan kay Israel,

¹⁸na sinasabi, “Ibibigay ko sa iyo ang lupain ng Canaan, ang bahagi ng inyong mana.”

¹⁹Noong sila'y kakaunti sa bilang; at wala pang gasinong halaga, at nakikipamayan doon;

²⁰na nagpagala-gala sa iba't ibang bansa, mula sa isang kaharian hanggang sa ibang bayan,

²¹hindi niya hinayaan na pagmalupitan sila ng sinuman, kanyang sinaway ang mga hari dahil sa kanila;

²²na sinasabi, “Huwag ninyong galawin ang aking mga pinahiran ng langis, huwag ninyong saktan ang aking mga propeta!”

²³Kayo'y magsiawit sa PANGINOON, buong lupa, ihayag ninyo ang kanyang pagliligtas sa araw-araw.

²⁴Ipahayag ninyo ang kanyang kaluwalhatian sa gitna ng mga bansa, ang kanyang mga kamanghamanghang gawa sa gitna ng lahat ng mga bayan.

²⁵Sapagkat dakila ang PANGINOON at karapat-dapat purihin. Siya'y marapat na katakutan nang higit sa lahat ng diyos.

²⁶Sapagkat lahat ng diyos ng mga bayan ay mga diyus-diyosan; ngunit ang PANGINOON ang gumawa ng mga langit.

²⁷Karangalan at kamahalan ang nasa harapan niya, kalakasan at kasayahan ang nasa kanyang tahanan.

²⁸Iukol ninyo sa PANGINOON, kayong mga angkan ng mga bayan, iukol ninyo sa PANGINOON ang kaluwalhatian at ang kalakasan.

²⁹Iukol ninyo sa PANGINOON ang kaluwalhatiang marapat sa kanyang pangalan; magdala kayo ng handog, at magsiparoon kayo sa harap niya. Inyong sambahin ang PANGINOON sa banal na kaayusan.

³⁰Manginig sa harap niya ang buong lupa: oo, ang sanlibuta'y nakatayong matatag, hindi kailanman makikilos.

³¹Magsaya ang mga langit, at magalak ang lupa; at sabihin nila sa gitna ng mga bansa, “Ang PANGINOON ay naghahari!”

³²Hayaang umugong ang dagat at ang lahat ng pumupuno dito, matuwa ang parang at ang lahat ng naroon;

³³kung magkagayo'y aawit ang mga punungkahoy sa gubat dahil sa kagalakan sa harapan ng PANGINOON, sapagkat siya'y dumarating upang hatulan ang lupa.

³⁴O magpasalamat kayo sa PANGINOON sapagkat siya'y mabuti; sapagkat ang kanyang tapat na pag-ibig ay nananatili magpakailanman.

³⁵Sabihin din ninyo: “Iligtas mo kami, O Diyos ng aming kaligtasan, at tipunin mo kami, at iligtas mo kami sa mga bansa, upang kami'y magpasalamat sa iyong banal na pangalan, at lumuwalhati sa iyong kapurihan.

³⁶Purihin ang PANGINOON, ang Diyos ng Israel, mula sa walang pasimula hanggang sa walang hanggan.” At sinabi ng buong bayan, “Amen!” at pinuri ang PANGINOON.

³⁷Kaya't iniwan ni David doon si Asaf at ang kanyang mga kapatid sa harapan ng kaban ng tipan ng PANGINOON, upang patuloy na mangasiwa sa harap ng kaban, gaya ng kailangang gawain sa araw-araw.

³⁸Gayundin si Obed-edom at ang kanyang animnapu't walong kapatid; samantalang si Obed-edom na anak ni Jedutun at si Asa ay magiging mga bantay sa pinto.

³⁹At kanyang iniwan ang paring si Zadok at ang kanyang mga kapatid na mga pari sa harapan ng tolda ng PANGINOON sa mataas na dako na nasa Gibeon,

⁴⁰upang patuloy na maghandog ng mga handog na sinusunog sa PANGINOON sa ibabaw ng dambana ng handog na sinusunog sa umaga at hapon, ayon sa lahat nang nasusulat sa kautusan ng PANGINOON na kanyang iniutos sa Israel.

⁴¹Kasama nila si Heman at si Jedutun, at ang nalabi sa mga pinili at itinalaga sa pamamagitan ng pangalan upang magpasalamat sa PANGINOON, sapagkat ang kanyang tapat na pag-ibig ay magpakailanman.

⁴²Sina Heman at Jedutun ay may mga trumpeta at mga pompiyang para sa tugtugin at mga panugtog para sa mga banal na awitin. Ang mga anak ni Jedutun ay inilagay sa pintuan.

⁴³At ang buong bayan ay nagsiuwi sa kani-kanilang bahay, at si David ay umuwi upang basbasan ang kanyang sambahayan.