Read Ang Biblia, 2001 Job 37 Bible Online

Job 37 - Ang Biblia, 2001 bible

Job 37

¹“Dahil din dito'y nanginginig ang aking puso, at lumulundag sa kinalalagyan nito.

²Dinggin ninyo ang tunog ng kanyang tinig, at ang sigaw na lumalabas sa kanyang bibig.

³Kanyang ipinapadala mula sa silong ng buong langit, at ang kanyang kidlat sa mga sulok ng daigdig.

⁴Kasunod nito'y dumadagundong ang kanyang tinig, siya'y kumukulog sa pamamagitan ng kanyang marilag na tinig, hindi niya pinipigil ang pagkulog kapag naririnig ang kanyang tinig.

⁵Ang Diyos ay kumukulog na kagila-gilalas sa pamamagitan ng kanyang tinig; gumagawa siya ng mga dakilang bagay, na hindi natin mauunawaan.

⁶Sapagkat sinasabi niya sa niyebe, ‘Sa lupa ikaw ay bumagsak,’ at sa ambon at sa ulan, ‘Kayo ay lumakas.’

⁷Ang kamay ng bawat tao ay tinatatakan niya, upang malaman ng lahat ng mga tao ang kanyang gawa.

⁸Kung gayo'y papasok ang mga hayop sa kanilang tirahan, at namamalagi sa kanilang mga kublihan.

⁹Mula sa silid nito ang ipu-ipo'y nanggagaling, at ang ginaw mula sa nangangalat na mga hangin.

¹⁰Sa pamamagitan ng hininga ng Diyos ay ibinibigay ang yelo; at ang malawak na tubig ay mabilis na mamumuo.

¹¹Kanyang nilalagyan ng halumigmig ang makapal na ulap, pinangangalat ng mga ulap ang kanyang kidlat.

¹²Sila'y umiikot sa pamamagitan ng kanyang patnubay, upang ang lahat na iutos niya sa kanila ay kanilang magampanan, sa ibabaw ng natatahanang sanlibutan.

¹³Maging sa saway, o para sa kanyang lupa, o dahil sa pag-ibig iyon ay pinangyayari niya.

¹⁴“Dinggin mo ito, O Job; tumigil ka, at bulayin mo ang kahanga-hangang mga gawa ng Diyos.

¹⁵Alam mo ba kung paano sila inuutusan ng Diyos, at pinasisikat ang kidlat ng kanyang ulap?

¹⁶Alam mo ba ang mga pagtitimbang sa mga ulap, ang mga kahanga-hangang gawa niya na sa kaalaman ay ganap?

¹⁷Ikaw na mainit ang kasuotan kapag tahimik ang lupa dahil sa hangin mula sa timog?

¹⁸Mailalatag mo ba, na gaya niya, ang himpapawid, na sintigas ng isang hinulmang salamin?

¹⁹Ituro mo sa amin kung anong sa kanya'y aming sasabihin, dahil sa dilim ay hindi namin maayos ang aming usapin.

²⁰Sasabihin ba sa kanya na nais kong magsalita? Ninasa ba ng isang tao na malunok siya?

²¹“At ngayo'y hindi makatingin ang mga tao sa liwanag, kapag maliwanag ang kalangitan, kapag ang hangin ay nakaraan, at ang mga iyon ay pinaram.

²²Mula sa hilaga ay nagmumula ang ginintuang karilagan, ang Diyos ay nadaramtan ng kakilakilabot na kadakilaan.

²³Ang Makapangyarihan sa lahat — hindi natin siya matatagpuan; siya'y dakila sa kapangyarihan at katarungan, at hindi niya susuwayin ang saganang katuwiran.

²⁴Kaya't kinatatakutan siya ng mga tao; hindi niya pinapahalagahan ang sinumang pantas sa sarili nilang kayabangan.”