Read Ang Biblia, 2001 Job 11 Bible Online

Job 11 - Ang Biblia, 2001 bible

Job 11

¹Nang magkagayo'y sumagot si Zofar na Naamatita, at sinabi,

²“Hindi ba sasagutin ang karamihan ng mga salita? At mapawalang-sala ang lalaking madada?

³Patatahimikin ba ang mga tao ng iyong kangangawa, wala bang hihiya sa iyo kapag ikaw ay nanunuya?

⁴Sapagkat iyong sinasabi, ‘Ang aking aral ay dalisay, at ako'y malinis sa iyong mga mata!’

⁵Ngunit ang Diyos nawa'y magsalita, at ibuka ang kanyang mga labi sa iyo;

⁶at ipakilala nawa sa iyo ang mga lihim ng karunungan! Pagka't siya ay sagana sa kaunawaan. Alamin mo na sinisingil ka ng Diyos ng kulang pa kaysa nararapat sa iyong kasalanan.

⁷“Matatagpuan mo ba ang malalalim na bagay ng Diyos? Matatagpuan mo ba ang hangganan ng Makapangyarihan sa lahat?

⁸Ito ay mataas kaysa langit; anong iyong magagawa? Malalim kaysa Sheol — anong iyong malalaman?

⁹Ang sukat nito ay mas mahaba kaysa lupa, at mas malawak kaysa dagat.

¹⁰Kung siya'y dumaan, at magbilanggo, at tumawag ng paglilitis, sinong makakapigil sa kanya?

¹¹Sapagkat nakikilala niya ang mga taong walang kabuluhan, kapag nakakita siya ng kasamaan, hindi ba niya ito isasaalang-alang?

¹²Ngunit ang taong hangal ay magkakaroon ng pagkaunawa, kapag ang asno ay ipinanganak na tao.

¹³“Kung itutuwid mo ang iyong puso, iuunat mo ang iyong kamay sa kanya.

¹⁴Kung ang kasamaan ay nasa iyong kamay, ilayo mo ito, at huwag nawang manirahan ang kasamaan sa iyong mga tolda.

¹⁵Walang pagsala ngang itataas mo ang iyong mukha na walang kapintasan; ikaw ay hindi matatakot at magiging tiwasay.

¹⁶Malilimutan mo ang iyong kahirapan, iyong maaalala ito na parang tubig na umagos.

¹⁷At ang iyong buhay ay magiging lalong maliwanag kaysa katanghalian at magiging gaya ng umaga ang kanyang kadiliman.

¹⁸At ikaw ay mapapanatag sapagkat may pag-asa; ikaw ay mapapangalagaan, at tiwasay kang magpapahinga.

¹⁹Ikaw nama'y hihiga at walang mananakot sa iyo; maraming hihingi ng kalinga mo.

²⁰Ngunit ang mga mata ng masama ay manghihina, at mawawalan sila ng daang tatakasan, at ang kanilang pag-asa ay hininga'y malagutan.”