Read Ang Biblia, 2001 Job 24 Bible Online

Job 24 - Ang Biblia, 2001 bible

Job 24

¹“Bakit hindi tinutupad ng Makapangyarihan sa lahat ang mga kapanahunan? At bakit hindi nakikita ng mga nakakakilala sa kanya ang kanyang mga araw?

²Inaalis ng mga tao ang mga palatandaang bato, hinuhuli nila ang mga kawan, at ipinapastol ang mga ito.

³Kanilang itinataboy ang asno ng ulila, kinukuha nila ang baka ng babaing balo bilang sangla.

⁴Kanilang itinataboy sa lansangan ang dukha; nagkukubling magkakasama ang mga maralita sa lupa.

⁵Gaya ng mababangis na asno sa ilang sila'y humahayo patungo sa kanilang gawain, na naghahanap sa ilang ng mabibiktima bilang pagkain para sa mga anak nila.

⁶Sila'y nagsisiani sa bukid na hindi kanila; at sila'y namumulot sa ubasan ng masama.

⁷Sila'y hubad na nakahiga buong magdamag na walang kasuotan, at sila'y walang saplot laban sa ginaw.

⁸Sila'y basa ng ulan sa mga kabundukan, at yumayakap sa bato sa paghahanap ng makakanlungan.

⁹(May mga umaagaw ng ulila mula pa sa suso ng ina, at kinukuhang sangla ang sanggol ng dukha.)

¹⁰Sila'y humahayong hubad, walang damit, bagaman gutom, dinadala nila ang mga bigkis;

¹¹mula sa mga hanay ng olibo, sila'y gumagawa ng langis, sila'y nagpipisa sa pisaan ng ubas, subalit sa uhaw sila'y nagtitiis.

¹²Mula sa lunsod ay dumadaing ang naghihingalo, at ang kaluluwa ng sugatan ay humihingi ng saklolo, gayunma'y hindi pinapansin ng Diyos ang kanilang pagsamo.

¹³“May mga naghihimagsik laban sa liwanag; na hindi nakakaalam ng mga daan niyon, at hindi nananatili sa mga landas niyon.

¹⁴Ang mamamatay-tao ay bumabangon sa bukang-liwayway upang mapatay niya ang dukha at nangangailangan; at sa gabi naman ay gaya siya ng magnanakaw.

¹⁵Ang mata ng mangangalunya ay naghihintay rin ng takipsilim, na nagsasabing, ‘Walang matang makakakita sa akin;’ at siya'y nagbabalatkayo ng kanyang mukha.

¹⁶Sa dilim ay naghuhukay sila sa mga bahay; sila'y nagkukulong sa sarili kapag araw; ang liwanag ay hindi nila nalalaman.

¹⁷Sapagkat ang pusikit na kadiliman ay umaga para sa kanilang lahat, sapagkat sila'y kaibigan ng pusikit na kadilimang nakakasindak.

¹⁸“Inyong sinasabi, ‘Sa ibabaw ng tubig sila'y matuling dinadala, ang kanilang bahagi ay sinumpa sa lupa; walang mamimisa na babalik sa mga ubasan nila.

¹⁹Inaagaw ng tagtuyot at init ang tubig ng niyebe, gayundin ang ginagawa ng Sheol sa mga nagkasala.

²⁰Kalilimutan sila ng sinapupunan, para sa bulati'y matamis silang matatagpuan, hindi na maaalala ang kanilang pangalan, kaya't babaliing parang punungkahoy ang kasamaan.’

²¹“Ginagawan ng masama ang hindi nanganganak na babae, at ang babaing balo ay hindi ginagawan ng mabuti.

²²Ngunit pinahahaba ng Diyos[1] ang buhay ng malakas sa pamamagitan ng kanyang kapangyarihan; sila'y bumabangon ngunit walang katiyakan sa buhay.

²³Pinagkakalooban niya sila ng katiwasayan, at sila'y inaalalayan; at ang kanyang mga mata ay nasa kanilang mga daanan.

²⁴Sila'y itinaas nang ilang sandali, at pagkatapos ay wala na. At sila'y nalalanta at kumukupas na gaya ng lahat ng mga iba, sila'y pinuputol na gaya ng mga uhay.

²⁵Kung hindi gayon, sinong magpapatunay na ako'y bulaan, at magpapakita na ang sinasabi ko'y walang kabuluhan?”