Read Ang Biblia, 2001 Job 12 Bible Online

Job 12 - Ang Biblia, 2001 bible

Job 12

¹Nang magkagayo'y sumagot si Job, at sinabi,

²“Walang pag-aalinlangan na kayo ang bayan, at mamamatay na kasama ninyo ang karunungan.

³Ngunit ako'y may pagkaunawa na gaya ninyo; hindi ako mas mababa sa inyo. Sinong hindi nakaalam ng mga bagay na gaya nito?

⁴Ako'y katatawanan sa aking mga kaibigan, ako na tumawag sa Diyos, at ako'y sinagot niya, isang ganap at taong sakdal, ay katatawanan.

⁵Sa pag-iisip ng isang nasa katiwasayan ay may pagkutya sa kasawian; nakahanda iyon sa mga nadudulas ang mga paa.

⁶Ang mga tolda ng mga magnanakaw ay may kapayapaan, at silang nanggagalit sa Diyos ay tiwasay; na inilalagay ang kanilang diyos sa kanilang kamay.

⁷“Ngunit ngayo'y tanungin mo ang mga hayop, at tuturuan ka nila; ang mga ibon sa himpapawid, at kanilang sasabihin sa iyo;

⁸o ang mga halaman sa lupa, at tuturuan ka nila; at ang mga isda sa dagat ay magpapahayag sa iyo.

⁹Sinong hindi nakakaalam sa lahat ng mga ito, na ang kamay ng PANGINOON ang gumawa nito?

¹⁰“Nasa kamay niya ang buhay ng bawat bagay na may buhay, at ang hininga ng lahat ng mga tao.

¹¹Hindi ba sumusubok ang mga salita ng pandinig, gaya ng ngalangala na lumalasa ng pagkain?

¹²Nasa matatanda ang karunungan, ang haba ng buhay ay ang kaunawaan.

¹³“Nasa Diyos ang karunungan at kalakasan; kanya ang payo at kaunawaan.

¹⁴Kapag siya'y nagpabagsak, walang makakapagtayo, kapag ikinulong niya ang tao, walang makakapagbukas.

¹⁵Kapag kanyang pinigil ang tubig, natutuyo ito; kapag kanyang pinaagos, ang lupa ay inaapawan nito.

¹⁶Nasa kanya ang kalakasan at ang karunungan, ang nadaya at ang mandaraya ay kanya.

¹⁷Kanyang pinalalakad na hubad ang mga tagapayo, at ginagawa niyang hangal ang mga hukom.

¹⁸Kanyang kinakalag ang gapos ng mga hari, at binibigkisan ang kanilang mga baywang ng pamigkis.

¹⁹Ang mga pari ay hubad niyang pinalalakad, at pinababagsak ang makapangyarihan.

²⁰Kanyang inaalisan ng pananalita ang pinagtitiwalaan, at inaalis ang pagkaunawa ng mga nakakatanda.

²¹Siya'y nagbubuhos ng kutya sa mga pinuno, at kinakalag ang pamigkis ng malakas.

²²Inililitaw niya ang malalalim mula sa kadiliman, at inilalabas sa liwanag ang pusikit na kadiliman.

²³Kanyang pinadadakila ang mga bansa, at winawasak ang mga ito. Kanyang pinalalaki ang mga bansa, at itinataboy ang mga ito.

²⁴Kanyang inaalis ang pang-unawa mula sa mga pinuno ng bayan sa lupa, at kanyang pinalalaboy sila sa ilang na walang lansangan.

²⁵Sila'y nangangapa sa dilim na walang liwanag, at kanyang pinasusuray sila na gaya ng isang lasing.