Read Ang Biblia, 2001 Exodo 15 Bible Online

Exodo 15 - Ang Biblia, 2001 bible

Exodo 15

¹Nang magkagayo'y inawit ni Moises at ng mga Israelita ang awit na ito sa PANGINOON, na sinasabi, “Ako'y aawit sa PANGINOON, sapagkat siya'y maluwalhating nagtagumpay; kanyang inihagis sa dagat ang kabayo at ang doo'y nakasakay.

²Ang PANGINOON ang aking awit at kalakasan, at siya'y naging aking kaligtasan; Ito ang aking Diyos, at aking pupurihin siya, siya'y aking itataas, ang Diyos ng aking ama.

³Ang PANGINOON ay isang mandirigma. PANGINOON ang pangalan niya.

⁴“Ang mga karwahe ng Faraon at ang kanyang hukbo sa dagat ay itinapon niya, at ang kanyang mga piling pinuno ay inilubog sa Dagat na Pula.

⁵Ang kalaliman ay tumatabon sa kanila; sila'y lumubog sa mga kalaliman na parang isang bato.

⁶Ang iyong kanang kamay, O PANGINOON ay maluwalhati sa kapangyarihan, ang iyong kanang kamay, O PANGINOON ang dumudurog sa kaaway.

⁷Sa kadakilaan ng iyong karilagan ay ibinubuwal mo ang bumabangon laban sa iyo; Iyong ipinapakita ang iyong matinding galit, at nililipol silang parang dayami.

⁸Sa hihip ng iyong ilong ang tubig ay natipon, ang mga agos ay tumayong parang isang bunton; Ang mga kalaliman ay namuo sa gitna ng dagat.

⁹Sinabi ng kaaway, ‘Aking hahabulin, aking aabutan, Hahatiin ko ang samsam, ang aking nais sa kanila ay masisiyahan, aking bubunutin ang aking tabak, lilipulin sila ng aking kamay.’

¹⁰Ikaw ay humihip ng iyong hangin, at tinabunan sila ng karagatan, Sila'y lumubog na parang tingga sa tubig na makapangyarihan.

¹¹“Sinong tulad mo, O PANGINOON, sa mga diyos? Sinong gaya mo, dakila sa kabanalan, nakakasindak sa maluluwalhating gawa, na gumagawa ng mga kababalaghan?

¹²Iniunat mo ang iyong kanang kamay, nilamon sila ng lupa.

¹³“Iyong pinatnubayan sa iyong wagas na pag-ibig ang iyong tinubos na bayan, sa iyong kalakasan ay inihatid mo sila sa banal mong tahanan.

¹⁴Narinig ng mga bansa, at nanginig sila, mga sakit ang kumapit sa mga naninirahang taga-Filistia.

¹⁵Kaya't ang mga pinuno ng Edom ay nagimbal; sa matatapang sa Moab, ang panginginig sa kanila ay sumakmal, at naupos ang lahat ng taga-Canaan.

¹⁶Sindak at panghihilakbot ang sa kanila'y umabot, dahil sa kadakilaan ng iyong bisig, sila'y parang batong di makakilos; hanggang sa makaraan, O PANGINOON, ang iyong bayan, hanggang ang bayan na iyong binili ay makaraan.

¹⁷Sila'y iyong papapasukin, at sila'y iyong itatanim sa bundok na iyong ari-arian, sa dako, O PANGINOON, na iyong ginawa upang iyong maging tahanan, sa santuwaryo, O PANGINOON, na itinatag ng iyong mga kamay.

¹⁸Ang PANGINOON ay maghahari magpakailanpaman.”

¹⁹Sapagkat nang ang mga kabayo ng Faraon ay nagtungo pati ang kanyang mga karwahe at pati ng kanyang mga nangangabayo sa dagat, at pinanunumbalik ng PANGINOON ang tubig ng dagat sa kanila; subalit lumakad ang mga anak ni Israel sa tuyong lupa sa gitna ng dagat.

²⁰Si Miriam na babaing propeta, na kapatid ni Aaron ay humawak ng isang pandereta sa kanyang kamay; at sumunod ang lahat ng mga babae sa kanya, na may mga pandereta at nagsayawan.

²¹Sila'y inawitan ni Miriam: “Umawit kayo sa PANGINOON, sapagkat siya'y maluwalhating nagtagumpay; nang inihagis niya sa dagat ang kabayo at ang doo'y nakasakay.”

²²Patuloy na pinangunahan ni Moises ang Israel mula sa Dagat na Pula, at sila'y lumabas sa ilang ng Shur; sila'y lumakad ng tatlong araw sa ilang at hindi nakatagpo ng tubig.

²³Nang sila'y dumating sa Mara, hindi nila mainom ang tubig sa Mara, sapagkat ito ay mapait. Kaya't tinawag itong Mara.[1]

²⁴Nagreklamo ang bayan kay Moises, na sinasabi, “Anong aming iinumin?”

²⁵Siya'y dumaing sa PANGINOON at itinuro sa kanya ng PANGINOON ang isang punungkahoy; inihagis niya ito sa tubig, at ang tubig ay tumamis.Doon, gumawa ang PANGINOON[2] para sa kanila ng isang batas at tuntunin. Doon ay sinubok niya sila,

²⁶na sinasabi, “Kung iyong diringgin ng buong tiyaga ang tinig ng PANGINOON mong Diyos, at iyong gagawin ang matuwid sa kanyang mga mata, at iyong susundin ang kanyang mga utos, at iyong tutuparin ang lahat ng kanyang mga batas, wala akong ilalagay na karamdaman sa iyo, na gaya ng inilagay ko sa mga Ehipcio; sapagkat ako ang PANGINOON na nagpapagaling sa iyo.”

²⁷Sila'y dumating sa Elim, kung saan mayroong labindalawang bukal ng tubig, at pitumpung puno ng palma; at sila'y humimpil doon sa tabi ng tubig.