Read Ang Biblia, 2001 Job 10 Bible Online

Job 10 - Ang Biblia, 2001 bible

Job 10

¹“Kinasusuklaman ko ang aking buhay; malaya kong bibigkasin ang aking karaingan; ako'y magsasalita sa kapaitan ng aking kaluluwa.

²Sasabihin ko sa Diyos, Huwag mo akong hatulan; ipaalam mo sa akin kung bakit mo ako kinakalaban.

³Mabuti ba sa iyo na ikaw ay magpahirap, na iyong hamakin ang gawa ng iyong mga kamay at iyong sang-ayunan ang mga pakana ng masama?

⁴Ikaw ba'y may mga matang laman? Ikaw ba'y nakakakita tulad ng pagkakita ng tao?

⁵Ang iyo bang mga araw ay gaya ng mga araw ng tao, o ang iyong mga taon ay gaya ng mga taon ng tao,

⁶upang ikaw ay maghanap ng kasamaan ko, at mag-usisa ng kasalanan ko,

⁷bagaman iyong nalalaman na ako'y hindi nagkasala, at walang makapagliligtas mula sa iyong kamay?

⁸Ang iyong mga kamay ang humugis at gumawa sa akin, at ngayo'y pumipihit ka at pinupuksa ako.

⁹Iyong alalahanin, na ako'y ginawa mo mula sa luwad, at ibabalik mo ba akong muli sa alabok?

¹⁰Hindi mo ba ako ibinuhos na parang gatas, at binuo mo akong parang keso?

¹¹Ako'y dinamitan mo ng balat at laman, at ako'y hinabi mo ng mga buto at mga litid.

¹²Ako'y pinagkalooban mo ng buhay at tapat na pag-ibig, at ang iyong kalinga ang nag-ingat ng aking espiritu.

¹³Gayunma'y ang mga bagay na ito ay iyong ikinubli sa iyong puso; alam ko na ito ang layunin mo.

¹⁴Kung ako'y magkasala, ako nga'y iyong tinatandaan, at hindi mo ako pinawawalang-sala sa aking kasamaan.

¹⁵Kung ako'y masama, kahabag-habag ako! Kung ako'y matuwid, hindi ko maitaas ang aking ulo; sapagkat ako'y puspos ng kahihiyan, at tingnan mo ang aking kahirapan.

¹⁶At kung itaas ko ang aking sarili, tinutugis mo akong parang leon; at ipinapakita mong muli ang iyong kapangyarihan sa akin.

¹⁷Pinanunumbalik mo ang iyong mga pagsaksi laban sa akin, at dinaragdagan mo ang iyong galit sa akin; nagdadala ka ng mga bagong hukbo laban sa akin.

¹⁸“Bakit mo pa ako inilabas sa sinapupunan? Namatay na sana ako bago pa ako nakita ng alinmang mata.

¹⁹Ako sana'y naging parang hindi nabuhay; nadala sana ako mula sa sinapupunan hanggang sa libingan.

²⁰Hindi ba iilan ang mga araw ng aking buhay? Tapusin mo na nga! Bayaan mo na ako, upang ako'y makatagpo ng kaunting kaginhawahan,

²¹bago ako magtungo na mula roo'y hindi ako makakabalik, sa lupain ng kapanglawan at ng pusikit na kadiliman,

²²sa lupain ng kapanglawan gaya ng kadiliman ng malalim na anino na walang kaayusan, na doon ay nagliliwanag na gaya ng kadiliman.”